Read Sumi Naga AKIKIHI 33 Bible Online

AKIKIHI 33 - Sumi Naga bible

AKIKIHI 33

¹Yepe qhikeu hipau lono Israilmino Ijip qhive kethiu a-a khipaqolo aghazu Shipe ngokeno tipaqo je tsu ani, tiye panongu laghaqo shou Muse ngo Aron pamano sakipheu shikeu qholonoke.

²AMPEU no ahza tsukeulo Israilmino aghazu shipe qhiluke kumtsulo Muse no tipaqo je yepe qhike.

³Israilmino ampelo aqhi atughiu atsala chighi apunguu lono Ijip qhiveke, Hechekulu atughiu shiwo thoghiuno ke. AMPEU sukusho qholono Ijipmi no thebeyi juapulaghi panonguno Ramese phughi lono cheve.

⁴Tilehi Ijipmino AMPEU no heqhi pithive tsukeqo anu anoghimi kumo shiqho ake. AMPEU no hipau shikeu lono paye Ijip lhouqo nguno shishe akuka akeu kepi piyeke.

⁵Israilmino Ramese lono cheve puzu Sukot lo aphiki ghazu shilu.

⁶Tipashelo panoqo phiki ghazu ye asayeqha kighije Etham lo shilu.

⁷Tileno panonguye Bal Zefon lo kipelau Pi Hahirot lo xatsughu ighi eno Migdol phivilo aphiki ghazu shilu.

⁸Panonguno Pi Hahirot lono cheve puzu Akuhu Zughi hechesu Shur Sayeqha lo wu; atsala kuthu cheche puzu panonguno Mara lo aphiki ghazu shilu.

⁹Tilauno panonguno Elim lo wuno aphiki ghazu shilu, kughengu tilehi azupuki chighikini eno amsabo lhotsuni ake.

¹⁰Panonguno Elim qhive puzu Suez lo Azucheku phivilo aphiki ghazu shilu.

¹¹Tipashelo panonguno aphiki ghazu shikeuye Sin sayeqha loke.

¹²Tipathiu panonguno Dofka lo aphiki ghazu shilu.

¹³eno tipashelo Alus lo shilu.

¹⁴Tipashelono Refidim lo, tilau panoqoye yekepu zu kuhaveke.

¹⁵Refidim lono Hor Toghi kutolo panonguno a-a hipaqolo aphiki ghazu shiluke: Sinai Sayeqha, Kibrot Hatave ( momu “Minekutu Kumoki” ), Hazerot, Rithma, Rimon Perez, Libna, Risa, Kehelatha, Shefer Toghi, Harada, Makhelot, Tahat, Tera, Mithka, Hashmona, Moserot, Bene Jakan, Hor Hagidgad, Jotbatha, Abrona, Eziongeber, Zin Sayeqha (tiye Kades ke) eno Edom ghakhu kighije lo Hor Toghi.

³⁸AMPEU zahkutsu lono achineu Aron no Hor Toghilo iku. Paye apunu mpe 123 shi akelo tilauno thive, tiye Israilmino Ijip qhivekeu mpe lhobidi shi akelo aqhi apunguu atsala atughiu lono ke.

⁴⁰Kanan apeu akukau shi akeu Arad no Israilmi chekeu sutsa chilu.

⁴¹Hor Toghi lono Muab ghakhuqa kutolo Israilmino a-a hipaqolo aphiki ghazu shike: Zalmona, Punon, Obot, Muab ghakhulo Abarim ixale akeulo, Dibon Gad, Almon Diblathaim, Nebo Toghi phivilo Abarim Toghilo, eno Jerikho kudauno Jordan kathasu ikukelo hukukuu Muab ghakhuqalo eno Beth Jeshimot ngo Akasia Khila kuma dolo shike.

⁵⁰Jerikho kudauno Jordan kathakelo hikukuu Muab ghakhuqa akeulo AMPEU no Muse vilo

⁵¹akukutsu tsa hipaqo pesu tsuke:”Kughou nonguno Jordan kathasu Kanan lo ilonikeno

⁵²nonguye tipa yeghilo kughuna aghikemi kumtsu hapupove masake. Panoqow atu ngo ayino shikeu ajulho kumtsu kubolevetsulo eno panoqono kuhono mllachekeu-a kumtsu kutsalevelo.

⁵³Aghakhu tipaulo ngoluvelo eno qhasupe ngoluvelo, kughengu ino tipau pesu nongu tsu anike.

⁵⁴Alagha eno alimi jeli dolo asaqhibe puzu ayeghi kijethalo eno alagha kutomoqo lau amheghi yeghi aqha kije tsulo eno alagha aghulo lau amheghi yeghi aghulo tsulo.

⁵⁵Ikemu nonguno ayeghi tipaulo kughuna aghikemi hapupovemo aye tile ngovekemi no nongu nhethilo amuchhu akeshi eno nojibolo asahu akeshi nongu punaqhi nanike eno panonguno nongu sasu aghu shinani.

⁵⁶Nonguno panoqo hapupovemo aye ino panoqo hapuponike pughuchho keshi ino nongu kutsaleve nanike.”