Read Sumi Naga MATHI 15 Bible Online

MATHI 15 - Sumi Naga bible

MATHI 15

¹Ikelo Jerusalem lono Farisimi ngo Ayezah kukutsumi Jisu lau ighi puzu ishipi,

²“Kushiye okhopemiqoye puzuu apuasu no pepimhe chekeu kukutsu hebide cheni kya? Panonguye chumphi zulo panongu u agholauno mtsu chemoe!”

³Jisu no panoqo vilo ishi khochile, “Le maye nonguye kushiye nonguno pepimhe chekeu kukutsu papeniye Alhou no ahza tsukeu hebideve cheni kya?

⁴Kughengu Alhou no ahza tsukeuno, ‘Opuh eno oza gihulo,’ eno ‘Timi khuno apu-aza kivikumo pinikeno pa pithivelo.’

⁵Ikemu nonguno kutsuchekeuno timi lakhino kiuala aghi puzu papu- aza kuphulu kepushi ani, ikemu pano ‘Hiye Alhouw shivae’ ipi aye, papelo papuh gihumoluve chenipeke.

⁶Ikehu nongu wu pepimhe chekeu kukutsu papeniye Alhou tsa pesu adou shivetsu cheni.

⁷Nongu kuhakughaqo! Isaya no nongu ghenguno achipishi Alhou launo tungkupu tsa pivae.

⁸‘Timi hipaqoye atsapi loye igihu cheni ikemu panongu mloye ilauno putou anie.

⁹Panonguno abo-kumsa imlla acheni, kughengu timino mlaqhikeu yezah pesu Alhou yezah toi kutsu acheni’ ”

¹⁰Tile Jisu no timiqo vilo pa lau ighilopi panongu kuluno panoqo vilo pi, “Inilo eno ithi-tsaquyilulo!

¹¹Akichilo kiu ilokeno tino timi shikuchhubeve chemoe, ikemu akichi lono ipeghi keuno timi shikuchhubeve cheni.”

¹²Tileno pa khopemino pa lau ighi puzu ishi pi, “Nono pikeu tsano Farisimi mlo putave tsuake noye ithi ani kema?”

¹³Tile Jisu no khochile, “Ipuh kungughalo akeuno shosumo keu subo khikhi aghini keno nhuve nani.

¹⁴Panongu lokutovelo! Panonguye sakiphemi anhethi kighichemiqoke, eno anhethi kighichemi lakhino anhethi kighichemi kutami saphe aye, pama kinikujo azulakilo ilulove cheni.”

¹⁵Ikemu Pitor no pa vilo ishipi, “Kimighipiyekeu tipau nivilo chixechileyi pitsulo.”

¹⁶Jisu no ishi pi, “Noqomi ghi ithikuthumla aphi kesha?

¹⁷Timi kichilo kiu iloni keno papolo ilo puzu avehu shive cheniepi nonguye mtha kesha?

¹⁸Ikemu akichi lono kiu ipeghi nikeno amlo kudauno huthu ipeghi cheni, eno tikithipuno timi shikuchhubeve cheni.

¹⁹Kughengu timi mlo lono alhoksa kukumsu ipeghi puzu ghiqhi chenipe, kutuqhakile chenipe, salha chenipe, puka chenipe, akimki shepe shichenipe eno kutami xishi chenipe.

²⁰Hipaqono timi shikuchhubeve cheni”

²¹Jisu no tipa-a qhive puzu Tur ngo Sidon yeghi qha kudau wuve.

²²Ikelo, Kananmi topumi lakhi tipa qhalo achekeuno pa lau ighino ighamuku pi, “David Nu, o Akijeu! Ikimiyekutu tsulo. Inga ilimi lakhi anike liye tughamino shishe ghimeqhi ani.”

²³Ikemu Jisu no atsa lothi lakhimu li putsamoe. Pa khopemino ighi puzu pa qhuiniju ghi pi, “Li puwuvelo| Liye ningu papesu igha chenie.”

²⁴Jisu no ishi khochile, “Israilmi gholo puhavekeu bheriqo lau likhi ipuwu puanie.”

²⁵Ikemu lino ighi puzu pa zulo qhoqhunhepe puzu pi, “Akijeu, ikuphu tsulo!”

²⁶Jisu no ishi li khochile, “Anuliqo chuqupu ikhi pesu atsuqo pheqhi tsuni keuye achipi kumoe.”

²⁷Lino ishipi, “Tiye tike, Akijeu! Tishimu atsuqo ghi tipanoqo mipeu ghulhu-a lono phekiqhikighi munomugho chuchenie.”

²⁸Tile Jisu no li vilo ishi pi, “Noye akupulu kije akemi topumi lakhi! Nono kiu pulo ani keno tipau oghenguno shivetsuniae.” Ike li ngaye tipa mtsano viluve.

²⁹Jisu no tipa-a qhive puzu Galil Zughi veho susu wuve. Pano atoghi lakhilo iqho puzu tile iqa ae.

³⁰Timi kumzapuno pa lau ighino panoqo gholo ayiku kughupami, anhethi kighichemi, aphi-au kighichemi, atsa piphe kumlami eno kusukinimi kutomo saghino Jisu pukhu phivilo qhitsu; eno pano panoqo shipivitsu.

³¹Kughou atsapiphekumlamino pipheluve, aphi-au kighichemino achipi shive, ayiku kughupamino alacheluve eno anhethi kighichemino ithuluwuve ishi keno timiqoye apuchopungove; eno panonguno Israilmi Lhou akishe tsu.

³²Jisu no pa khopemi pa lau kupuzu pi, “Niye timi hipaqo ghenguno imlo imevae, kughengu panonguye atsala kuthu kutolo igholo ani puzu itehiye chukepu kiumu kuhava. Niye panongu akhuava lono puwoveni shimoe, kughengu panonguye lhoveno alalo iluqiveno sake.”

³³Tileno akhopemino pa vilo ishi iniju, “Timi kughunamokeu-alo khileno timi hijejehi kughulhukulupu achuqupu lukumkhashi ithukulupu kya?”

³⁴Ikelo Jisu no panoqo vilo ishi iniju, “Nonguye ashopa khijehi ani kya?” Panoqono, “Ashopa tsuni eno akha aghulo kinia-kuthua anie.” ipi khochile.

³⁵Ike Jisu no timi aqokitikhi vilo ayeghilo iqalo pi pie.

³⁶Pano ashopa tsuni eno akha ngo ishi ikhipesu Alhou shikimthi puzu tipaqo suphono pesu pa khopemiqo tsu eno akhopemino tipaqo pesu timiqo jetsu.

³⁷Panongu kumtsuno chupuzu aghaqilukhae. Munomugho chukhamovekeu akhopemino ashoghi tsuni kichekutsulu.

³⁸Totimi ngo ititunu kihisumo puzu timi alupu 4000 no chuke.

³⁹Tishieno Jisu no timiqo puwoveno ashuka lakhilo iku puzu Magadan kokuthaqhalo wuve.