Read Sumi Naga AKIKIHI 5 Bible Online

AKIKIHI 5 - Sumi Naga bible

AKIKIHI 5

¹AMPEU no Muse vilo pi,

²“Israilmi vilo, aghazulo timi khikhipaqono ju ichi kepu ayikolo kusu xapu ani momu aphi mpi lono qoipeghi anikeno eno khijehino timi kithikumo dilukeu lono mithemove akeno

³kiptimina totimi namu aghazu khalau haphevelo; tipaqoye aghazu khilehi ino iwu timiqo gholo ngo anikeno tipau shipixi pemonike ahza tsulo.”

⁴Israilmino agholuve eno tipaqo thaqhu aghazu lono haphe khave.

⁵AMPEU no Israilmi ghenguno asutsa hipaqo pesu Muse mijetsu. Kughono khualano AMPEU shou pukhube moveno timi khami shou akumou mlaveni keno,

⁷paye pa xine pipheveno akuchopu lochileve masa, tipau shou aqhe sajelo muku sukuphano timi khuu shou pano pimive keno tipau love masa.

⁸Ikemu timi tipau thive eno lochilekeu nhemgha iyighikemi asholokumi kuhave aye, tipau ye achineu sala shipesu AMPEU tsuvenike zahke. Hi api lokeuye bheritsu heqhino achinelo shikimthe keu nguno alau shimasakeu ke.

⁹Itaghi kiu kiumu Israilmino pakutakeu AMPEU lau qhasuni keno tiye achineu khuu panonguno kishephe keno tipau lau suwo tsunike zah.

¹⁰Achineu lakhikhino timino akumllagho palau sughikeu qhiluveni.

¹¹AMPEU no ahza Muse tsukeuye,

¹²Israilmiqo lau akukutsu tsa hipaqo tsupe niyeke. Timi lakhino kumsu kupsa lono pa nipuye pa qhiveno timi kutami sasu kutuqhaveno shipixi keu shive kehu pulube kulupushi mlano aghiluvi. Ikemu akimiye avehu mutsuqheyi mono aghiluvi, kughengu pa nipuno kusupe puave kehu, tipa tsalo thopimi ghi kuha, eno liye timi sasu kuqha aghike lono kughalumo ishike. Momu lino pulumove kepu kumla shimo amu li kimino li kumsu pusa aghiveluvi.

¹⁵Avehu tikuma kini kujolo timi huye pa nipu sasu achineu lau wulo. Paye thosulo sughikepu zah lono barli thi kukubo kilogram lakhi pewuni, ikemu paye oliv teli tipau lo lepukumoni momu kiu xo kutsungu mu tipau shou sumoni, kughengu tipauye kumsu kupsa kimi launo agho sughi puzu kuchou kemokeno kimchiniye anike.

¹⁶Achineu no atopuu sawo agizulo qhino li pelono akipitia zulo puthugho pelo.

¹⁷Paye akimthe zu hami lepe ayeghili kughulalo sulo eno AMPEU no ngochekeu Phiki ghuza lono ayeghi hami ikhipe azulo sulo.

¹⁸Tithiu pano atopuu sa xukhove tsuni ipuzu asho kukubo kumlla gho suwo puakeu pe li ulo sutsulo. Achineuno musuini sughichekeu zu khumtsaikeu akhu lono pau kumano pelo.

¹⁹Tithiu achineuno atopuu pelo achineu shoqhi tsa hipaulo pulosu penike pipelo: “Nono salha puamoaye azu hipau sughi chekeu ngusuno oshipusamo nani.

²⁰Ikemu nono salha puaghi aye

²¹AMPEU no owu timiqo dolono musuinikeu hipau pesu osala shitsu peni. Papelo ophilo lhoxu lhoaqo sukutsuve peno okive ingu ipeghi peni.

²²Azu hipauno opolo ilono inguuve peni eno ololo alhoa hu sukutsu luve peni.” Topumi huno khochileni,”Ino pulo ani; AMPEU no titoi shipeni.”

²³Tithiu achineuno hipau musuini keu yesuluni eno khumtsaike zu ali kughula lo akeu lono yesu puakeu qhusuvelo.

²⁴Azu khikhino shove kethiu minhe keshi suwuve pecheni keno ti atopuu jemphi lono

²⁵achineuno asho kukubo kumllagho atopuu ulono ikhiluveno shikimthe pe AMPEU tsu puzu tipau pesu akipti-a lo qhilo.

²⁶Tithiu pano asho kukubo au kichhi lakhi eluno akumllagho michi shi ikhiluno akipti-a shouno pitilo. Ashekhalo azu hu atopuu piyevelo.

²⁷Lino salha puaghi aye azuno minhe keuno kukhu kixi shinani; li kive ingu ipeghive nani eno li philo lhoxu lhoa sukutsuve nani. Li je li timiqo gholo musuinikeu asusho kupu lakhi shive nani.

²⁸Ikemu lino akumzuu shi aghiaye shikupsa ithulumo nani eno anuli punu woveni keu shipe nani.

²⁹Hipau zah khileno kiptimi lakhino pa nipu ju munhove eno pa nipuye salhave api kumsu pusave kelono shikeu vehuke. Atopuu pelo akiptia zulo puthugho pemasa eno achineuno hipau chini masake.

³¹Akimi ye akipimi lono kuqhovenia ikemu atopuu huye kuquve aghi aye tipau jeku lono ime masa nanike.