Read Sumi Naga AKIKIHI 28 Bible Online

AKIKIHI 28 - Sumi Naga bible

AKIKIHI 28

¹AMPEU no ahza Muse tsukeuno

²Israilmi pelo ado aghuloki kichetsu puakeulo achuqupu kumllagho avehupu shi akeu pesu Alhou lau tsulo pike tiye pa lokutu chekeuke.

³Achuqupu kumllagho hipaqo AMPEU lau qhitsu penikeu shike: tsalakipetsu lo piti mllakepu ghenguno bheriti tsu ampe lakhikhi shi akeu kiumu tukutiye kuhakeu kini.

⁴Bheriti lakhino inaqheno pesu mlla eno lakhiuno avelauno pesu mllalo,

⁵lakhikhi gholo athi kumllagho lakhi tsulo, tiye asho mukhu kilogram lakhilo akiviu oliv teli liter lakhi pesu kunu lo.

⁶Hiye tsalakipetsulo qhoi pitive chekeu kumllagho ke, hiye atughushi Sinai Toghi lono achuqupu kumllagho lakhi shi mlla tughiu shike, axo hiye AMPEU lopu shichenike.

⁷Bheriti atughiu gholo atsaiji kumllagho shi akiptialo atsaiji liter lakhi leqhilo.

⁸Avelau ghi inaqheno mllake ghola lono bheriti akiniupe mllalo, tipau gholo ghi atsaiji kumllagho sukuqhalo. Highi achuqupu kumllagho lakhi, AMPEU lopu shichekeu xo lakhike.

⁹Sabat tsala loye bheriti atsu tukutiye kuhakeu ampe lakhikhi shivekeu kini pesu mllalo eno tipa gholo asho mukhu kilogram kini oliv teli pesu kunukeu athi kumllagho ngo atsaiji kumllagho ishi tsulo.

¹⁰Pitipe mllakeu gho hipauye Sabat atsu-tsulo mllalo tiye tsalakipe kumllagho gholo atsaiji kumllagho tsuchekeu nguno alauke.

¹¹Aqhi bothulo AMPEU lau akiptigho lakhi tsulo: amshitsu alhothe kini, bheriti atsu ampe lakhikhi shive keu tsuni, hipaqo kumtsu tukutiye kuhakeu shipelo.

¹²Athi kumllagho lakhiye asho mukhu oliv telino kunuve keu pesu mllalo: Amshitsu lakhikhi gholo asho mukhu kilogram kuthu, bheritsu lakhi gholo kilogram kini,

¹³bheriti lakhikhi gholo kilogram lakhi ishilo. Akipti kumllagho hipauye achuqupu kumllagho ke, AMPEU lopu shikeu xo lakhike.

¹⁴Atsaiji kumllagho aqhemi shimasakeu ye amshitsu lakhikhi ghenguno atsaiji liter kini, bheritsu lakhi gholo liter lakhi no tuxa eno bheriti lakhi gholo liter lakhi shilo. Hiye ampe kupujulo aqhi lakhilo atsala atughiu lo akipti kumllagho shinikeu bekutha yeh shitsu ani.

¹⁵Tsalakipetsulo akipti kumllagho gholo atsaiji kumllagho shikeu nguno alau anetsu lakhi pesu axine kumllagho shi mllalo.

¹⁶AMPEU gihu keushi Hechekulu Tiqhetini shikeu ye aqhi atughiulo atsala chighi abidiu lono ikhilulo.

¹⁷Chighi apunguni no tiqhetini chine huthu no atsala tsuni kutolo shilo, tipa ghulokilo kholaqhi sumokeu sho likhi chulo.

¹⁸Tiqhetini tsala atughiulo nonguye mllanike kumqolo eno akumla kiumu shikevilo.

¹⁹Akipti kumllagho lakhi pesu achuqupu kumllagho lakhi shi ghi AMPEU lau mllalo, tiye amshitsu alhothe kini, bheritsu lakhi eno bheriti atsu ampe lakhikhi shi akeu tsuni tsulo, tipaqo kumtsu tukutiye kuhakeu shimasa.

²⁰Athi kumllagho ghi asho mukhu oliv teli pe kunuve keu pututa qhemi shi mllalo: amshitsu lakhikhi gholo kilogram kuthu, bheritsu gholo kilogram kini,

²¹eno bheriti lakhikhi gholo kilogram lakhi ishi tsulo.

²²Anetsu lakhi pesu axine kumllagho ghi mllalo eno hipau ghola lono timiqo ghenguno muqhamiqhiyi keu chine shitsulo.

²³Akipti kumllagho inaqhe atsu-tsu shichekeu nguno alau hipaqo pesu mllalo.

²⁴Tipaphi shi,achuqupu kumllagho qo atsala tsuni ghenguno AMPEU lau mllalo, pa lau alokiqipu xo lakhike. Tsalakipetsu lo akipti kumllagho ngo atsaiji kumllagho tsuche keu nguno alau hipau mllalo.

²⁵Atsala akutsuniu lo kuho mllanike kumqolo eno akumla kiumu shikevilo.

²⁶Ghile tiqhetini tsala atughiulo kughou nonguno athi kithe pesu akumllagho shi AMPEU lau tsunikeno, nonguye akumlla hoho shinike kumqolo eno kiu kumla mu shikevilo.

²⁷Tsungquikeu xo lakhi AMPEU lopu shi tsunike akumllagho lakhi pesu tsulo: amshitsu alhothe kini, bheritsu lakhi eno bheriti atsu ampe lakhi shivekeu tsuni pesu tsulo, tipaqo lakhimu tukutiye kuhakeu shilo.

²⁸Asho mukhu oliv telino kunuve keu athi kumllagho tipau qhemi pesu mllalo: amshitsu lakhikhi gholo asho kukunu kilogram kuthu, bheritsu lakhi gholo kilogram kini,

²⁹eno bheriti lakhikhi gholo kilogram lakhi tsulo.

³⁰Anetsu lakhi ghi axine kumllagho lakhi shi ghi mllalo eno hitoi shikeu lono timiqo ghenguno shikimthe keu chine shilo.

³¹Hipaqo kumllagho ngo atsaiji kumllagho pesu tsalakipetsu lo akipti kumllagho eno athi kumllagho tsuche keu nguno alau vebeghi mllalo.