Read Sumi Naga MALAKI 3 Bible Online

MALAKI 3 - Sumi Naga bible

MALAKI 3

¹Aqokitikhi MPEU no khochiletsu ani, “Ighenguno alaghi kutope nike ino ighinikishiu puwu nani. Tileno nonguno huqheju akeu MPEU ye zuleleno pa chinekilo ighi nani. Nonguno junishiqhiyi achekeu ghinikishiuno ighi nani eno iw puloshoqhi pesu asheshu nani.”

²Ikemu pano ighi kelo khuno tipa tsala puqhekulupu kya? Pano ipeghi kelo khuuno xuaghikulupu shi nani kya? Paye sapun-xo susuikeu toi nani, ghukimthe chekeu mikuyiqu toi nani.

³Paye tsandiyi ghukimthe eno thakimthe chekeu toi kughatha nike ighi nani. Ayikiyiqimino tsandiyi ngo shunayi ghukimthe ketoi AMPEU ghinikishiuno achinemi ijokimthe nani, tishianguno panonguno AMPEU lau akumllagho achipiu jeli sughikepu shi nani.

⁴Tileno Juda ngo Jerusalem lo akemino akumllagho khikhi AMPEU lau sughi nikeno tiye pa mlo kiqipu shi nani, panonguno khaghi shichekeu toi nani.

⁵Aqokitikhi MPEU no pi, “Niye kughatha nike nongu gholo ipeghi nani eno khunoqono kuduu shi cheni, salha shupu cheni, akimki shepe shi cheni, khunoqono pano kumlami atha tsukelo pishiqhi cheni eno khunoqono chimemi, mighimghaqo eno inaghami hapheve cheni eno isumsa chemo keno timi tipaqo shou ngukube nike ino ashepe tsunike ighi nani.

⁶“Niye AMPEU ke, niye kili chemoe. Ikehu nongu, Jakob laghami qhoi puhave mphike.

⁷Nongu ghi, nozuu apu asuqo toi iyezah launo tsughusu wuve eno tipaqo pelu chemoke. Ilau xaideghilo eno niye nongu lau tsughu ighini. Ikemu nonguno ishi inijuke, ‘Ninguye olau ideighi nike ghenguno kiu shimasa kya?’

⁸Ino nongu vilo inijukeuno timino Alhou pishiqhi keuye achipi kesha? Tishimo thono, ikeghi nonguye ipishiqhi anike. ‘Kishi puzu’ ipi nonguno inijuke. Chighi sajelo lakhi tsuchekeu eno akumllagho vehu lonoke.

⁹Nongu kumtsu shou musuinikeu ani, kughengu ashiayeh kumtsuno ipishiqhi anike.

¹⁰Chighi sajelo lakhi akuchopu Achinekilo sughilo tishianguno tilehi achuqupu lukumkhashi apenike. Ipe julo eno nonguno ithulu nanike ino kungugha lashe khaqhi puzu thime kivi jeli kumtsu nibonilei nongu shou lepukutsu nani.

¹¹Niye pitheninga pelo nongu xabo kutsa pemo nani eno notsayiboqono atsayithi kumzapu pithi nani.

¹²Tileno ashiayeh kutami kumtsuno nonguye akumghau kepi pi nani kughengu noyeghiye kughunakepu-a kivi shi nani.

¹³“Nonguye ishou akuighupu tsa pipuanike,” ipi AMPEU no pi. “Ikemu nonguno ishi iniju, ‘Ninguye oghili kiu pipuani kya?’

¹⁴Nonguno ishi pike, ‘Alhou qeakepu avehupu kuhae. Kiu vehupu ani kepi pano pikeu shiani kya? momu nino kiu mlapuani keno tipau ghenguno amlo sakeu pesu kushiye Aqokitikhi MPEU piye ani kya?

¹⁵Nino ithulukeuye aqhekuzamino alokivishi ani. Alhoksamiye kinikulu shiluke likhi kumono panonguno panoqo kumla lhoksa shikeu pesu Alhouw kheakulu ghuju cheni tishi keghi kiumu shimono aluve cheni.’ ”

¹⁶Tileno timi khunoqono AMPEU sumsa cheni keno tipaqo lakhino lakhi putsa cheni eno AMPEU no panonguno kiu pi keno tipau inia puzu chiluve cheni. Pa zulo kaku lakhilo yepe qhipuani, khunoqono AMPEU sumsa eno pa gihu cheni keno tipanoqo ghili yepuani.

¹⁷“Panonguye iwu timiqo shi nani,” ipi Aqokitikhi MPEU no pike. “Ino shiniye kuto akeu shike tsalalo panonguye iwu shive nani. Niye panoqo shou imlo ighiqhiyi nani, tiye anu lakhino papuh qechekeulo apuhno pa kimiyeqhiyi keu toi nani.

¹⁸Amikuchomi eno timi khuuno iqecheni eno khuuno iqechemo keno tipau dolo kutuquvekeu iwu timiqono itaghi ghuthu lakhiye ithulu nani.”