Read Sumi Naga AKIKIHI 27 Bible Online

AKIKIHI 27 - Sumi Naga bible

AKIKIHI 27

¹Zelofehad nonga qoye hipaqo ke, Mahla, Noa, Hogla Milka eno Tirza ke. Zelofehad papu ye Hefer ,Gilead nu Makhir nu, Manase nu Josef nuke.

²Panonguno AMPEU no ngochekeu Phiki ikulo lalo wuno Muse ngo achineu Eleazar, sakiphemi eno aqoaho kuchopu gizulo puthughono ishi pi,

³“Ningu papu ye anu lakhi mu shimono asayeqha lono thiveke. Paye AMPEU hekibideu Kora papemiqo gholo lakhi kumoke;pano thive keuye pa xine ghenguno ke.

⁴Pano anu kuhaveke ghenguno likhiye kushiye Israil lo pa je hauve peni kya? Nipuno sholokumi gholo amheghi ningu ghi tsulo.”

⁵Muse no linoqo vehu tsa pesu AMPEU lau qhitsuke,

⁶AMPEU no pa vilo pi,

⁷“Zelofehad ngaqono kiu qhuiniju ani keno tiye achipike; lipuno sholokumi gholo amheghi li noqo tsulo. Pa mheghiye linoqo pelo ighilu pelo.

⁸Israilmi vilo timi lakhino anu kiptimi kuhano thive nikelo pa nga pelo pa mheghi ighilu pelo pilo.

⁹Timi tipauno anga kuha aye pa thikuzumino amheghi lupelo.

¹⁰Paye athikuzumi ghi kuha aye papu thikuzumino tipau ighilu nani.

¹¹Paye athikuzumi momu apuh thikuzumi ghi kuha aye pano sholokumi pa kupunu aghikeuno tipau ighilu nani. Israilmi ye akhuayeh lo shimasa keu kepi hipau pe pimhelo, tiye ni, AMPEU no ahza nongu tsukeu toi shilo.”

¹²AMPEU no Muse vilo pi, “Abarim Toghilo ikulo eno Israilmi lau ino tsu akeu yeghi shou jupuwu julo.

¹³Nono tipau ithuluve kethiu noye omu Aron toi thive nani,

¹⁴kughengu Zin sayeqha lo okujo ye ino ahza tsukeu hebideveke. Kughou aqoaho kuchopu ghano Meriba lo ishou muchho munu keno okujo ye panoqo gizulo ikimthe kuka kutashi akeu ithitsu moveke.” (Meriba ye Zin sayeqha lo Kades lo azupuki akeuke.)

¹⁵Muse no ishi inikhu,

¹⁶“AMPEU Alhou, kumtsu kuxu puki, ino ovilo inikhu anike, timiqo sakipheu shipenike timi lakhi kishe tsulo

¹⁷eno aghushilo panongu shou ahza tsukeu shipelo tishianguno owu aqoaho ye bheri loji akheu kuhakeu toimo nanike.”

¹⁸AMPEU no Muse vilo pi, “Nun nu Joshua shitsami lakhi lulo eno pa kutsu shou ou kumgha belo.

¹⁹Papelo achineu Eleazar eno aqoaho kuchopu gizulo puthugho pelo eno panongu kumtsu zulono pano othelilo kepi asheshuvelo.

²⁰Okuka agha hami pesu pa tsulo tishianguno Israilmi aqoaho kuchopu no pa gholu nani.

²¹Paye achineu Eleazar pukhu nani, pano Urim ngo Thumim peitha no ipulou ithilu nanike. Hipa ghola lono Eleazar no thwokha kumla kughutha kumtsu lo Joshua ngo Israilmi qoaho kichepiye nanike.”

²²AMPEU no pa vilo ahza tsuve ketoi Muse no tishike.

²³AMPEU no ahza tsuke toi Muse no pa u pesu Joshua kutsu shou kumgha betsu eno pa thelilo kepi asheshuve.