Read Sumi Naga AKIKIHI 32 Bible Online

AKIKIHI 32 - Sumi Naga bible

AKIKIHI 32

¹Ruben ngo Gad laghaye amshi loji kumzapu ake. Jazer ngo Gilead ghakhuye amshi ghenguno alokepu shi aghikeu panonguno ithulukeulo

²panonguno Muse ngo Eleazar eno aqoaho lo sakiphemi kutami lau wuno pi,

³“AMPEU no Israilmi kuphu no qhasulupe keu ghakhu hipaqo : Atarot, Dibon,Jazer, Heshbon, Nimra,Eleale, Sibma,Nebo eno Beon taun hipaqoye amshi loji ghenguno ayeghi kivike eno ninguye amshi loji kutomo anie.

⁵Kishimo ake ayeghi hipau nimheghi shi ghi ni tsuvelo eno ningu pelo Jordan katha ikuno tilau ngo nikeu shipe kevilo.”

⁶Muse no khochile pi, “Nokusami Israilmi no aghushi lo wu akelo nonguye hilau ngo anishiani kesha?

⁷Nonguye kushiye Israilmi no Jordan katha iku AMPEU no panongu tsu akeu yeghilo wunikeu aghuthi suvetsu ani kya?

⁸Nongu papunoqo ghi ino Kades Barnea lono panoqo pelo ayeghi xujuwu peniye puwu keulo titoi shiveke.

⁹Panonguye Eskol Khila kutolo wuno ayeghi ithuluve ikemu panonguno ide ighikelo AMPEU no panoqo tsu akeu yeghilo ilopemoni ye timiqo mlo shipsa ve tsuke.

¹⁰Tipa tsalalo AMPEU ye agha ideve eno ishi tushoqhive:

¹¹‘Ino tushoqhi ani ke panonguno ilau aghokulu shi moke ghenguno panongu kiptimi ampe muku shi akemi eno tinguno kichimi shivekeqo khije Ijip lono ipeghi keno tipaqo thaqhuye milakhimu ino Abraham, Isak eno Jakob lau piqhi puakeu yeghilo ilomla nanike.’

¹²Jefune nu Kaleb, ti Kenizimi eno Nun nu Joshua pama thono kutami kumtsu sukuqhake; pamaye AMPEU lau aghokulu shike.

¹³AMPEU ye timiqo shou agha ideve no panoqo pelo asayeqhalo ampe lhobidi iqho iqi auvepe tiye pa lopu shimokemi tiqheli kuchopu thikhave moke kutolo tishike.

¹⁴Itehi nongu ye nopu asuqo toi shi auvae, itaghi Israilmi shou AMPEU loghu ide ikughi penikemi axine shichekemi tiqheli akitheuqoke.

¹⁵Itehi nongu Ruben ngo Gad laghami no pa papenikeulo mopi auve aye pano itaghi timi hipaqo kumtsu asayeqhalo kughucho qhive nani eno panoqo pughave keu ye nongu makho shive nanike.”

¹⁶Panonguno Muse lau ighi no pi, “Atughushi ningu pelo bheri loji ghenguno atu pesu bokutha shivepe eno ni pukhupe xu akeqo ghenguno taunqo lo aliwo putukhave paghi pelo.

¹⁷Tithiuye ninguno kutokughoi pesu nikusami Israilmi gholo aghushilo wunike eno lewu keulo nino saphenike, tiye panowu shiniye akeu yeghilo panoqo pelo kughuna luvemoke kutolo tishinike. Tishi ake ghulokilo, ni pukhupe xuchekemi ye hilau aliwo putusuve keu taun lo xulu ananike eno hipa ghakhulo kuami launo puxu lunanike.

¹⁸Israilmi kutami kumtsuno panoqo saje shi ayeghi kotha puatsu keu lulumoke kutolo ninguye ni ghakhulo idewomoke.

¹⁹Jordan tuxau ninguye panoqo gholo kiu mheghi pinamu ighitsu moke, kughengu Jordan kipela hilau ninguye nisaje ithuluve ake.”

