Read Sumi Naga AKIKIHI 36 Bible Online

AKIKIHI 36 - Sumi Naga bible

AKIKIHI 36

¹Gilead lo Mikhir nu eno Josef nu Manase tinuli limi kiboqolo sakiphemi no Muse ngo sakiphemi kutamiqo lau wuno

²pi,”AMPEU no ahza otsu keuno asaqhibe no Israilmi lau ayeghi kijetsulo pike. Pano ahza otsukeu no nisholokumi Zelofehad yeghi mheghi pesu panoqo ghi tsulo pike.

³Ikemu hi kumsululo, panonguno alagha kutami sasu kulakupu shive aye panoqo yeghi mheghi ye tipano laghaw shiveni cheni eno nigholo kuqha ghi tsukeu yeghi ye aghulo likhi shiveni chenike.

⁴Tsuchilevekeu Mpelo, aki alu jepuaghi keu kumtsu puzuu ampiu lau tsuchile ke ghulokilo Zelofehad ngaqo kialu ye panonguno khunoqo sasu kulakupu shini keno tipa lagha kudau alhokupujulo sukupha pe acheuve nanike.”

⁵Tighenguno Muse no AMPEU launo ahza hipaqo pesu Israilmi tsuke. Pano pi, “Manase laghano kiu pikeno tiye achipike,

⁶tighenguno AMPEU no pike Zelofehad ngaqo ye panonguno khuukhumu sasu kulakupu shinishi kemi sasu kulawulu nani ikemu tiye pano laghami sasu likhi shilu nanike.

⁷Israilmi mheghiye alagha lakhi lono lakhiulo pekishe wuvepe kepu kumoe. Israilmi lakhikhi mheghiye pano lagha lau tishi ache nanike.

⁸Israilmi laghalo totimi amheghi ighilu kemi milakhi khino pututa laghami lakhi sasu kulawu masake. Hitoi shikeu ghola lono Israilmi lakhikhino pano puasu mheghi ighilu nanike,

⁹eno amheghiye alagha lakhi lono lakhiu lau pekibe wokeu shimo nanike. Alagha lakhi khino pututa mheghi pighi kibe achelu nanike.”

¹⁰Tighenguno Zelofehad ngaqo-Mahla, Tirza, Hogla, Milka eno Noa noqono AMPEU no ahza Muse tsukeu toi shike eno panonguno pano tilingu sasu kulawuveke.

¹²Panonguye Josef nu Manase laghalo alimi sasu kulawuke eno panoqo mheghiye pano laghalo acheuveke.

¹³Ayeh eno pekithiyeh hipaqoye AMPEU no Muse vechewo Israilmi tsuke eno tiye Jerikho kudauno Jordan katha ikukelo Muab ghakhuqa lono tsuke.