Read Sumi Naga MATHI 14 Bible Online

MATHI 14 - Sumi Naga bible

MATHI 14

¹Tipa ghulokilo Galil lo ayehkipeu Herod no Jisu jekipi chilu.

²Pano pa qholo achekeqo vilo ishi pi, “Hiye Johan Baptist ke, paye akithi lono xuileghiluve keuke, ike tipau kukano pa lolo hitoi shilu ani peke.”

³Kughengu Herod no Johan kughaluve eno pa tshusawo akughukilo sue. Pano ti shikeuye pa thikuzuu Filip nipu Herodia ghengunoke.

⁴Johan no Herod vilo ishi piche, “Noye li sasu kughunakeu achipi kumoe!”

⁵Herod ye Johan pithive nishi ache ikemu paye Judami msa ache, kughengu panonguno Johan ye Alhou wu tungkupu lakhike pi kihiche.

⁶Ikemu Herod punu tsala ighikelo, Herodia nga ayiliuno timi ku-su keqo zulo ilhetsu. Herod ye amlo kiqi shiveke launo

⁷li vilo pano ishi piqhi: “Nono kiu kiu khunamu otsuniepi ino tushoqhi ani!”

⁸Li pazano mijetsukeu kiqi lono lino pa vilo ishi khu, “Hipa-a lono Johan Baptist kutsu akhulo su puzu itsulo.”

⁹Tile Herod akukau ye pa mlo saqhiyive, ikemu pano timi ku supuakeqo zulono ashoqhi shivekeu ghenguno li tsuvepe nikeu shi ahza tsuve.

¹⁰Ikehu pano akughukilo timi hapuwu puzu Johan kutsu luvepe.

¹¹Pa kutsuye akhu lakhilo supuzu peighi eno ayiliu hu tsuve, eno lino tipau li pa za lau pesu wuve.

¹²Johan phimipiye pa khopemiqono ighino pewo qhovetsu; tishieno panonguno wupuzu Jisu vilo kishekulu pi.

¹³Kughou Jisu no hipau chilu keno, paye tipa-a qhive puzu ashuka lakhi lono pa likhi yenguyeleyi keualo wuve. Ikemu timiqono ti chilu puzu panophu qhiveno apukhu lono chesusu pa pape wuve.

¹⁴Jisu no ashuka lono amuku tokelo timi aqokitikhi aghikeu ithulu puzu panoqo jupesu pa mlo ighiqhiyiveno pano panoqo gholo kusukinimi shipivitsu.

¹⁵Tipani avelau pa khopemino ighi puzu pa vilo ishipi, “Hiye timi kughunamokeu-a lakhi eno tsuzuvae, ike timiqo puwovelo tishianguno panongu pelo aphulo achuqupu qhuchuwu pelo.”

¹⁶Jisu no panoqo vilo ishi pi, “Panongu puwove kepukumoe, panongu pelo chupe kepushi nonguno kiuala pesu panongu tsulo,”

¹⁷Panonguno ishi pa khochile, “Hila ninguye ashopa pungu eno akha kini likhi anie.”

¹⁸Jisu no ishi pi, “Tipaqo ilau sughilo.”

¹⁹Tileno timiqo vilo atsuni shou iqalopi pano azah atsu. Ashopa pungu eno akha kini pano ikhipesu atsutsulo jupuku eno Alhou shikimthi. Tithiu pano asho supho puzu tipaqo pesu pano pa khopemiqo tsu eno akhopemino tipaqo pesu timiqo kijetsu.

²⁰Panongu kumtsuno chu puzu chukha kumo shive. Tilehi akhopemino chukhakumo ashoghi chighi kini chhitoi kichekumqolu.

²¹Tilehi chu kemi kihijukelo, totimi ngo ititunu kihimo puzu timi 5000 kutolo ae.

²²Pa zuuno cheghipeniye Jisu no pa khopemiqo ashuka lono puwuve, eno paye timiqo kughuxa puwu auve.

²³Timiqo kughuxa puwove puzu paye akighini shiniye pa likhi naghutolo iqho. Avela shivekethiu Jisu ye pa likhi tile ae.

²⁴Tipa dolo ashukaye azughi kutholo ae eno azufukukuchono tipau tukuchoqhi-ae, kughengu amlhu no tikudau fudaqhi puwo ae.

²⁵Tsukutho lau ayi kuthu ngo tsugho kihe dolo Jisu no azu shouno alachesu panoqo lau ighi.

²⁶Ikemu akhopemiqoye pano azu shou alache chekeu ithulu kelo, panonguye shishe kichimamave puzu ishipi, “Hiye aghahwu lakhie!” Panonguye akumsa launo ighaukhave.

²⁷Ikelo tipa mtsa Jisu no panoqo putsa no ishipi, “Nongu mlo itha kevilo| Nike, msa kevilo!”

²⁸Tile Pitor no ishi piyithughi, “Ampeu, tiye noke aye ipelo azu shouno olau ighi kepushi pitsulo.”

²⁹Jisu no “Ighilo” ipi. Ikehu Pitor no ashuka lono ipe puzu azu shouno alachesu Jisu lau wuche,

³⁰ikemu mulhu akeu ithulu kelauye paye msave eno azulo thum-muyi ilocheghive puzu ighamuku pi, “Ampeu, isunhe phelulo.”

³¹Jisu no pai pa u chhopuwo puzu pa tsuquluve eno pa vilo ishi pi, “”Okupulu mikhelo kena! Kushiepi omlo lipive kya?”

³²Pamano ashukalo ilove kelo amlhu mulhutave.

³³Ashukalo akeqono Jisu sheqheghi ishipi, “Kuchouno noye Alhou Nue!”

³⁴Panonguno azughi katha susu Genesaret wotolu,

³⁵ike tipa alo kuamiqono Jisu ye khuu keno michiluve. Ikehu panonguno tipa che-axu kumtsulo timi puwu puzu kusukinimi Jisu lau saghipe.

³⁶Panonguno kusukinimi pelo pa phishe likhimu bulupelopi pa qhuiniju; eno pa phishe bulukemi kumtsu viluve.