Read Sumi Naga ZEKHARIA 3 Bible Online

ZEKHARIA 3 - Sumi Naga bible

ZEKHARIA 3

¹Kungunhetsu lono AMPEU no Achinetou Joshua ipiyeke. Tilehi Joshua phivilo Satan puthughono pa nguku keu tsa sughiniye kutope ake.

²AMPEU wu kungumino Satan vilo pi, “AMPEU no okileqhive peniu, Satan! AMPEU, Jerusalem kimiyekicheuno okileqhive peniu. Timi hipauye ami lono puxuphelu keu sulu lakhi toike.”

³Joshua ye niqhunilai keu phimini pepusu tilehi puthugho ake.

⁴Kungumino kungughalomi jukutotsu chekemi vilo pi, “Timi hipauno niqhunilai keu phimini uakeu ikhipewuvelo.” Tishieno pano Joshua vilo pi, “Ino oxine ikhi pewuvetsuake eno aphimini kithe pepupe nike otsu nani.”

⁵Pano jukutotsu chekemi vilo akutsu chijepukeu phi akimthe pesu Joshua kutsu shou betsulo pi azah tsu. Panoqo no tishive tsu eno AMPEU wu kungumino tile puthugho akelo panonguno aphimini akithe pesu pa pu-uke.

⁶Tileno kungumino Joshua vilo Aqokitikhi MPEU no pikeu tsa pesu pi,

⁷“Nono iyezahqo papelu eno ino ovilo shilopikeu kumlapu saje shiche aye, noye ichineki eno tipau bocho shou peitha chepe nani eno ino kungumi izulo akemiqo kighini chilutsuke toi ino okighiniqo chilutsu nani.

⁸Tishiaye, hi inilo, no Achinetou Joshua eno nongu pa gholo achinemi shiakemiqo, nongu ighinikeu tsala kivipulo michipuqo, hi inilo: Ino iqeu, Aloka ipi kuchekeu hu pephepiye nani!

⁹Ino Joshua zulo atuqu lakhi ako tsuni akeu qhitsu ani. Ino tipau shou yepukukeu tsa yethapuku nani eno ghulo lakhi lono hipau yeghi xine ino ikhi pewuvetsu nani.

¹⁰Kughou tipa tsala ighini keno, notsayili ngo khughuthibono nongu suhope puzu nongu milakhi khino pa kusami vilo alokughuno eno sushokulu lokivi shilopi ku-kusu shi nani.”