Read Sumi Naga AKIKIHI 29 Bible Online

AKIKIHI 29 - Sumi Naga bible

AKIKIHI 29

¹Aqhi akutsuniulo atsala atughiulo nonguye akumlla hoho shinike kumqolo eno kiu kumla mu shikevilo. Tipa tsalani ye afukoqo kuighalo.

²AMPEU lau akipti kumllagho lakhi pa lopu shicheku xo shipenike hipaqo tsulo: amshitsu alhothe lakhi, bheritsu lakhi, bheriti ampe lakhi shi akeu tsuni tsulo, hipaqoye tukutiye kuhakeu shimasake.

³Asho mukhu oliv telino kunuve keu pesu athi kumllagho shi pututa qhemi lono hitoi tsulo: amshitsu gholo asho kukunu kilogram kuthu, bheritsu gholo kiloram kini eno

⁴bheriti lakhikhi gholo kilogram lakhi ishi tsulo.

⁵Anetsu lakhi ghi pesu axine kumllagho lakhi shi mllalo eno hitoi shipuzu timiqo ghenguno shikimtheve keu chine shilo.

⁶Aqhi aqhilo atsala atughiulo akipti kumllagho gholo athi kumllagho ngo atsaiji kumllagho tsuche keu nguno alau vebeghi hipaqo pesu mllalo. achuqupu kumllagho hipaqoye AMPEU lopu shiche keu xo lakhike.

⁷Aqhi akutsuniu atsala achighiu lo akumlla hoho shinike kumqolo; achuqupu kiumu chukevi eno akumla kiumu mlakevilo.

⁸AMPEU lau akipti kumllagho lakhi tsulo, tiye pa lopu shichekeu xo lakhike: amshitsu alhothe lakhi, bheritsu lakhi eno ampe lakhi shivekeu bheriti atsu tsuni tsulo, hipaqo kumtsu tukutiye kuhakeu shilo.

⁹Asho mukhu oliv telino kunuve keu pesu pututa qhemi lono athi kumllagho mllalo: amshitsu gholo asho mukhu kilogram kuthu, bheritsu gholo kilogram kini,

¹⁰bheriti lakhikhi gholo kilogram lakhikhi tsulo.

¹¹Tipaqo gholo axine kumllagho lakhi shi anetsu lakhi ghi mllalo tiye timiqo ghenguno shikimthe keu chine shikeulo anetsu pesu mllakeu eno tsalakipetsu akipti kumllagho gholo athi kumllagho ngo atsaiji kumllagho tsuchekeu nguno alau vebeghi tsulo.

¹²Aqhi akutsuniu atsala chighi apunguulo akumlla hoho shikepushi kumqolo. Atsala tsuni kutolo AMPEU gihukeu shi tiqhetini hipau pinyilo eno kiu kumla mu mlakevilo.

¹³Atsala atughiulo AMPEU lopu shichekeu xo lakhi shipenike achuqupu kumllagho lakhi pesu mllalo: amshitsu alhothe chighi kuthu, bheritsu kini, ampe lakhikhi shi akeu bheriti atsu chighibidi, panongu lakhi mu tukutiye kuhakeu shimasake.

¹⁴Asho mukhu oliv telino kunuvekeu athi kumllagho pututa qhemi lono pesu mllalo: amshitsu lakhikhi gholo asho mukhu kilogram kuthu, bheritsu lakhikhi gholo kilogram kini,

¹⁵eno bheriti lakhikhi gholo kilogram lakhikhi atsaiji kumllagho tsukepu shi akeu gholono tsulo.

¹⁶Anetsu lakhi pesu axine kumllagho ghi lakhi tsulo. Hipaqoye tsalakipetsulo akipti kumllagho gholo athi kumllagho ngo atsaiji kumllagho tsuchekeu nguno alau vebeghi pesu mllalo.

¹⁷Atsala akiniulo amshitsu alhothe chighikini, bheritsu kini eno ampe lakhikhi shi akeu bheriti atsu chighibidi hipaqo kumtsu tukutiye kuhakeu pesu mllalo.

¹⁸Tipaqo gholo atsala atughiulo akumllagho kutau avehupu shikeu kumtsu sukuqhano pesu mllalo.

²⁰Atsala akuthuulo amshitsu alhothe chighiqhaqhi, bheritsu kini eno ampe lakhikhi shivekeu bheriti atsu chighibidi, tipaqo gholo lakhimu tukutiye kuhakeu pesu mllalo.

²¹Tipaqo gholo atsala atughiulo akumllagho kutau sukupha kepu kumtsu sukuqhano pesu mllalo.

²³Atsala abidiulo amshitsu alhothe chighi, bheritsu kini eno ampe lakhikhi shi akeu bheriti atsu chighibidi, tipaqo gholo lakhimu tukutiye kuhakeu pesu mllalo.

²⁴Tipaqo gholo atsala atughiulo akumllagho kutau sukupha kepu kumtsu sukuqhano pesu mllalo.

²⁶Atsala apunguulo amshitsu alhothe toku,bheritsu kini eno ampe lakhikhi shi akeu bheriti atsu chighibidi, tipaqo lakhimu tukutiye kuhakeu pesu mllalo.

²⁷Tipaqo gholo atsala atughiulo akumllagho kutau sukupha kepu kumtsu sukuqhano pesu mllalo.

²⁹Atsala akutsughoulo amshitsu alhothe tache, bheritsu kini eno ampe lakhikhi shi akeu bheriti atsu chighibidi, tipaqo lakhimu tukutiye kuhakeu pesu mllalo.

³⁰Tipaqo gholo atsala atughiulo akumllagho kutau sukupha kepu kumtsu sukuqha pesu mllalo.

³²Atsala akutsuniulo amshitsu alhothe tsuni, bheritsu kini eno ampe lakhikhi shi akeu bheriti atsu chighibidi, tipaqo lakhimu tukutiye kuhakeu pesu mllalo.

³³Tipaqo gholo atsala atughiulo akumllagho kutau sukupha kepu kumtsu sukuqhano pesu mllalo.

³⁵Atsala akutacheu lo akumlla hoho shikepu shi kumqolo eno akumla kiumu shikevilo.

³⁶AMPEU lau akipti kumllagho lakhi achuqupu kumllagho shi ghi mllalo, tiye pano aloqi chekeu xo lakhike: amshitsu alhothe lakhi, bheritsu lakhi, ampe lakhikhi shi akeu bheriti atsu tsuni, tipaqo lakhi mu tukutiye kuhakeu pesu mllalo.

³⁷Tipaqo gholo ti atsala atughiulo akumllagho kutau sukuphakepu kumtsu sukuqhano pesu mllalo.

³⁹Pekithiyeh hipaqoye now kihithapua tsukeu tiqhetini lo nonguno AMPEU lau akipti kumllagho, athi kumllagho, atsaiji kumllagho eno kuposhukulu kumllagho shipenike ghenguno ke. Hipaqoye nonguno ashoqhi shikupulu keu kumllagho tsukeu momu puloniqhiyi tsukeu kumllagho nguno alau vebeghi tsukeu ke.

⁴⁰Tighenguno Muse no Israilmi vilo AMPEU no pa vilo ahza tsukeu thwokha kumtsu pesu pivetsuke.