Read Sumi Naga AKIKIHI 25 Bible Online

AKIKIHI 25 - Sumi Naga bible

AKIKIHI 25

¹Kughou Israilmino Akasia khilalo aghazu shipe ngolu keno, kiptimiqono Muablimi tilehi aghikeqo sasu xupimiuve.

²Khilehi Muab lo lhou mllache keno tilehi lhoxu heqhi kuchukusho shikeu alo totimi hipaqono Israilmi kusuuve. Israilmino achuqupu tipaqo chu eno Peor lo Baal

³lhou mllauve. Ikehu AMPEU ye panongu shou agha ideveno

⁴Muse vilo pi, “Israilmi sakiphemi kumtsu salulo eno ighokulu shi pucho mughu lono panoqo ghiqhivelo, tithiuno niye timiqo lau agha ide kithemo nanike.”

⁵Muse no tile atomiqo vilo pi, “Nongu milakhi khino nolaghalo Peor lo Baal mllauve kemi kumtsu ghiqhivelo.”

⁶Israilmi lakhino Midiyami totimi lakhi sasu Muse ngo aqoaho akuchhopu nhekithe lono pa phikilo sailove, panonguye AMPEU no ngochekeu Phiki zulo mloqa akelono tishike.

⁷Eleazar nu achineu Fineha, ti Aron tinuli huno hi ithulu kelo, paye ilhethuveno kuhokumqo akeu lono cheve. Pano angupa lakhi ikhilu no

⁸aphikilo akiptiu ngo atotiu pama papesu ilo no angupa pesu pama chheda kuqhave. Hitoi shino kusakugha pusano Israilmi kutsaqhi akeu lono lakhalu,

⁹ikemu tipauno timi 24,000 pithikhave tsu aghike.

¹⁰AMPEU no Muse vilo pi,

¹¹“Fineha no kiu shikeno tipau ghenguno niye Israilmi shou agha ide kithemovae. Paye inguno kutau lhou mllauve keu khilemu kutuumlake eno tipau ghenguno niye agha ide panongu kutsamo ke.

¹²Tighenguno ino pa sasu puloshoqhi lakhi ighinikeu ghuloki lo ghi pekishe peche kepu shi anikepi pa vilo pilo.

¹³Pa eno pa laghaqo ye ishokibe ghi achinemi shiche penikeu shi kutove tsuae kughengu isasu kusuxani kemi lau paye kutuuve keu shimoke eno timiqo xine ghenguno axine qhivetsu keu sughilu peke.”

¹⁴Israilmi khuu Midiyami totimi gholono pithive keno pajeye Salu nu Zimri ke, Simon laghalo akibo lakhi touke.

¹⁵Atotiu jeye Kozbi. Li pu Zur ye Midiyami laghalo amqo lakhi shou atou ke.

¹⁶AMPEU no ahza Muse tsu,

¹⁷“Midiyami lewulo eno panoqo ghiqhi khavelo,

¹⁸kughengu panonguno Peor lo nongu pishiqhive puzu nongu shou alhoksa kumla shike eno Peor lo pusa ghakusa ghulokilo pithive keu Kozbi ghengunoke.”