Read Sumi Naga ZEKHARIA 11 Bible Online

ZEKHARIA 11 - Sumi Naga bible

ZEKHARIA 11

¹Ohukikha khaqhilo, O Libanon, Tishianguno ami pelo nowu kedarsubo pitileve penike!

²Mulominyi qalo, O kuprasuboqo, kedarsuboqo ikiqivae, ajekipishi achekeu suboqo hu kutsakhavae! Mulominyi qalo, Bashan phisuboqo; aveghasu hu yeqhi khavae!

³Ayehkipemino amlo ghime launo igha; panoqo jekipiye chevae! Abongushuqo ghugha inijulo, Jordan hokumxalo panoqono ngochekeu ghasuye kutsakhave ake!

⁴AMPEU iLhou no ivilo pi, “Bheri loji lakhi ghiqhini aye akeqo shou akheu kumla shilulo.

⁵Panoqo pighiuno panongu ghiqhi cheni eno ghikiqhimi shou aghime tsumono wuvepe cheni. Panonguno ashi jepuzu ishi picheni; ‘AMPEU shelo! Ninguye kinimi shiluvae!’ Bheriqo kheu ghi bheriqo kimiye qhiyi keu kuhake.”

⁶(AMPEU no pi, “Niye ayeghilo milakhi shoumu imlo ighiqhiyi keu shimoe. Ni ampino timi kumtsu pesu pano shou ayehkipemi ulo suvetsuni. Ayehkipemi tipaqono ayeghi shipsa khave nani eno niye panoqo kuka lono ayeghi xalumo nanike.”)

⁷Khunoqono bheri qhu cheni eno je cheni keno panonguno ipiqeke eno niye bheri ghiqhini aye akeqo shou bherikheu shive. Ino akusu kini luke: lakhi pesu “Qhuivulaikeu” ipi ino kutsu eno lakhiu pesu “Kuqhakulu” ipi kutsu. Ino bheriloji jukutocheke.

⁸Niye bherikhemi kutami mikuthu iju mithi chekemiqo lau kheakulu kuhave ikehu aqhi lakhi dolono panoqo kumtsu ino kutsave.

⁹Tishi puzu ino bheriloji vilo pi, “Hinguno hilauye niye nongu shou akheu shimoe. Nongu khunoqono thiniye anikeno thipelo, kutsapinyive niye anikeno kutsa pinyivepelo. Khunoqono xuaghini keno lakhino lakhi kutsapinyi nanike.”

¹⁰Ino “Qhuivulayi” ipichekeu kusu hu ikhilu puzu tipau suchheve, tiye AMPEU no ashiayeh kumtsu sasu puloshoqhi shikeu hexaveniyeke.

¹¹Ikehu puloshoqhiye tipa tsalani lono hexaveke. Bheri qhu chekemi eno je chekemino ijukuto ake, ino kiu shiakeno tipau vechewo AMPEU no piakepi panonguno ithiae.

¹²Ino panoqo vilo, “Nonguno pulo aghiaye ijume itsulo, ikemu tishimoaye tipau qhiluvelo.” Ikehu panonguno tsandiyi atachu shighi mighi pesu ijume itsuke.

¹³AMPEU no ivilo pi, “Tipaqo pesu achinekilo akini pekutsualo sulo.” Ike ino tsandiyi atachu shighi, niye ame kumzapu qhemi kepi panonguno kumsu ake, tipau pewo achinekilo akini pekutsualo suve. Tisheno ino akusu akiniu, “Kuqhakulu” ipichekeu suchheve eno Juda ngo Israil kuma kuqha pe akeuye kuboleve.

¹⁵Tileno AMPEU no ivilo pi, “Itaghi ghuthu lakhi bherikheu kumla shilo, ishiu loye ame kuhamithekeu akheu lakhi shilo.

¹⁶Ino bherikheu lakhi iw bheri loji jukuto peniye qhike ikemu bheriqo puhapighiyive keghi jukuto tsumoe, momu puhavekeqo phuwumoke, momu ghuza puaghikeu shipivi tsumoe momu xuaghikeqo lojitsumoe. Tishinike zuqhulo, pano bheri chhikhoikeu shi chuuve eno panoqo pukhu mutsu tujovetsuke.

¹⁷Amekuha mithekeu bherikheu tipauye pithiveni putsake! Paye pawu bheri loji qhiveke. Aghukishino pa kuka qhoi kutsave nani. Paye thizum-muyive nani eno pa nhethi ajeu kudauye icheuve nani.”