Read Sumi Naga ZEKHARIA 8 Bible Online

ZEKHARIA 8 - Sumi Naga bible

ZEKHARIA 8

¹Aqokitikhi MPEU no Zekharia vilo atsape hipau tsuke:

²“Niye Jerusalem kuphunishi kutu acheni kughengu tilehi akemiqo lau ikikimiye thonheyikeu anike, tipau kikimiye huno ipelo li ghumiqo shou aloghu ide cheni peke.”

³Niye Jerusalem, ikimthe phughilo ideighi nani eno tile anani. Tiye pichebekulu phughi ipi ithipe nani eno Aqokitikhi MPEU toghiye akimthe toghi ipi ku nani.

⁴Itaghi asu apuzaqono kitemi shive kehu akusu kutucho pesu iqhoiqi chekeqono aphughi laghilalo iqakuho nani.

⁵Alaghilalo itaghi apumi ilimino chhitoi ili akha nani.

⁶Aghakhumi gholono ghupe puaghi kemi hipaqo zulo hiye akumza kepu shi aghiluvi ikemu ighenguye kusho kutsupu kumoe.

⁷Iwu timiqo kipela yeghi eno kulola yeghi lono ino xachile saghi nani,

⁸Jerusalem lo kughuna penike panoqoye ino saghi nani eno panonguye iwu timi shive nani eno ino panoqo Lhou shive nani, pichebekulu shi eno amikucho lono panoqo shou ayehpekeu shi nani.

⁹“Nongu mlo kumto shilo! Kughengu iAchine ki shikitheniye aboqha qha ake ghulokilo tungkupmino pikeu tsa itehi ghi nonguno tipa tsatho chilu anike.

¹⁰Tipa zuuye timimu pichepighimu piqesulu kepu shimlake eno timi khunomu pa ghumi launo xakulupu kuhano acheke.

¹¹Ikemu itehiye ashiayeh hipaqo gholono ghupe puaghi kemiqo kutashi ino peitha nanike.

¹²Panonguno aloino ghi pano xa yisulu nani. Pano wu atsayibono alothi pithi nani, ayeghino axatsuni ipeghipe nani eno tsutsughu kutomo ghu nani. Kukumgha hipaqo kumtsu pesu ishiayeh, khunoqo ghupe puaghi keno tipaqo ino tsu nani.

¹³Juda ngo Israil lo akemiqo! Wovekeu tsalalo inaghamino lakhino lakhi ghusho keulo, ‘Juda ngo Israil kuma shou kutsakungo keu ikughikeu tho oshou ikughi peniu!’ ipi picheke. Ikemu ino nongu xalu nani eno tileno inaghami hupaqoye lakhino lakhi vilo, ‘Juda ngo Israil kuma shou kukumgha ighike tho opelo ithulu peniu!’ ipi pinani. Tighenguno amlo kumtoshilo eno msa ichi kevilo.”

¹⁴Aqokitikhi MPEU no ishi pi, “Kughou nongu puasuqono ipelo aloghu idepe keno panoqo kutsakungove nike ino kughuve eno ikukumsu kilivemono ino kughuvekeu shiveke.

¹⁵Ikemu itehiye Jerusalem ngo Juda lo akemiqo ghenguno kukumghapu ino kughupe ani. Ikehu msakevilo!

¹⁶Nonguno thime hipaqo shichelo: lakhino lakhi vilo kuchou tsa pilo. Kughakutha-alo kuchou xakutha tsulo, khipauno alakishi sughi kepu keno tipau tsulo.

¹⁷Kutami ghuzakileni keu laghi kughupe qhikevilo. Tushoqhi akelo kichileu shepe shitsu kevilo. Niye akimki ngo amikucho kumo xakutha eno heqhi buqhikeu mithi chenike.”

¹⁸Aqokitikhi MPEU no Zekharia vilo hipau tsape tsuke:

¹⁹“Aqhi abidiu, apunguu, akutsuniu eno achighiu lo kumvu chekeu huye Juda lo akemiqo ghenguno alokivi eno alokiqipu tsala shive nani, eno alakishi kupukimiye masake.”

²⁰Aqokitikhi MPEU no pi, “Aphughi kutomo lono timiqono Jerusalem lo ighinikeu ghuloki cheni.

²¹Aphughi lakhilo achekemino kutaulo achekemi vilo ishi pi nani, ‘Ninguye Aqokitikhi MPEU mlla nike eno pawu kukumgha khu ini nike wuchenike nigholo ighilo!’

²²Timi kumzapu eno akuka kumto shiayehqono Jerusalem lo Aqokitikhi MPEU mlla nike eno pa kukumgha khuini nike ighi nani.

²³Tipa tsala loye inaghami chighino ighi puzu Judami lakhi ku-uphi tsuquluveno ishi pi nani, ‘Ninguye nogholo xupelo kughengu Alhou ye nongu gholo akeu nino chiluveake.’ ”