Read Sumi Naga AKIKIHI 35 Bible Online

AKIKIHI 35 - Sumi Naga bible

AKIKIHI 35

¹Jerikho kudauno Jordan katha ikukelo Muab ghakhuqa lo AMPEU no Muse vilo pi,

²“Israilmi vilo panonguno amheghi ithulukeu lono aphughi hami eno tipaqo sukumxa lo achukumzapu yeghi hami pesu Levimi tsulo pilo.

³Aphughi hipaqoye Levimi wu shinani ke eno panongu ye tilehi kughuna nani. Achukumzapu yeghiye panoqo mishi bheri eno atsuaqu loji kutau kumtsu ghenguno shinanike.

⁴Achukumzapu yeghi ye aphughi nguno khalau akupuwu lono aqha kumtsu miter 450 shi qhitsulo,

⁵tishianguno aphughi ako bidi kujolo ako lakhikhi lo miter 900 shilo eno aphughino amtalo shipelo.

⁶Nonguye Levimi lau itshukulupu phughi tsugho tsulo, timi lakhino kutungulu keu lono timi kutami lakhi pithiveni kelo tilau powulu kepu shilo . Tinguno alau ghi aphughi lhobidi kini gholo

⁷achukumzapu yeghi ghi panoqo tsulo, kuqhakelo aphughi lhobidi tache tsulo.

⁸Alagha lakhi khilo Levimi phughi khije shikepu keno tiye pututa ghakhu khipahi keno tipau kiqi lono kihithalo.”

⁹AMPEU no Muse vilo

¹⁰Israilmi vilo pilo pike: “Kughou nonguno Jordan katha su Kanan yeghilo iloni keno,

¹¹nonguye itshukulupu phughi kishepe qhilo eno timi lakhino kutungulu keu lono khuala pithive aye timi tipau pelo tilau pokulupu shipelo.

¹²Akithiu sholokumi no amkhu luniye phuchekeu tilauno pa susholu nanike. Timi ghiqhivekeu ghenguno timi lakhi nguku kelo aqha gizu lono kughathakeu shimokeloye pa pithi kevilo.

¹³Aphughi tsugho kishelo,

¹⁴kuthuno Kanan yeghilo qhilo.

¹⁵Hipaqono Israilmi pina inami pinamu khunomu ado ikhonhei momu kushuwa panoqo gholo acheni keno tipaqo ghenguno ithsukulupu phughi shilu nanike. Khuukhuu mu kutungukulu lono kutami pithive kelo hipaqo phughi lakhilo powulu nanike.

¹⁶“Tishimu, timi lakhino ayi ngo asu atu no shikeu zuta-angu jeli peithano khuala pithive aye paye timi pithivekeu ngusu shivae eno pa pithivelo.

¹⁹Akithiu sholokumi huno timi heqhi pithive keu mukhu lulu nani. Pano timi tipau sholu kelo pa pithive masake.

²⁰“Timi lakhino kutami khuala jumthi cheni eno pano tipau tukuluqhi puzu pa pithive aye

²¹momu pausu pesu pa heqhive aye, timi tipauye timi pithive keu ngusu shivae eno pa pithive masake. Akithiu sholokumi ye timi heqhi pithive keu shou amkhulu masakeu makho anike. Pano timi tipau sholukelo pa pithive masake.

²²“Ikemu kumsujukelo timi lakhino pano jumthi chemokemi khuala kutungulu keu lono pithive aye,tiye pa tukuluqhi keulo pina momu kiuala pa shou vepuku keu lonomu shi aghiluvi.

²³Momu kumsujukelo jukuto kughomono timi lakhi no atu vepuwu kelono pano ghuzaniye shimokemi khuala pithive eno timi tipauye pa ghumi shi aghimo aye.

²⁴Tikithipu shivekelo aqoahoye timi khuuno kutami pithive keno tipau saphu ghi kughathalo eno akithiu no sholokumi amkhu luniye phu akemi xadaghi kughatha moni.

²⁵Aqoahoye akithiu sholokumi launo timi heqhiveno kuquvekemi xapheluve masake eno panonguye timi tipau sachile sasu itshukulupu phughi khilehi pano powuvekeno tilau kighide puwuve masake. Timi tipauye tipa ghulokilo tilau Achinetou shi aghikeuno thivemoke kutolo tilau xu ache masake.

²⁶Timi heqhi pithive keu huno poilolu keu phughi ti itshukulupu phughi qhiveno wuveni

²⁷eno akithiu sholokumino pa phuluve no pa heqhive aye amkhu lukeu hipauye timi heqhivekeu kuiqu kumoke.

²⁸Timi khuuno timi heqhi pithive keu kuiqu shinikeno paye Achinetou thimoke kutolo itshukulupu phughilo ache masake, ikemu tishive kethiuno pano ghami phulo idewolu nanike.

²⁹Ayeh hipaqoye nonguno khile khile xu aghi mu nongu eno nokughukoqo shou pimhe masake.

³⁰“Timi heqhi pithivekemi lakhi nguku puzu kuquve keu phunikelo thebei ithulukemi kini momu tinguno alauno thopi shikeulo likhino pa pithilu nani, thebei ithulukemi pinamu timi heqhi pithive keu shou nguku keulo timi lakhi no thopi shikeu likhiye luzulake.

³¹Timi heqhive kemiye pithive masake. Paye pisa pesu love puzu pithivenikeu ghimepu hipau lono povemla ke.

³²Timi lakhino itshukulupu phughilo pove aye pano ghami phulo idewoni eno Achinetou thimphi lono papelo love penikeu shipe kepu kumoe.

³³Nonguno tishi aye nonguno kughuna akeu yeghi shipixive nanike. Timi heqhi keuye ayeghi shipixive cheni eno hekiqhimi pithive keulo likhino kumoaye khile timi heqhive keno tipau yeghiye shikimthe lunikeu chinepu alaghi kutau kuha.

³⁴Nonguno ayeghi khilehi kughuna anikeno tipau shipixi kevilo kughengu niye AMPEU ke eno niye Israilmi gholo xu achenike.”