Read Sumi Naga AKIKIHI 31 Bible Online

AKIKIHI 31 - Sumi Naga bible

AKIKIHI 31

²“Mediyami ghimeqhilo, kughengu panonguno Israilmi shou akumou shike. Nono tipau shike thiuno noye thilu nanike.”

³Tighenguno Muse no timiqo vilo pike, “Aghu shinike kutolo, tishianguno nonguye Mediyami ghimeqhi kepushi, tiye panoqono AMPEU lau kiu shikeno tipau ghenguno ke.

⁴Alagha lakhikhi lono aghushilo kiptimi 1,000 khi puwulo.”

⁵Tighenguno alagha lakhikhi lono kiptimi 1,000 khi kishelu, kelo kiptimi kumtsu 12,000 aghushi ghenguno hekutsulu.

⁶Eleazar nu achineu Fineha zahkutsu qholono Muse no aghushilo panoqo puwuke, Eleazar no amchi shi piyenike ghenguno akimthe nhemgha ngo afuko jukukutsuu shiluve.

⁷AMPEU no Muse vilo ahza tsukeu toi panonguno Mediyami lethuve eno kiptimi kumtsu pithikhave tsu,

⁸tipaqo gholo Mediyami kukami pungu ghi pithive tsu: Evi, Rekem, Zur, Hur eno Reba. Panonguno Beor nu Balam ghi pithivetsu.

⁹Israilmino Mediyami totimi ngo ititunuqo kughaluve, pano mishi ngo bheri lojiqo luvetsu eno panowu kinikulu kumtsu xule puwuve

¹⁰eno panoqo phughi ngo aghazu kumtsu pitivetsu.

¹¹Panonguno aghushi lono xulelukeu, akughumi ngo lhoxu kumtsu sasu wuve,

¹²tipaqoye Muse ngo Eleazar eno Israilmi qoaho lau saghi, panonguye Jerikho lono Jordan katha ikukelo Muab ghakhuqa akeulo aghazu shipesu ake.

¹³Muse ngo Eleazar eno aqoaho sakiphemi kutami kumtsuno aghazu lono khalau ipeghi no ghushimi sasu kusholu.

¹⁴Muse ye kijemi ngo amqo lo ahzakutsumi ngo aloji lo ahzakutsumi aghu shiwu puzu ideighikemi shou amlo ideve.

¹⁵Panongu vilo pano iniju, “Nonguye kushiye totimiye kumtsu puxupe puani kya?

¹⁶Totimino Balam kukutsu pape wuve no Peor lo timiqo pelo AMPEU lau amikucho kumo shivepe kepi kumsu mla kesha? Tino AMPEU wu timiqo shou pusa kusu sughike.

¹⁷Tighenguno khijehino kipti toti axine shivea keno kiptimi na totimi namu kumtsu itehino ghiqhivelo.

¹⁸Ikemu ilimi khunoqono atathe aphikeno nolikhi nosala ghenguno puxupe qhilo.

¹⁹Itehi nongu khunoqono timi ghiqhivea momu akithi kumo dive akeno tipaqoye kumtsu aghazu nguno khalau atsala tsuni ngo masake. Atsala akuthunilo ngo atsala akutsuniu lo nongu eno nonguno kugha saghikeu totimiqo shikimthevelo.

²⁰Nonguye aphimini tachu kumtsu eno ashiyiko nhemgha kumtsu, ane mhi momu amhi jeli ghi kumtsu shikimtheve masake.”

²¹Timi aghushi lono ideighikemi vilo Eleazar achineu no pi, “Pekithiyeh hipaqoye AMPEU no Muse tsuke.

²²Pitimla kepunhemgha jeli: shunayi, tsandi, alazayi, ayi, tinyi momu shisayi hipaqoye amilo piti no thakitheve masake. Kutau nhemghaqoye shikimthe chekeu zu pesu qhukimthe velo.

