Read Sumi Naga AKIKIHI 22 Bible Online

AKIKIHI 22 - Sumi Naga bible

AKIKIHI 22

¹Israilmi ye iqe susu wuve eno Jordan kipelau Jerikho ghungulo Muab yeghiqalo aghazu shipe qhilu.

²Muab kukau Zipor nu Balak no Israilmino Amarimi shou kiu shive keno eno tilehi Israilmi khijehi akeno chilukelo,

³pa eno paw timi kumtsu msa khokhoshive.

⁴Muabmi no Midiyami sakiphemi vilo pi, “Timi kutsasa hipaqoye amshitsu lakhino achu kumza-a lo atsaneghu chu akeshi ningu sumxape akeu kumtsu kushuwo kumo dolono kutsavetsuni chenie.” Tighenguno akukau Balak no

⁵Beor nu Balam kusaghi penike aghini kishimi puwu, Balam ye Amao yeghi Eufrati ghoki kupunulo Pethor ipikeu lo ake. Aghinimino Balak launo asutsa hitoi peighi: “Niye opelo hi ithi penishi ani, ike Ijip kudauno ashiayeh kije lakhi ighi ani; pano timiqoye aqha kumtsulo nhakha wocheni eno niyeghi luvetsuni ke shikichi ani.

⁶Panonguye ningu nguno timi kumzapu, tighenguno panongu shou musuini pukuve tsulo.Ishi ake ninguno panongu haleluveno aghakhu lono panoqo hapupoluvi ke.Ino ithi akeuno nono kukumgha tsa pitsukelo timiqo mughave cheni eno nono musuini tsa pitsukelo panongu mughamove chenike.”

⁷Tighenguno Muabmi ngo Midiyami sakiphemino musuini keu me tsukepu panongu gholo pewu eno Balam lau ighino Balak sutsa pesu patsu.

⁸Tileno Balam no panoqo vilo pi, “Itijiye hilau ngovelo eno AMPEU no ivilo kiu kiumu pitsu keu thoghiu no ino nongu vilo pithinike.” Tighenguno Muabmi sakiphemino Balam gholo ngove.

⁹Alhou no Balam lau ighi puzu iniju, “Timi ogholo ngo akeqoye khunoqo kya?”

¹⁰Pano khochile, “Muab lo akukau Balak no ivilo pipenike panoqo puwukeuno

¹¹Ijip kudauno timi aqo lakhi ighikemino ayeghi kuchopu nhakha wocheni pike. Pano ipelo pa ghenguno timi tipaqo musuinive tsupe nishi ani tishi anguno pano tipaqo sasu aghushi puzu hapupove niyeke.”

¹²Alhou no Balam vilo pi, “Timi hipaqo gholo wukevilo kughengu panonguye iwu kukumgha puanike.”

¹³Thanau Balam no Balak ghinikishimi vilo pi, “Noghakhulo idewovelo; AMPEU no ipelo nongu gholo wunikeu lakhavae.”

¹⁴Tighenguno panonguno Balak lau ideghive eno pavilo Balam ye panoqo gholo ighi mokepi pive.

¹⁵Itaghi Balak no sakiphemi puzuu puwukemi nguno ala eno puzuumi nguno akhotou shi achekemi puwu.

¹⁶Panonguno Balam lau ighi eno Balak launo asutsa hipau pesu patsu: “Kiunomu ovekhave pekevi puzu ighi tsulo!

¹⁷Ino kupukuno shi asaxu otsuni eno nono pikeu kiu kiumu shitsunike. Kishimo ake ighi puzu ighenguno timi hipaqo musuinive tsulo.”

¹⁸Ikemu Balam no ishi khochile, “Balak no pa kuka kilo shunayi ngo tsandiyi akeu kumtsu itsuve namu niye avehu kitila kutolo mu AMPEU iLhou no ahza tsukeu ghobideve monanike.

¹⁹Ikemu ino qhuiniju anike, kutamiqo toi nongu ghi itiji hilau ngovelo, tishianguno AMPEU ye ivilo kutau kiuala pikepu anikemo keno ino ithinike.”

²⁰Tipaji Alhou no Balam lau ighi puzu pi, “Timi hipaqono osasu panoqo gholo wulopi iniju ani aye, wunike kutolo ikemu ino ovilo kiu pinikeno tipau likhi shilo.”

