Read Sumi Naga ZEFANIA 2 Bible Online

ZEFANIA 2 - Sumi Naga bible

ZEFANIA 2

¹Akukujo kuhakeu shiayeh, nongu kukumsu achipiulo ighi lulo,

²nonguye axamunu lakhi toi ighuyiveno thive mphi lono ighilulo, nongu shou AMPEU loghu kighide ighi mphi lono, pano muqhumzai mphi lono ighivelo.

³Nongu akumtshami ayeghilo akemi khunoqo AMPEU zahkutsu peluche kemi keno kumtsu pa lau ideighivelo. Kiuno achipi keno tipau shilo eno AMPEU zulo nolikhi nongu kughape aqhokigheu shilo. Ishiake AMPEU no pa loghu pepheke tsalalo nonguye aghime lono poluve luvike.

⁴Gaza phughilo timi lakhimu qhimove nani. Ashkelon ye piyighive nani. Ashdod lo akemiye atsala tuxa lono halepuwuve nani eno Ekron lo akemiye pano phughi lono ha puwuve nani.

⁵Nongu Filistiyami khunoqono azughi kumxalo acheni keno nonguye puhani putsa. AMPEU no nongu shou kugha thabevae. Pano nongu kutsaleve nani eno nongu milakhimu qhimove nani.

⁶Azughi phivilo noyeghiye aluza thoqhaleiveno bherikhemi pusho ngo bheriqo bokuthabo likhive nani.

⁷Juda lo timi puxu puaghi keqono noyeghi lo ngoluve nani. Panonguno tilehi pano wu bheri loji achukumza nani eno Ashkelon lo aki akeqolo zu nani. AMPEU panoqo Lhou no panoqo sasu anani eno panoqo pelo itaghi kinikulu shilupe nani.

⁸Aqokitikhi MPEU no pi, “Muab lo ngo Amun lo akemi qono iwu timiqo pipusa eno panoqo theqhikeu ino chiluvae eno iwu timiqo yeghi luvetsuni kepi qheza ani.

⁹Niye mutsuqheyino Israil Lhou ke ghengu Muab ngo Amun ye Sodom ngo Gomora toi kutsaleve nani. Tipaqoye amti kuchhukhuki shive nani eno alhokupuju tishi ixapinyi auve nani eno alupino qunhave nani. Iwu timi khunoqo puxu puaghini keno tipanoqo xulepuwuve nani eno panoqo yeghi luve nani.”

¹⁰Muab lo ngo Amun lo akemiqoye pano qhekuza ghenguno eno Aqokitikhi MPEU wu timiqo phimokeu ghenguno tikithipu shi ghimeqhi nani.

¹¹AMPEU no panoqo shikumsa nani. Pano ayeghi hipaulo alhou kepi chekeqo kumu kuhakeu shivepe nani eno tithiuno pututa shiayeh pututa yeghi lono pa mlla nani.

¹²AMPEU no Sudan lo akemiqo ghi pithive nani.

¹³AMPEU no pa kuka peitha puzu Asiriya kutsaleve nani. Pano Nineve phughi pesu piyighiveno ixapiniyi vepe azu kuhakeu sayeqha shivetu nani.

¹⁴Tiye bheri loji, amshi loji eno lhoxu jeli kumtsuno zu keu-a lakhi shivepe nani. Aqhaqhono tipau ixapiniyi keulo ngono alashe lono igha nani. Aghano ahukikha lono igha nani. Tipaulo akiqolo kedarsu pesu shikeuye nhamono auve nani.

¹⁵Aphughi khipauno pakuka kumtolo shishe qheza eno tipau shou kiumu shi mlakepi kumsu acheni keno tipau shou shi nani. Tipaulo akemiqono ayeghilo panoqo phughino akijeu kepi kumsu cheni. Kiutoi kughukughalei keu phughi lakhi shive nani kela! Tughashino ngokeu-a lakhi shiniake! Tipau vechewu kemi kumtsuno thughuyi kelauno tsughuchile ighi nani.