Read Sumi Naga NAHUM 3 Bible Online

NAHUM 3 - Sumi Naga bible

NAHUM 3

¹Ghiqhi, miki chekeu phughiye puhaveni putsa, sunhekishe eno xulepuwu kepu kinikulu kumzapushi ani!

²Jiji hehakeu ghugha inilo! kuluhono qhoqhoshikeu, Khurshino qha-qhaqha pokeu, khurkulu kokoshi poke!

³Khurshi shou kichemino hakutsutsu azutakihi eno angu phuphuyi kulo! Timi kumzapu pithikileve, akithi kumono kishe kishe iku, akithi kumo kihikhamla, timino tipaqo shou kupuxa iku!

⁴Nineve asalhauye ghimeqhi ani. Jukivi eno zupithiluveni keshi lino ashiayehqo musuluve che eno panoqo pesu aqemi kughulhove cheke.

⁵Aqokitikhi MPEU no pi, “Ino nongu ghimeqhi nani, Nineve! Ino nongu phimini xaluveno aphikumsavepe nani, eno ashiayehqo pelono ithulupe nani, okukujopu kumtsu ithulupe nani.

⁶Ino aphi kumqhupushi opeitha nani eno kuchhube kepu pesu onha nani. Timino akumsapu shi kutuxoxo pesu oju nani.

⁷Oithulukemi kumtsu athiu tsughu ideve nani. ‘Nineve ye ixapinyi pesu ani! Khuuno li kimiye nikeu ani kya? Khuuno li mlo vepiqi tsunishi ani kya?’ ipi panonguno pinani.”

⁸Nineve, noye kiu lono Ijip phughitou Thebes nguno akiviu kya? Li ghi putukha ketoi li susho nike aghoki ake, Nayil ghokino li sushokepushike.

⁹Lino Sudan ngo Ijip shou ayehpeke eno li kukaye ashekha kuhano acheke; Libiya no li kusa-pau shiacheke.

¹⁰Ikeghi Thebes lo akemiqoye hale sawuveke. Alaghila hokichhe kumtsulo panoqo tianuli heqhi pithive tsuke. Pano gholo atoshi saphe chekemiye ayichhe kighino tshusawuve eno pano kughakulumino kuphaluveke.

¹¹Nineve, noghi shomzu izuvulayikeulo ilove nani! Noghi noghumi launo posu wuveniye pukaputsa nani.

¹²Nowu aliwo qogheqo kumtsu khughuthibolo alothi ni-ile akeshive nani: asubo sukiniaye axathino vejoi abaxalo ikiqi iloke!

¹³Nowu ghushimiye totimi toike eno noghakhuye noghumi zulo sushokulupu kuhake. No liwo kikha khaduye amino pitileve nani.

¹⁴Lekepushi azu shophevelo eno noliwo qogheqo shikumtolo. Itatu mlakepushi anichepo qodalo; eno itatu-bo papashi kutolo!

¹⁵Nonguno kiu kiu shiaghi namu nonguye piti pithive momu aghushi lono pithiveni aphike. Tulhaquno axabo pughavetsu keshi nonguye jole puhave nani. Nonguno tulhaqu toi kughukoke!

¹⁶Atsutsulo ayepu akeu nguno alau nonguno nowu alhikishimi kughukoke! Ikemu itehi panonguye tulhaqu no panoqo chishibo sukho pesu yewuve keshi chekhavae.

¹⁷Akumko tsalalo aki jibolo tulhaqu loji no ngoakeshi nowu kijemiqoye titoi anike. Ikemu kughono tsukinhe ipeghini keno tulhaqu ye yewuve cheni eno panoqo khilave cheni keno khunomu mthake.

¹⁸Asiriya lo akukatou, owu ahng qoye thivae eno owu kijemiqoye alhokupuju ghenguno zuauvae! Owu timiqoye naghutolo hapiye pighivae eno panoqo akilo saideghi tsuni kemi khuumu kuhae.

¹⁹Nono izapusu akeu shipivilu kepu kuhae eno oghuzakuye vimlavae. Okutsaleve keu sutsa chilukemi kumtsuno alokivi launo pano ukukhu ani. Nono ashekha kuha pughuqhi chekeu lono khualano polu kesha?