Read Sumi Naga NAHUM 1 Bible Online

NAHUM 1 - Sumi Naga bible

NAHUM 1

¹Hiye Nineve ghengu atsape tsukeu lakhike, Elkosh noghami Nahum no kungunhetsu lakhi ithulukeu yepe qhikeuke.

²AMPEU ye aghichikupo Lhou ke; pano pa mujochile kemiqo ghime cheni. Pa loghu kighide lono pano tsuchile cheni.

³AMPEU ye mlalei aloghu ide chemoe, ikemu paye akuka kumtouke, eno kuquvekeu khilemu ghime- mono puwuve chemoe. AMPEU no khile chewuni keno pasapagha ipeghi cheni; khungkusuye pa pukhuno hekutho keu mukhuke!

⁴Pano azughi ahza tsu eno tiye chethove! Pano aghoki qhaive peke. Bashan luzaqa ighuive, Karmel Toghino hughai idive, eno Libanon xamununo aju idiveke.

⁵AMPEU zulo naghutoqono itha pa zulo atoghino azu ilhouveke. AMPEU no ipeghi kelo ayeghino sukinike; ayeghiqha eno tile akemi kumtsu khokhoshike.

⁶Kughou pano axu ideni keno khuno xukulupu kya? khuno pa loghu pukulupu kya? Pano pa loghu amikuyiqu toi leqhike; pa zulo atuquye ipopinyi amkhu shiveke.

⁷AMPEU ye aloke; shiluksa ghulokilo pano pawu timiqo susholu cheni; khunono pa lau ideighi nikeno pano tuchomujo cheni.

⁸Azukuqo kuloghi lakhi toi pano pa ghumiqo qhoi kutsave cheni; khunono pa mujoni keno tipanoqo thivepe nike puwuve cheni.

⁹Nonguye AMPEU shou kiu shiniye kuchughu ani kya? Pano nongu kutsave nani. Khunomu ghuthu khavi nguno alauye pa mjochilemlake.

¹⁰Asahu kuptshupe akeu ngo qhaikeu aghijini toi nonguye pitipuhave nani!

¹¹No Nineve lono lhoksa kugha muqu chhitoi pukemi lakhi ighi, pano AMPEU shou kughuchhoke.

¹²AMPEU no pawu timi Israilmi vilo hipau pike: “Asiriyamino mutotoi eno kumzapushi anamu panonguye kutsaleve nani eno hauve nani. Iwu timiqo, ino nongu ghimeqhike ikemu niye itaghi tipau shikithemo nani.

¹³Itehiye Asiriya kuka nongu shou akeu kishekhave tsu nani eno nongu tsugha puakeu ayikighi suthavetsu nani.”

¹⁴AMPEU no Asiriyami ghenguno kiu kughathave akeno tiye hike: “Panonguye panoqo je pekishe kepu ati kughukomi kuha nani. Pano lhou chinekiqolo asu-atu julho akeu ino kutsaleve nani. Niye Asiriyami ghenguno akumoki kuto nani, panonguye xua kuzupu kumoke!”

¹⁵Julo, atsapemi lakhi sutsa kivi pesu naghutolo cheni! Tokulu sutsa pesu asheshu nike cheni! Juda lo akemiqo, nowu tiqhetini tsala pelulo eno nonguno Alhou lau kiu tsaqui no tushoqhi puani keno tipau tsulo. Kusakughamiye khilemu noghakhu leighikithemo nani. Panonguye qhoi kutsalekhave!