Read Sumi Naga AKIKIHI 34 Bible Online

AKIKIHI 34 - Sumi Naga bible

AKIKIHI 34

¹AMPEU no Muse lau

²Israilmi tsupenike akukutsu tsa hipaqo tsu: Ino nongu tsu akeu yeghilo nonguno kughono iloluvenikeno noghakhu lughiye hitoi shinanike.

³Apeu lughiye Zin Sayeqha lono huthu puzu Edom lughi phe zususu shimasake. Tiye apeu kudau Amti Zughi mtsu lono huthu keu shinani.

⁴Tithiu tiye apeu Akrabin Kitala kudau hotsughusu Zin vechesu apeu Kades Barnea kuto shinani. Tithiuye Zin huu kulola kudau Hazar Adar kutolo xasusu Azmon kuto shini,

⁵tilauno hosusu Ijip lughilo akhila kudau shini eno Mediteriya Zughi lono ashekha shini.

⁶“Kulola lughiye Mediteriya Zughi no shini.

⁷Ahuu ye Mediteriya lono vejoi ghuphiyi Hor Toghi kuto

⁸eno tileno Hamat kuto. Tiye Zedad kutolo tishi woni

⁹eno Zifron kutolo eno Hazar Enan lono ashekha shini.

¹⁰“Kipela lughiye Hazar Enan lono vejoi Shefam kuto.

¹¹Tithiuno apeu Harbel kutolo anani, tiye Ain kipelau anike eno tileno Galil Zukucho kipela mukulo naghuto ake kuto,

¹²tileno Jordan xasusu Amti Zughi kuto shinike. Hipaqono noyeghi lughike.”

¹³Tighenguno Muse no Israilmi vilo pi, “Nonguye asaqhibe no ayeghi hipau nowu shilu nani, hiye AMPEU no alagha tokuno tuxa ghenguno kophetsu keu yeghike.

¹⁴Ruben ngo Gad lagha eno Manase lagha tuxaye panoqo kibo kiqi lono kijethano panoqo mheghi ithuluve ake,

¹⁵tiye Jordan kipela kudau Jerikho ghungu lo akeuke.”

¹⁶AMPEU no Muse vilo pi,

¹⁷“Achineu Eleazar ngo Nun nu Joshua pamano timiqo ghenguno ayeghi kijetsu pelo.

¹⁸Alagha lakhikhi lo sakiphemi lakhikhi lupuzu ayeghi kijetha keulo pama kuphu kepu shilo.”

¹⁹AMPEU no timi hipaqo kishetsu: [Alagha] — [Sakiphemi] Juda — Jefune nu Kaleb Simon — Amihud nu Shelumiel Benjamin — Khislon nu Elidad Dan — Jogli nu Buki Manase — Efod nu Haniel Efraim — Shiptan nu Kemuel Zebulun — Parnak nu Elizafan Isakhar — Azan nu Paltiel Asher — Shelomi nu Ahihud Naftali — Amihud nu Pedahel

²⁹Timi hipaqo pelo AMPEU no Kanan yeghilo Israilmi ghenguno ayeghi mheghi kijetsu penikeu shike.