Read Sumi Naga ZEKHARIA 9 Bible Online

ZEKHARIA 9 - Sumi Naga bible

ZEKHARIA 9

¹Hiye AMPEU tsapeke: AMPEU no Hadrak yeghi ngo Damaska phughi aghime tsunikeu kughathave ake. Israil lo ashiayeh akeqo likhi kumono Siriya phughi ghi AMPEU wu ke.

²Hadrak sasu kulughi akeu Hamat ghi pawuke eno Tur ngo Sidon phughiqo eno panoqono shithi aghikeu jeli kumtsu pawuke.

³Tur no pa likhi pa ghenguno aliwo kuptu shike eno axine kumqope puakeshi shunayi ngo tsandiyi pekutsu pesu puanike!

⁴Ikemu lino aghikeu jeli thwokha kumtsu AMPEU no ikhi suwuvetsu nani. Pano liwu kinikulu azughilo vesuve nani eno aphughiye amino pitileve nani.

⁵Ashkelon phughino hipau ithulu puzu msave nani. Gaza phughino hi ithulu nani eno aghime kitikhi shi nani. Ekron ghi tihutoi nani eno lino lajupe akeu kubokighinive nani.

⁶Kitekungoikeu timi shiayeh jelino Ashdod lo kughuna nani. AMPEU no pi, “Hi Filistiya lo akemi aqhekuzami kumtsu ino ghakuchuni nani.

⁷Hinguno hilau panonguye aji pususu keu shi chumo nani momu lakha puakeu chuqupu chumo nani. Panongu gholono puxu puaghikemi kumtsu iwu timi gholo aqo shive nani eno Juda shiayeh gholo alagha lakhi toive nani. Jebusimi toi Ekron ghi iwu timi gholo lakhi shive nani.

⁸Ino iyeghi khepe ngo nani eno ghushimi pelo tipaulo iqho iqi pemo nani. Niye ayehpe kumthami pelo itaghi iwu timi qoda pemo nani. Iwu timiqo kishi aghime shive keno ino ithulukhavae.”

⁹Shishe alovilo, Zion limiqo! Alokivi launo ighalo, Jerusalem limiqo! Julo, nongu kukau nongu lau cheni! Paye ajekipi eno tokulu shi ghi cheni, paye aqhokigheu shi eno gadaha shou ikuno cheni, gadahatsu shouno cheni.

¹⁰AMPEU no pi, “Ino Israil lono aghushi khurshi ikhive nani; eno Jerusalem lono khurshi ikhive nani; aghushilo peithakeu suzu kutsavetsu nani. Okukauno ashiayehqo gholo ala shitsu nani, pano azughi lakhi lono lakhiu kutolo ayehpe nani, Eufrati ghoki lono ayeghi shekha kutolo.”

¹¹AMPEU no pi, “Ino nongu sasu puloshoqhi shikeulo aghashi keu ji pesu mekha puanike ghenguno, Niye nowu timi akughushi akeu lono qhaqhipheni, azu kuhakeu qokuchhu lono khaqhipheni.

¹²Ideghilo, nongu akughumi itehiye lajupu auvekemiqo; nongu sushokulu-alo ideghilo. Itehiye ino nongu vilo pini, nonguno aghime shivekeu ghenguno kukumgha pesu ino ghuthu kini nongu lochileni.

¹³Ino Juda pesu ghushimi suzu toi peithani eno Israil no apiji toi peithani. Ino azutakihi lakhi toi Zion lo akemi peithano Grik lo akemi mujoni.”

¹⁴AMPEU no pawu timiqo shou ipeghi nani; tsutsu phapha toi pano pa piji kapuwu nani. AMPEU Alhou no afuko kuigha nani; apeu no pasapagha lono pano igha ighini.

¹⁵Aqokitikhi MPEU no pawu timi susho nani, panonguno aghumi kutsaleve nani. Panonguno shomkuzumi toi aghushi akelo igha nani eno pano ghumiqo ji pele nani; Tiye akumllagho khachelo akhu lono aghashikeu ji pelekelo toi tipaqo ji qowu nani.

¹⁶Tipa tsala ighikelo, AMPEU no pawu timiqo xalu nani, tiye bherikheuno akumsapu lono pawu bheriqo xaluke toi nani. Akutsukuqho lakhi akughupu tu ake toi panonguye pa yeghi yepuvutsu nani.

¹⁷Ayeghiye kiutoi jukighilepu eno akivipu shive nani kela! Tipaulo ipeghi keu xatsuni eno atsayijino lhothemiye choshiyi thuwulu nani.