Read Sumi Naga MIKA 5 Bible Online

MIKA 5 - Sumi Naga bible

MIKA 5

¹Jerusalem lo akemiqo, no-ghukishipu jeli hekutsulo! Ninguye suholuvae! Panonguye ayikusu pesu Israil lo ayehkipeu shou ghapuku anike!

²AMPEU no pi, “O Bethlehem Efrata, noye Juda lo taun aghulou lakhike, ikemu okudauno Israil ghenguno ino ayehkipeu lakhi saghi nani, pa kibolomi iko ighikeuye mulho ghulokilo idewo ani.”

³Tighenguno khuuno punu niye anikeno tipauno anu punu moke kutolo AMPEU no pawu timiqo pano ghumi lau phesuvetsu nani. Tileno pano ghakhu lono halepheve akeqono pano timiqo gholo kumqo kitheluve nani.

⁴Kughou ayehkipeuno ighini keno AMPEU launo ighikeu kumto ngo AMPEU Alhou je kuloghi pesu pano pawu timiqo shou ayehpe nani. Pawu timiqo sushokululo anani kughengu ayeghilo akemi kumtsu paje kuloghi ithikuthulu nani.

⁵Pano alokughuno saghi nani. Kughou Asiriyamino niyeghi leighini eno nino ihjepe akeu kubole ighinikeno, niwu sakiphemi akumtomi puwuno panoqo sasu kumjope nani.

⁶Panoqono aghunanu pesu Asiriya shou ayehpe nani, eno kughou Asiriyamino nighakhu leighi nikeno panonguno tipaqo launo nixalu nani.

⁷Israil lo akemi khunoqo xu aghi luni keno tipaqoye ashiayeh kutomo ghenguno AMPEU no aloponiyi keu tsuzu puwukeu toi nani, panoqoye atsuni thu ipeghi akeulo tsughupuku keu toi nani. Panonguye timi shou kumono Alhou shou pukhube nani.

⁸Ashiayehqo gholo Israilmi ghupe puaghi keqoye abongushu lakhino aghasulo momu achu kumza-alo achuqupu phuche keu toi nani: tipauno bheriqo gholo ilo puzu ilhewo tipaqo tsu cheni, tipaqo suthapinyive cheni eno tilehiye hakho kulupu laju akepu kuhave cheni.

⁹Israil no pa ghumiqo shou toluve puzu panoqo kumtsu kutsaleve nani.

¹⁰AMPEU no pi, “Tipa ghuloki lono ino nowu khurshiqo luvetsu nani eno nowu khurkulu kutsa khavetsu nani.

¹¹Ino noyeghilo aphughiqo kutsavetsu nani eno nonguno susho nike mlapuakeu kumtsu tulevetsu nani.

¹²Nonguno peitha chekeu kuduuqo ino kutsavetsu nani eno nonguye ighinikeu ghili asaqhitsukemi kuhave nani.

¹³Ino nowu asu-atu julho ngo chinichekeu tu tsukuchoqo kutsalevetsu nani; nonguye nolikhi nonguno mlape qhikeu nhemgha mlla kithemo nani.

¹⁴Ino noghakhulo Ashera lhouliu julho akeu tulaqhive tsu nani.

¹⁵Iloghu kighide kije lono igholumokeu shiayehqo kumtsu shou amkhu lunani.”