Read Sumi Naga ZEFANIA 3 Bible Online

ZEFANIA 3 - Sumi Naga bible

ZEFANIA 3

¹Jerusalem ye ahasapue, tiye vimokeu, hekibide eno pawu timi qaqhi chekeu phughi!

²Hiye AMPEU tsa ini tsumoe momu shikithe tsukeu ikhilutsumoe. Hiye AMPEU shou pukhukeu kuhae momu pa kukuphu mu khumoe.

³Tipaulo kijemi akeqoye abongushu igha akeu toike; tipaulo kughakuthami qoye muzuthi akeu tine lojino mihemuzakeu lono inaqhe tomphi lono aghi lakhimu qhimovekeu toike.

⁴Tungkupumino lahilazake eno akupulupu kuhake; achinemino akimthe kitiqevetsu cheni eno pano kivipu shianiaye Alhou yezah suchighive cheni.

⁵Ikemu AMPEU ye aphughilo aphike; paye kiuno achipi keno tipau shicheni eno achipi kumou khilemu shichemoe. Ina atsu-tsu pawu timiqo lau pano kuchou xakutha sughi cheni. Tishi keghi tilehi achipi kumomino akumou shi acheni eno kujochemoe.

⁶AMPEU no pi, “Ino ashiayeh qhoi joleve; ino panoqo phughiqo kutsalevetsu eno panoqono putu muxakeu ngo aghukhu qogheqo ixapiniyi qhivetsuke. Aphughiqoye piyighive; alaghilaye kumsa shivetsu nani, timi lakhimu qhitsumo nani.

⁷Ino kumsukeuye iwu timiqoye tileno isumsa nani eno ino shikithe keu ikhilu nani eno panonguye ino shikapiye keu khilemu kumsumamo nani kepi kumsuke. Ikemu paikhavino panonguye puzuu toi alomokeu shiuve anike.”

⁸AMPEU no pi, “Ino ithupuzu ashiayehqo ngukunikeu tsala kutolo khe-aghilo. Niye ashiayehqo ngo akukaqhaqo hekutsu nike xathaluvae, eno panoqo shou iloghu agho-shi pipekeu ithipe nani. Ayeghiqha kumtsu iloghu mikuyiquno pitileve nani.”

⁹“Tithiuno ino ashiayeh qolo timiqo tsapi kilive tsu nani eno panonguno ivilo likhi khuini nani kethono alhou kutau vilo khuinimo nani. Panongu kumtsu igholu nani.

¹⁰Putou akeu Sudan lono ghi iwu timi apanagha akeqono akumllagho ilau peighi nani.

¹¹Tipa ghulokiloye nongu, iwu timiqoye ishou hebide kepi kujovekepu kuhave nani. Aqhekuza eno akulakimi kumtsu ino ikhive nani eno ikimthe naghuto loye nonguye khilemu ishou hebide kithemo nani.

¹²Tilehi ino akumtshami eno aqhokighemi qhipua nani; panonguno akukuphu phususu ilau ighi nani.

¹³Israil lo khunoqono puxupe puaghini keno tipaqoye khulaumu akumou shimo nani, mikimo nani, pishiqhi keu tsa pimo nani. Panonguye kinikulu shi nani eno sushokulu anani, khuumu musakepu kuha nani.”

¹⁴Israil lo akemiqo, alokivi launo shipili ighalo! Jerusalem, omlo kuchopu pe alovilo!

¹⁵AMPEU no nono aghimeshi akeu kishekhave tsuae; oghumi kumtsu pano ikhive tsuake. AMPEU, Israil lo Akukauye ogholo ani; itehiye musa akepu akiqi kuhake.

¹⁶Panonguno Jerusalem vilo pinikeu tsala cheni; “Zion phughi, musa kevilo! O-u pelo ijunayi ihi ape kevilo!

¹⁷AMPEU oLhou ye ogholo ani; pa kukano tokulu otsuke. AMPEU no oshou azukuvu shi nani, eno pa kikimiye lono pano akuxu kithe otsu nani. Pano ojupe alephe alokivi shive nani, timino tiqhetini tsalalo alovi akeshi nani.”

¹⁸AMPEU no pi, “Niye puhavenikeu pesu kichikeu ashekha shivae eno okukujopu ikhisuwuvetsuae.

¹⁹Aghuloki wocheni! Ino onedaqhi chekemiqo ghimeqhi nani; Aphi-au kinitave kemiqo kumtsu ino hakho sughi nani eno halephe sawuvekemiqo aghakhulo saghi nani. Ino pano kukujo pesu agigihupu shivetsu nani, eno ayeghiqha kumtsuno panoqo sheqhe nani.

²⁰Aghuloki wocheni! Ino notimi apanagha akemi aghakhulo saghi nani. Ino ayeghiqhalo akemi zulo nonguye ajekipipu shi tsu nani, eno nongu pelo itaghi kini kulu shilupe nani.” AMPEU no pivae.