Read Sumi Naga MIKA 2 Bible Online

MIKA 2 - Sumi Naga bible

MIKA 2

¹Khunoqono ihozuno tsukhutsuvai puzu alhoksa kughu cheni keno tipaqo ghenguno ahakusapuke! Inaqhe shivekelo ado ithulu kemtsa panonguno alhoksa kughupuakeu shi cheni.

²Panonguno alu lunishi aye tipaqo suxaluvetsu cheni, panonguno aki lunishi aye tipaqo luve cheni. Khuno kibolomi mu momu tinhemgha pimu akivishi akulupu kuhae.

³Ikehu AMPEU no piani, “Niye nongu shou kutsakungo keu sughini aye kughu pesu anike eno nonguye tipau lono pokawulumo nani. Nonguye akupunalo aghivekeu nonguno ithi nani eno tileno nonguye tsutsungoju alachemove nani, kughengu tiye alhoksa ghuloki shi nanike.

⁴Tipau ghuloki ighiaye, timino nongu ghili pesu kutsakungokeu kichekipiye shi-ghi lhewo nani eno nonguno puju shiju akeu phewo nani. ‘Ninguye qhoi shipsakhavae! AMPEU no niyeghi ikhiluvetsu nikugha sasu akughu shiuvekemi lau tipau tsuvae.’ ”

⁵Tighenguno kughou ayeghi pesu AMPEU wu timiqo tsuchilekepu ghulokilo nongu khuu sajemu kuha nani.

⁶Timiqono ivilo ishi lheke, “Ni kutsukevilo, tikithipu pesu kiumu kutsukevilo. Alhou ye ningu pelo kujomzave peni chemoke.

⁷Israil lo akemiqoye musuinikeu lakhilo ani kepi noye kumsu ani kesha? Kuchouno paye tikithipu shini kesha? Khunoqono achipiu shicheni keno paye tipaqo kupuqhiyi putsa chemo kesha?”

⁸AMPEU no khochile, “Nonguno aghumi toi iwu timi leighike. Timino aghushi lono ideighi eno akiloye iqunei ani kepi kumsu anapiaye nonguno tilauno panoqo mqa lono aphikuzu pukaluveni aye khe aghi cheni.

⁹Nonguno iwu timi, totimi liki kimiye chekeqo hapheve cheni eno pano wu timiqo launo ikukumgha alhokupuju ghenguno pukaluvetsu cheni.

¹⁰Ithulo eno wuvelo, hilauye inaqhoi ngokulupu-a kumoke. Nongu xineno a-a hipau kutsaleve nikeushi kutoveake.”

¹¹“Timi hipaqoye tungkupmi khunoqono akimki ngo pishikiqhino chhitoi xapusu iqho iqi cheni keno tikithipu lunishi cheni. Tungkupuuno ishi picheni, ‘Ino tungkuptsa pitsu anike atsayiji eno akuptsu tsayi jino nongu ghengu qole qolei nani.’ ”

¹²“Ikemu Israil lo akemiqo nongu khije ghupe puaghi nikeno tipaqo kumtsu ino hekutsu kumqo nani bherino bokuthabo lo ideighi keshi ino nongu hekutsu kumqo saghi nani. Aluzaqalo bheri chhitoi akeshi noyeghiye itaghi timi kumzapuno chhitoi kitheve nani.”

¹³Alhou no panoqo ghenguno ala khaqhitsu nani eno halepupokeu lono panoqo saipe nani. Panonguno aphughi kikha vexu ipeveno ililayi wu nani. AMPEU ampino akukau shino panoqo saipe nani.