Read Sumi Naga ZEKHARIA 5 Bible Online

ZEKHARIA 5 - Sumi Naga bible

ZEKHARIA 5

¹Itaghi ino jupuwu kelauye likuzu kaku lakhi yecheghi keu ithulu.

²Kungumino niye kiu ithulu kelapi iniju. Ino khochile, “Likuzu kaku yechekeu ithulu ke; hiye akushu lau miter toku eno akije lau miter bidino tuxake.”

³Tileno pano ivilo pi, “Tipaulo musuinikeu yepuku puani eno tiye aghakhuqha kumtsu shou wupeniyeke. Likuzu kaku tuxau yepua keuno aghakhu lono kupkami kumtsu haleve nikeu pipuani; eno tuxa kudau yepua keuno tushoqhi akelo mikichekemi kumtsu ikhipewuve nike pipuani.

⁴Aqokitikhi MPEU no pike pano musuinikeu hipau puwuni eno tipauno kupkami lakhikhi kilo ilo nani, tushoqhikelo mikikemi lakhikhi kilo ilo nanike. Hiye panoqo kilo ngoauve nani eno pano kuxu ixapinyipe qhive nani.”

⁵Kungumino itaghi ipeghi no pi, “Julo, kutau kiukela chenike!”

⁶“Tiye kiu kya?” ipi ino iniju. Pano pi, “Tiye ashoghi lakhike eno tiye aghakhuqha xine kiqike.”

⁷Ashoghiye akunha ae eno tiye akusayino shipepuake. Ino juakelauye, akunha lhaphe kelo ashoghi tilehi totimi lakhi iqa ake!

⁸Kungumino pi, “Totimi hipauye kusakugha kiqike.” Tishi puzu pano ashoghilo li inasuve eno akunha pesu nhaqhiluve.

⁹Ino jupuwu kelauye totimi kini, azughau kuloghi chishibo kumto toikeu puno ikudau yesusu cheghikeu ithulu. Pamano ashoghi hu ikhiqheluve eno tipau pesu yewuve!

¹⁰Ino kungumi vilo iniju, “Panonguye hupau khilau pewuni kya?”

¹¹Pano khochile, “Babilon lo pewu cheni, tileno panonguno tipau ghenguno achineki lakhi shi nani. Kughono achineki shiqhive nikeno ashoghiye tile qhipuzu tipau mlla nani.”