Read Sumi Naga AKIKIHI 24 Bible Online

AKIKIHI 24 - Sumi Naga bible

AKIKIHI 24

¹AMPEU no pa pelo Israilmi kumghatsu penishi akeu Balam no ithive kethiuye paye kimchi kepu michi juwu move, ti puzuu shiche ketoi shimove. Pano asayeqha kudau tsughuwo puzu

²Israilmi no alagha alaghano aghazu shipesu akeu ithulu. Alhou ghunguno pa peithaluve,

³eno pano tungpu tsa hipau pitsu: “Beor nu Balam sutsa ke, Timi khuuno thebei ithuluve keno pa tsake

⁴Alhou no kiu pi anikeno chilukemi ke. Anhethi sukuqumo puzu ino zuxo lakhi lono Akughushuu Lhou launo kungu nhetsu lakhi ithulu.

⁵Israilmi phikiqo ye jukighilepu ke,

⁶Amsabono ajoshi ajo kushuwo aketoi Momu aghoki phivilo axaliqo toike, AMPEU no aloy subo shosu keu toike Momu azu phivi lo kedar subo ake toike.

⁷Panonguye tsutsughu kupukunoshi anani Azu akivishi suchekeu luqalo panoqo xabo yisulu nani Panongu kukau ye Agag nguno akijeu shinani, Pa yehkipe ye aqha kije kushuwolo jochhowo nani.

⁸Alhou no Ijip lono panoqo saipeghi; Tughalo mishitsu lakhi toi pano panongu ghenguno aghu shitsuke. Panonguno panoqo ghumi tsuqhive. Panoqo saghi qhuthave tsu, panoqo leghu hechhevetsu.

⁹Shiyeh hiye abongushu kumgha lakhi toike; Tipauno zu akelo khunomu tipau kudaputhu msake. Khunono Israil shou kumghatsuni keno kukumgha shinani.”

¹⁰Balak no pa mlo kighide launo pa u putshu pesuno Balam vilo pi, “Ighumi musuini peniye ino okusaghike, ikemu tishinike zuqhulo hipau pha ghuthu kuthu panongu kumghave tsuake.

¹¹Itehino noghakhulo wovelo! Ino asaxu otsuniye shike ikemu AMPEU no opelo asaxu lupemoni keu shivae.”

¹²Balam no ishi khochile, “Nono ilau aghini kishimi puwukeqo vilo ino pikeuno

¹³okukaki lo tsandiyi ngo shunayi akeu kumtsu pesu itsuve namu niye ilikhi ighoshive puzu AMPEU no ahza tsukeu ghobideve mlakepi pivae. AMPEU no ivilo kiu pilo pinikeno niye tipau likhi pinanike.”

¹⁴Balam no Balak vilo pi, “Itehi niye niwu timiqo lau idewove niake ikemu ino wumphi lono Israilmino ighinikeu lo nowu timiqo shou kiu shinani keno ino okutughuve tsunike.”

¹⁵Tithiu pano tungpu tsa hipau pitsu: “Beor nu Balam sutsa, Timi khuuno mtsumishei ithulu cheni keno tipau tsake.

¹⁶Alhou no kiu pi anikeno chilukemi ke Shishe Akiqheu launo ighikeu kighithi ithulu cheni Zuxo lakhi lono anhethi sukuqumono Akughushu Lhou launo ino kungu nhetsu lakhi ithulu.

¹⁷Ino ighinikeu lo jusulu, Eno ino Israil shiyeh ithulu Kukami lakhi phuphuyikeu yepu lakhi toi tipau shiyeh lono ipeghi nani. Amchhi yepu lakhi toi pano Israil lono ighi nani. Pano Muab lo sakiphemiqo ghaqhi nani Aqhekuza mukamihi kemiqo pano ghadaqhi nani.

¹⁸Edom lo pa ghumiqo pano leluve nani Panoqo yeghi pesu pawu shivenani, Israil ye tolukibe auve nani.

¹⁹Israil shiyehno panoqo nedaqoda nani Eno ghupe puaghikemi ashekhami ghi pughavetsu nani.”

²⁰Tithiu Balam no pawu kungu nhetsulo Amalekmi ithulu eno tungpu tsa hipau pitsu: “Amalekmi ye kumtsu nguno shishe akumto shiyeh ke, Ikemu ashekha lo tiye alhokupuju ghenguno pughave nani.”

²¹Pawu kungu nhetsu lo Kenimi ithulu eno tungpu tsa hipau pitsu: “Nono achekeu a ye sushokulu shi ani, Atu nhekikhilo apusu chuqumghai shipuake toi ani,

²²Ikemu nongu Kenimi ye kutsaleve nani Tiye Asiriya no nongu akughu shi sawuve ke lono.”

²³Balam no tungpu tsa highi pitsu: “Ahuu kudau timi kumqope akeqoye khunoqo kya?

²⁴Kupra kudauno azu shouno leighikemi cheni; Panonguno Asiriya ngo Eber leluve nani, Ikemu tipashelo panonguye alhokupuju lo pughave nani.”

²⁵Tithiu Balam no kutoluve eno pano ghakhu lo idewove eno Balak ye pashelo pa lalo wove.