²¹Tighenguno thanau inaqhe Balam no pawu gadaha shou iku puzu Muabmi sakiphemi sasu wuve.

²²Ikemu Balam no wuche keu lo Alhou ye aloghu ideve, eno Balam no pawu gadaha shou iku puzu pa qemi kinino pa gholo pa pape chekelo AMPEU wu kungumino pa la lakhanike alaghilo puthughove.

²³Kughou kungumi huno azuta sujo pesu tilehi puthugho akeu gadaha no ithuluve keno alaghi qhiveno alaphelo tsughususu wuve. Balam no gadaha ghaqhi puzu alaghilo saide saghi.

²⁴Tithiu kungumi huno atsayilu kini akeu dolo atuno hula hila putupuakeulo alaghi mughughuyi keu lo puthughove.

²⁵Gadaha no kungumi hu ithilukelo tipauno putu puakeu shou tsughu susu wu eno tipau lono Balam pukhu nudatsu. Itaghi Balam no gadaha ghaqhi.

²⁶Tinguno alau ghi kungumi huno azuu iqesu wuveno hukudaumu hikudaumu kitilamu katha wumla kepu alo kibikhoi keulo puthugholuve.

²⁷Itehiu loye, gadaha no kungumi ithulu puzu iqi ihozuluve. Balam ye agha ideveno pa kusu pesu gadaha ghaqhi thuve.

²⁸Tileno AMPEU no gadaha pelo atsa pilu kepu kuka tsuno tipauno Balam vilo ishi pi, “Niye oshou kiu shive keno noye itehi pha ghuthu kuthu ighaqhi ani kya?”

²⁹Balam no ishi gadaha khochile, “Kughengu nono ikughape zughashi auveke. Iulo azuta aghike aye niye oghiqiveni cheke.”

³⁰Gadaha no Balam khochile, “Niye nono okuxu kupujulo iku achekeu gadaha ke kumo kesha? Puzuu niye hikithipu shi opeitha puani kesha?” “Moe” ipi pano khochileve.

³¹Tithiu AMPEU no Balam nhethi xukhotsu eno AMPEU wu kungumi huno pa zuta peqhe pesu alaghilo puthugho aghikeu pano ithulu eno Balam no pagi pishiqho pesu ayeghilo iluqive,

³²Kungumi huno ishi inijuthuve, “Noye kushiye hikithipu shi ghuthu kuthu kutolo owu gadaha ghaqhi kya? Noye hipau kicheghuzu shimo kepushi ake ghenguno olaghi lakhanike ino ighike.

³³Ikemu owu gadaha no ni ithuluve puzu ghuthu kuthu kutolo tsughuluveke. Tipauno tishimoke aye ino oghiqhiveni cheke eno gadaha likhi puxuveni cheke.”

³⁴Tileno Balam no AMPEU wu kungumi vilo pi,”Ino axine shivae. Niye nono ihachile nike alaghilo puthugho akeu mthaveke; ikemu ino wunikelo ogizulo akumou shi aghi aye niye idechilesu wovenike.”

³⁵Ikemu kungumi huno ishi pi, “Timi hipaqo sasu wulo, ikemu ino ovilo pilo pikeu likhi pimasa ke.” Tighenguno Balam no panoqo gholono wuve.

³⁶Balam cheni pikeu sutsa Balak no chilu kelo, paye pa sasu kushonike Arnon ghoki phivilo Ar phughi akeulo wu, tiye Muabmi lughi loke.

³⁷Balak no pa vilo pi, “Noye kushiye ino atughiu okupuwu kelo ighimove kya? Noye ino asaxu lukumkha shi otsumla nani kepi kumsuve kesha?”

³⁸Balam no ishi khochile, “Niye ighive ake kumo? Itehi niye pikulupu kuka kiukela anikesha? Niye Alhou no ivilo kiu pilo pini keno tipau likhi pikulupu shi anike!”

³⁹Tighenguno Balam no Balak gholono Huzot phughilo ighi,

⁴⁰tilehi Balak no amshi ngo bheri ghiqhi no ashi hami pesu Balam ngo sakiphemi pa gholo chekeqo ghi tsuke.

⁴¹Thanau inaqhe Balak no Balam sasu Israilmi amqo lakhi ithukulupu a Bamot Bal lo iqho.