²⁰Muse no khochile pi, “Nonguno kuchouno pi aghiaye, hilau AMPEU achekeu a lono aghushinike kutokughoi shilo.

²¹Nongu gholo aghushini kemi kiptimiqoye Jordan kathasu wulo eno AMPEU zahkutsu lono panonguno ni ghumiqo lehalo, AMPEU no panoqo shou toluve no

²²ayeghi lelumoke kutolo shilo. Tithiuno nonguno idewolu nani kughengu nonguye AMPEU lau eno nokusami Israilmi ghenguno shitsu kepushi akeu shikupulu niake. Tithiuno Jordan kipelau akeu yeghi hipauye nongu wu kepi AMPEU no ithitsu nanike.

²³Ikemu nonguye nonguno piqhive keu pelumo aye AMPEU shou axine shi aniputsa kepi ino nongu kutughuve ani. Hipau vehulo shipimi kevilo; nongu xine ghenguno aghime tsunanike.

²⁴Tighenguno nowu taun shilulo eno nowu putulu lo, ikemu nonguno kiu piqhive akeno nonguye ti shi masake!”

²⁵Gad ngo Ruben laghami no pi, “Akijeu, nono ahza tsukeu toi ninguno shinike.

²⁶Ningu nipu anuli eno amshi ngo bheri loji ye hikudau Gilead taun lo anani.

²⁷Ikemu ningu kumtsu ghano AMPEU zahkutsu qholono aghu shiwunike kutokugho pe anie. Nono pive ketoi ninguno Jordan puthasu wuno aghu shinike.”

²⁸Tighenguno Muse no Eleazar ngo Joshua eno Israilmi sakiphemi kutamiqo vilo ahza hipau tsuke:

²⁹“Gad ngo Ruben laghamino AMPEU zahkutsulo kuto pesu aghushinike Jordan puthasu wuaye eno panoqo kukuphu lono nonguno ayeghi leluveaye tileno Gilead ghakhu pesu panoqo mheghi shitsulo.

³⁰Ikemu panonguno Jordan katha puzu nongu sasu aghukishilo wumo aye panonguye nonguno shiketoi panoqo mheghi ye Kanan yeghi lono ithulupe keu shilo.”

³¹Gad ngo Ruben laghami no khochile pi, “Akijeu, ninguye AMPEU no ahza tsukeu toi shinike.

³²Pano ahza tsukeu qholono ninguno Kanan yeghi katha ilonike eno aghu shiwunike, tishi anguno ninguno Jordan kipela hilau nimheghi ighilunike.”

³³Tighenguno Muse no Gad ngo Ruben laghami eno Manase lagha tuxami lau Amarimi kukau Sihon ghakhu ngo Og lo kukau Bashan ghakhu eno tipaqolo akeu taun ngo tipaqo sumxape aluza ake qha kumtsu kophe tsuke.

³⁴Gad laghamino aliwo putukhasu keu taun hipaqo shikithelu: Dibon, Atarot, Aroer,

³⁵Atrot, Shofan, Jazer, Jogbeha,

³⁶Bet Nimro eno Bet Haran.

³⁷Ruben laghamino taun hipaqo shikithelu: Heshbon, Eleale, Kiriathaim,

³⁸Nebo, Bal Meon (aje hipauye kilive ake) eno Sibma. Panonguno shikitheve keu taun ye aje kithe kuvetsu ke.

³⁹Manase nu Makhir limino Gilead ghakhu leluveno tipaulo ngoluveno Amarimi tilehi aghikeqo hapupove.

⁴⁰Tighenguno Muse no Gilead pesu Makhir limi tsuve eno panonguno tilehi kughunauve.

⁴¹Manase laghami Jair no lewu puzu aphu hami khasupe leluve eno tipaqo pesu “Jair Phuqo” ipi kuvetsu.

⁴²Noba no lewu no Kenat ngo tilau aphu akeqo khasupe leluve eno pano tipau pesu pa je lono Noba kukitheve.