²³

²⁴Atsala akutsuniulo nongu phimini ishivelo; tithiuno nonguye achine lono mithelu nani eno aghazu bocholo ilolupe nani.”

²⁵AMPEU no Muse vilo pi,

²⁶“No eno Eleazar okujono aqoaholo sakiphemi kutami kumtsa aghu lono lepughi keqo akughumi ngo lhoxu kumtsu kihilo.

²⁷Lepughi keqo amqo kini aqhemi shi kijelo, amqo lakhino aqoaho kutami sala shilo.

²⁸Aghushimi sala lono AMPEU ghenguno asuqha ikhitha lulo, tiye akughumi 500 lo milakhi lulo eno amshi, gadaha, bheri eno aneqo ghi titoi kihitha lulo.

²⁹Tipaqo pesu AMPEU lau akimchi gho shi achineu Eleazar tsulo.

³⁰Timiqo sala shikeu lono akughumi lhopungu dolo lakhi lulo eno amshi, gadaha eno bheri aneqo ghi titoi ikhitha lulo. Tipaqo pesu AMPEU wu Aphiki jukuto chekemi Levimi tsulo.”

³¹AMPEU no ahza kiu tsukeno Muse ngo Eleazar pamano shitsuke.

³²Aghushimi no lepughi keu hitoi kihilu. hiye panonguno pano sala kiu qhiluve keno tipau nguno kutauke: bheri ngo ane 675,000; amshi 72,000; gadaha 61,000; eno ilimi atathe 32,000.

³³

³⁴

³⁵

³⁶Aghushimi saje tuxaye bheri ngo aneno 337,500 ke eno tipa gholo 675 no AMPEU suqhashike; aghushimi ghenguno amshi 36,000 kelo Ampeu ghenguno asuqha luve keuye lhotsunikini ke; ghushimi sajeye gadahano 30,500 kelo AMPEU ghenguno asuqha luve keuno lhotsugho lakhike; eno ghushimi ghenguno ilimi atathe 16,000 shikeulo AMPEU ghenguno asuqha luvekeuno shighikini ke.

³⁷

³⁸

³⁹

⁴⁰

⁴¹AMPEU no ahza tsuve ketoi Muse no asuqha hipau pesu akimchi gho lakhi shi AMPEU lau tsupenike Eleazar tsuve.

⁴²Aqoaho sajeye aghushimi saje sasu aqhemike: bheri ngo aneno 337,500; amshi no 36,000; gadaha no 30,500 eno ilimi atatheno 16,000.

⁴³

⁴⁴

⁴⁵

⁴⁶

⁴⁷Asaje hipau lono Muse no akughumi ngo lhoxuqo lhopungu lo lakhikhi ikhitha pesu AMPEU Phiki jukuto chekemi Levimi tsuke tiye AMPEU no ahza tsuve ketoi shike.

⁴⁸Tileno kijemi khunonguno ghushimi shou ahzakutsumi shikeqono Muse lau wupuzu

⁴⁹ishipithive, “Akijeu, ninguno ghushimi khijehi ni zahkutsu qholo akeno tipaqo kihijuke timi lakhimu puhapighi keu kuhae.

⁵⁰Tighenguno ningu milakhikhi no lupuakeu shuna chila, aukukha, apukhu kukha, anguthi, akini kighiyi eno akuo lo chi pesu ighi anie. Ninguno hipaqo pesu AMPEU lau nikuxu me lochile keu shi mlla ani tishianguno pano nikuxu susho tsunanike,”

⁵¹Muse ngo Eleazar pamano shunayi kumtsu ikhilutsu tipaqoye achi nanuke.

⁵²Kijemino qhapesu tsukeu pekutsujukelo kilogram 200 kutolo aghike.

⁵³Khunono kijemi kumokeno panonguye aghushi lono lepuighikeu pututano qhiluveke.

⁵⁴Ike Muse ngo Eleazar pamano shuna pesu Aphiki lo wuve tishianguno AMPEU pelo Israilmi susholu apeniyeke.