Read Sumi Naga ZEKHARIA 12 Bible Online

ZEKHARIA 12 - Sumi Naga bible

ZEKHARIA 12

¹Hiye AMPEU launo Israil ghenguno atsape tsukeuke. AMPEU khuuno atsutsu sukhope qhiwo, ayeghi lhophe eno timi lolo akuxupi kughulhotsu keno pano piani:

²“Ino Jerusalem pesu aji jukhu lakhi toi shitsuni; eno ashiayeh kutami li sukumxalo akeqono yepusu shokumzumi toi hevulalai nani. Kughou panonguno Jerusalem khasuluve nikeno Juda lo aphughi kutau akeqo ghi khasuluve nani.

³Ikemu tipa tsalanilo ashiayehqo ghenguno ino Jerusalem pesu atuqu kimishi lakhi toi shitsu nani. Ashiayeh khuuno tipau peqheju niye pukaputsani keno pano likhi pano ghuzave nani. Ayeghiqhalo ashiayeh kumtsu kuqhano li lenike ighi nani.

⁴Tipa tsalalo, ino panoqo wu khurshi shikichi nani eno tipaqo shou ikuno chekemiqoye izuphokicheive nani. Ino Juda lo akemi shou kheluve nani ikemu aghumiqo wu khurshi nhethi kighicheve tsu nani.

⁵Tileno Juda laghami no pano likhi pano vilo ishi pi nani, ‘AMPEU, Aqokitikhi Lhou no pawu timi Jerusalem lo akeqo lau akuka kumto tsuke.’

⁶“Tipa tsalalo ino Juda laghami pesu aghasulo momu aghighope puake luqalo ami iquakeu toi shitsu nani; panonguno acheaxulo ashiayeh kutami akeqo kumtsu kutsale qhi nani. Jerusalem lo akemiye aphughi alou akivishi ngolu nani.

⁷“Ni, AMPEU no Judami ghushimiqo paghi tokulupu tsuni, tishianguno David polo kughukomi ngo Jerusalem lo akemiqono agigihupu ithuluniye akeu huye Juda lo akemino ithuluniye akeu nguno akuloghiu shipemo nani.

⁸Tipa tsalalo AMPEU no Jerusalem lo akemi shokhalu nani eno panoqo gholo miqemilei keu ghi David toi mutotoilu pe nani. David polo kughukomino Alhou toi shi puzu, AMPEU wu kungumi toi shieno panoqo tughiushi wu nani.

⁹Tipa tsalalo Jerusalem leniye ighikemi shiayehqo kumtsu ino kutsaleve nani.

¹⁰“David polo kughukomi shou eno Jerusalem lo kughuna akemiqo shou ino amlo ighiqhiyikeu nguagha eno akukhu kighini nguagha lepukutsu nani; ikehu panonguno khuu qhuqhi pithive keno tipau shou jupuku puzu anga lakhi likhi akeu thivekelo mloqa akeshi panonguno pa ghenguno mloqa nani. Anu anoghiu thivekelo mlo qakeshi panonguno amlo kughutashi qa nani.

¹¹Tipa tsalalo Jerusalem lo mlo qakeuye Megido khilalo Hadad-rimon ghenguno mlo qakeu kuloghi paphi shi nani.

¹²Aghakhulo mlo qa nani, pututa kibolo mlo qawo nani; David polo kughukomi kibo kutashi, Nathan polo kughukomi kibo kutashi,

¹³Levi polo kughukomi kibo kutashi, Shimeyi polo kughukomi kibo kutashi.

¹⁴Akibo kumtsulo tishi qa nani. Pututa shelo pututa kibolo mlo qawo nani eno pututa kibolo kiptimi totimi kututashi mlo qawo nani.”