Read Sumi Naga HABAKUK 3 Bible Online

HABAKUK 3 - Sumi Naga bible

HABAKUK 3

¹Hiye Habakuk tungkupu kighini lakhi:

²O AMPEU, nono kiu mlaveakeno ino chiluvae, eno niye apuchopungovae. Itaghi ni ghulokilo ghi nono akumzapu kumla kije shichekeu shitsulo. Nono aloghu ide akelo pinamu kupuqhiyilo.

³Alhou ye itaghi Edom kudauno cheni; akimthe Lhou ye Paran naghuto kudauno cheni. Pa jukuvuno kungughaqo nhake; eno ayeghilo pa sheqhekeuno chhitoi ani

⁴Paye tsutsupha kukulo lono cheni; pa-u lono akuvu kulophe, pa kukaye tilehi kusupe puani.

⁵Pano pazuu kusukini puwu, eno akithi pa pape penike azah tsuke.

⁶Kughou pano ngoveni keno ayeghino sukinike; pano jupuwo kelo ashi ayehqono khokhoshive. Alhokupuju achekeu naghutoqono ipopinyive; alhokupuju achekeu toghiqono ipa-ilove, kha-ghi pano khilehi chewuchekeno tipa toghiqoke.

⁷Kushan lo akemiqono ime akeu, eno Midiya lo akemiqono musa khokhoshi akeu ino ithulu.

⁸AMPEU, aghokiqono opelo aloghu idevepe kesha? Azughiqono opelo muqhu muzai vepe kesha? Nono owu timiqo lau tokulu sughi kelo khungkusu shou ikuke eno pasapagha khungkusuye owu yeghikilu shike.

⁹Nono asuzu peitha nike kutolu veke, opiji kapuwu nike kutoke. Owu tsutsupha musuno ayeghi shopholeke.

¹⁰Naghutoqono no-ithulu kelo khokhoshive; atsutsu lono azu leqhike. Ayeghi qhou azu akeqono igha eno tipaqo zu kukuchono qhemghai iku.

¹¹Opiji kumtsuno kulo phapha shi keulo eno ongu tsulompuyi yebide keulo, tsukinhe ngo aqhino inaqhoi ngove.

¹²Nono aloghu lono ayeghi katha susu chewuke; nono muqhu muzayi keu lono ashiayehqo qodaqhi.

¹³Nono owu timiqo xalu nike wuke, tiye nono kisheluvekeu akukau xaluniyeke. Nono kusakughami sakipheu hekuluqhike eno pa papechekemi kumtsu kutsalevetsu.

¹⁴Kughou tipaqono ni hale nike pasapagha toi ighi keno, tuqhouno kumlhomi nedaqhi chekemi toi tipaqono amlo qui shipuzu ighi kelo, opijino pawu aghushimi shou azah kutsuu jiqhivetsuke.

¹⁵Nono owu khurshiqo sasu azughi nedaqhi, ikelo azu kuloghino mulaghubeiveke.

¹⁶Ino hipau kumtsu chilu eno musa khokhoshi; akumsa lono imtsuno lalashi itha. Iphimpino inaiveke, eno ipukhuno aqhou kudauno kupuxaluveke. Alhou no ni leighikemiqo ghimeqhike ghuloki ighinikeu niye inaqhoi khe anani.

¹⁷Khughuthibono athi pithinike pu-move namu eno atsayibolo atsayithi ipeghimo namu, Oliv lothi pithimove namu eno alulo athi ipeghimove namu bheriqo kumtsu thikhave namu eno amshikilo amshi kuhave namu,

¹⁸Niye amlokiqi launo alovi ani aphike, kughengu AMPEU Alhou ye ixakuluuke.

¹⁹AMPEU no akumto itsu cheni. Pano ipelo achui pukhu toi akivishi nepukulupe, eno ipelo naghuto shou chewulupeke.