Read Sumi Naga AKIKIHI 23 Bible Online

AKIKIHI 23 - Sumi Naga bible

AKIKIHI 23

¹Pano Balak vilo pi, “Ighenguno hilehi akiptia tsuni mlatsulo eno amshitsu tsuni, bheritsu tsuni saghilo.”

²Pa vilo pivekeu toi Balak no shive eno Balam ngo Balak pamano akiptia lakhikhi shou amshitsu lakhi eno bheritsu lakhi pesu mllave.

³Tithiu Balam no Balak vilo pi, “Owu akiptia gho phivilo hile puthugholo ino wupuzu AMPEU ye isasu kusho nani kemokeno juni. Pano kiu kiumu ipiyesu keu ino ovilo pinanike.” Tishi puzu pa likhi atoghi kutsuqa lakhilo ikuve,

⁴eno Alhou no pa sasu kusholu. Balam no pa vilo pi, “Ino akiptia tsuni mlave tsua eno lakhikhi shou amshitsu lakhi bheritsu lakhi pesu mllave.”

⁵AMPEU no kiu pikepu keno Balam vilo pive eno asutsa pesu Balak tsupeniye pa kighide puwove.

⁶Pano ideighi kelo Balak ye tikutolo pawu pitimlla keu gho phivilo puthugho aghi keu ithulu eno pa gholo Muab lo sakiphemi kumtsu sasu aghi.

⁷Balam no tungpu tsa hipau pitsu: “Muab kukau Balak no Siriya kudauno isasu ighi, kipelau naghuto kudaunoke. ‘Ighilo eno ighenguno pitsulo, Israilmi shou musuini pukuve tsulo,’ ipi pano pike.

⁸Niye kishi puzu Alhou no musuinimo keu musuinini; Momu Alhou no pimo keu pughavekeu tsa pini kya?

⁹Qhemghai keu tuqu lono ino panoqo ithulu ani; Atoghiqo lono ino panoqo jukuto lucheni. Panonguye lomo shi xu achekeu shiyeh lakhi; Panonguye shiyeh kutami nguno kukumghau kepi panoqo ithi ani.

¹⁰Israilmi kughuko ye ayeghi mukhu paphike Panonguye kutomo kehu kihikhamlae. Alhou wu timiqo gholo hutoi ikuxu ashekha shipelo; Amikuchomi toi alokughuno shi ipelo thipelo.”

¹¹Tileno Balak no Balam vilo pi, “Noye ishou kiu shivetsu ani kya? Ino osasu hile ighikeu ye ighumi musuini peniyeke ikemu nono panoqo kumghatsu auvea kethono kiumu shitsumoe.”

¹²Pano khochile pi, “AMPEU no ivilo kiu pilo pikeno tilikhi ino pilu nanike.”

¹³Tithiu Balak no Balam vilo pi, “A-a kutau lakhi lo igholo ighilo tilauno nono Israilmi khami likhi ithulu nanike.”

¹⁴Pano Zofim luqalo Pisga Toghi kutsuqa lo pa sawu. Tilehi ghi pano akiptia tsuni mlape qhino tipaqo lakhikhi lo amshitsu lakhi bheritsu lakhi pesu mllae.

¹⁵Balam no Balak vilo pi, “Owu akiptigho phivilo puthugho aghilo eno hulauno ino Alhou sasu kushonike.”

¹⁶AMPEU no Balam sasu kusho puzu kiu pikepu keno pitsu eno Balak lau pa sutsa tsupe nike pa hapuwo.

¹⁷Ike pano ide ighikelo Balak ye pawu akipti gho phivilo puthugho aghikeu ithulu. AMPEU ye kiu pikelapi Balak no iniju,

¹⁸Tileno Balam no tungpu tsa hipau pitsu: “Zipor nu Balak, ighilo, eno ino kiu piniye anikeno inilo.

¹⁹Alhou ye timi kumo keke paye mikini chemoe; Paye timi lakhi kenomu pa kukumsu kiliveni chemoe; Pano kiu kiumu piqhivekeu pano shicheni; Pano pikelo tiye shive aghi cheni.

²⁰Kumghatsu penike niye ahza ithuluvae, Eno Alhou no kumghatsu keulo niye tipau kuchile mlae.

²¹Tithiu Israilmi ghenguno ino juchho puwo ithulu akeuye angukusapu momu akupuna kiumu li lau sughini chemoe. AMPEU panongu Lhou ye panoqo gholo anie; Paye panoqo kukau kepi panonguno asheshu cheni.

²²Alhou no Ijip lono panoqo saipeghi; tughalo mishitsu lakhi toi pano panoqo ghenguno aghu shitsuke.

²³Kuduu gha momu atumu jeli kiumu peithano Israil shiyeh shou akumou shimla nani. Itehiye Israilmi ghili timiqono ishi pinani, Alhou no kiu shivetsu akeno julo!

²⁴Israil shiyeh ye abongshu kumto lakhi toike: Pano suthapiniyi tsuchuve moke kutolo tiye ngo chemoke, Tipauno heqhive keqo jih musuye moke kutolo ngo chemoke.”

²⁵Tileno Balak no Balam vilo pi, “Nono Israilmi musuini monamu kumghatsu keu likhimu shitsu kevilo!”

²⁶Balam no khochile pi, “AMPEU no ivilo pilo pikeu kumtsu shini kepi niye ovilo pike kumo kesha?”

²⁷Balak no pi, “Ino osasu a-a kutau lakhilo wunike igholo ighilo. Ishi ake Alhou no opelo tilauno panoqo musuini penishi ani keniake.”

²⁸Tighenguno pano Balam sasu Peor Toghi kutsuqa lo iku, tiye asayeqha juchholu keulo.

²⁹Balam no pa vilo pi, “Ighenguno hilehi akiptia tsuni shipe qhilo eno amshitsu tsuni eno bheritsu tsuni ilau saighilo.”

³⁰Pa vilo pive ketoi Balak no shitsu eno akiptia lakhikhi shou amshitsu lakhi eno bheritsu lakhi pesu mllae.