Read Sumi Naga AKIKIHI 30 Bible Online

AKIKIHI 30 - Sumi Naga bible

AKIKIHI 30

¹Muse no akukutsu tsa hipaqo pesu Israil lo alaghalo sakiphemi tsuke.

²Kughou timi lakhino AMPEU lau kiuala tsunikeu shi bekutha shoqhi shini momu kiuala launo bumono aghinikeu shoqhi shiveni keno paye tipau kubove kepu kumoe, ikemu pano kiu shinipi pipuani keno tipau thwokha shikupuve masake.

³Ilimi alhothe lakhino lipuno kilo apulaghi AMPEU lau kiuala tsunikeu shi bekutha shoqhi lakhi shini kelo momu kiuala launo suchilepe aghinikeu shoqhi shiveni keno

⁴liye lino bekutha shoqhi shikeu momu piqhivekeu thwokha shimasake, tiye papuno tipau chilukelo mopimo kepu shi aghiaye.

⁵Ikemu li puno chilukeu lo pano lipelo ashoqhi tipau shikupuni keu lakha aye liye tipau pekupu masake kumoe. AMPEU no li shou akipimi betsumove nani kughengu li puno li pelo tipau shipenikeu lakhave ake.

⁶Ilimi lakhino puthaputsano momu jukuto kughomono kiuala launo suchilepe aghinikeu shi bekutha shoqhi lakhi shiveni eno kulakupu shive aye,

⁷liye lino bekutha shoqhi shivekeu momu piqhivekeu thwokha shimasake, li kimi no ti chilukelo kiumu lakhakeu shi aghimo aye tipau shilo.

⁸Ikemu likimino tipau vehu chilupuzu li pelo ashoqhi tipau shikupunikeu lakha aye liye tipau pekupu masake kumoe. AMPEU no li shou akipimi betsumo nanike.

⁹Chimemi momu ashoilevekemi totimi lakhiye lino ashoqhi shikeu kumtsu pemasa eno lino kiuala suchilepe aghikeu shoqhi shikeu kumtsu pelumasake.

¹⁰Kulauvekemi totimi lakhino kiuala suchilepe aghinikeu shoqhi shi aye,

¹¹lino bekutha shoqhi momu piqhive keu thwokha shimasake, tipau vehu li kimino chilukeulo pano kiumu lakhamo aye.

¹²Ikemu li kimino tipau vehu chilu puzu li pelo tipau shikupu pemonikeu shi pano lakha aye liye tipau pekupu masake kumoe. Li kimino li pelo tipau pekupu pemo nikeu shi lakhaveke ghenguno AMPEU ye li kipimi shitsumo nani.

¹³Lino bekutha shoqhi shikeu momu kiuala piqhivekeulo li kimino alepinikeu momu hexavetsunikeu chipiu anike.

¹⁴Ikemu li kimi no lino bekutha shoqhi shikeu vehu chilukeu tsala lo kiumu lakhakeu shimo aye liye ashoqhi shivekeu momu piqhivekeu thwokha kumtsu shimasake. Li kimi ye pano tipau chiluke tsala lo lakhamove keu huno ashoqhi shivekeulo pulosu betsukeu shive ake.

¹⁵Ikemu hithiu pano ashoqhi tipau hexa aye paye ashoqhi pekupu mlaveno ikiqivekeu makho ghenguno ime masake.

¹⁶Kulau mphikemi totimi lakhino lipu nokilo a-ghi momu kulauvekemi totimi lakhino bekutha shoqhi shikeulo peitha kepu yeh hipaqo AMPEU no Muse tsukeu ke.