Read Sumi Naga MATHI 16 Bible Online

MATHI 16 - Sumi Naga bible

MATHI 16

¹Farisimi ngo Sadukimi khami Jisu lau ighi eno pa pejuniye panonguno pa vilo kungugha lono amchipu lakhi piqipiyelo pi khu.

²Ikemu Jisu no ishi panoqo khochile, “Kughono kijiliu shiveni keno nonguno ‘Atsutsuye huchuyi anikeke atsala aloni cheni’ ipi cheni.

³Inaqhe nonguno, ‘Atsutsuye huchuino zuchiyi anikeke ishiye pasapagha tsala shini chenie’ ipi cheni. Nonguye atsutsulo ju puzu atsalaye kiu toi nani kela pilu cheni, ikemu nonguye hipa ghulokilo amchipuqo kiqimlae!

⁴Kusakugha eno Alhou kumtha tiqhelimino amchipu lakhi phucheni, ikemu Jona michipu nguno alauye amchipu kutau pesu nongu tiqhelimi tsumo nani.” Tishieno paye panoqo qhive puzu wuve.

⁵Akhopemino ayizu hu katha sasu tuxau ikughi kelo, panonguye asho lakhi likhimu sughinikeu kumsumave.

⁶Jisu no panoqo vilo ishipi, “Jukutolo eno Farisimi ngo Sadukimi kholaqhi lono kutokupuyi alo.”

⁷Panongu dolo ishi kuptsakile thuve; “Ninguno asho sughimo kehu paye ishi piani.”

⁸Panonguno kiu piakeno Jisu no ithive puzu panoqo vilo ishipi, “Nongu akupulu kitila likhi akeqo! Nongu gholo asho sughimokeu vehu kushiniye tishi kuputsakile ani kya?

⁹Itehi kutolo nonguye ithi kututa shimla aphi kesha? Ashopa pungu pesu timi 5000 kijetsukeu eno ashoghi khije nonguno lekutsulu ishi keno nonguye kumsuchile mla kesha?

¹⁰Momu ashopa tsuni pesu timi 4000 kijetsukeu eno ashoghi khije nonguno hekutsulu ishi kela kumsuchilemla kesha?

¹¹Niye asho piamokepi kushiye nonguye ithi kututa shimlave kya? Farisimi ngo Sadukimi kholaqhi jukutokupuyi alo!”

¹²Tileno paye panoqo vilo kholaqhi asholo peithachekeu jukutokupuyilo pi anike kumo puzu Farisimi ngo Sadukimino kutsuchekeu lono jukutokupuyi lopi akenapi akhopemiqono ithi kututa shilu.

¹³Kughou Jisu no Kaisaria Filip yeghi kokutha qhalo akeno, pano ishi pa khopemi iniju, “Timiqoye ni Timi Nu pesu khuu kepi picheni kya?”

¹⁴Ikelo panonguno ishipi, “Timi khamino noye Johan Baptist kepi picheni, kutami khamino noye Elija kepi picheni, itaghi khamino noye Jeremiya momu tungkupu kutau lakhi kepi picheni.”

¹⁵Panoqo vilo pano ishi iniju, “Imaye nonguye niye khuu kepi picheni kya?”

¹⁶Simon Pitor no ishi khochile, “Noye xuakeu Lhou nu Mesiya ke.”

¹⁷Jisu no pa vilo pi, “Jona nu Simon, noye akumghapue! Kughengu timi shi-aji kudauno olau hipau pephepiye kekumoe, ikemu iPuh kungughalo akeu noke.

¹⁸Ike ino ovilo pini, noye Pitor ke[5] eno atuqu[6] eno atuqu hipau shou ino ikukuhou shipukuni, eno akithi ghime kuka pimu tipau shou tokulu shimla nani.

¹⁹Kungugha yehkipe khadu ino otsu nani eno ayeghilo nono kiu kiumu lakhavekeu kungughalo ghi lakhavetsu nani; eno ayeghilo nono kiu kiumu phevetsu keulo kungughalo ghi phesuvetsu nani.”

²⁰Tile Jisu no pa khopemi vilo timi khuu vilomu paye Mesiya kepi pikevilopi tsatsayi lakhave.

²¹Tipani nguno Jisu no pa khopemi vilo tuchecheno ishi pithuve, “Niye Jerusalem lo wumasa eno Judami kichimi ngo achinetomi ngo Ayezah kukutsumi pelo aghime tsu-kepu shini cheni, eno ipithivepe nani eno akuthuni ixuputhuve nani.”

²²Pitor no Jisu ku-tsughu puzu ishi pa lomipi, “Ampeu, Alhou nomu lakhamo sheo! Oshou khilemu hipau ikughipemo thono!”

²³Ikemu Jisu no tsughu ideghi puzu Pitor vilo ishipi, “Satan, ilau no wuvelo! Noye ipuxa anie, kughengu noye Alhou no kumsukeulo kumo puzu timino kumsukeulo kumsupuku pe ani!””

²⁴Tisheno Jisu no pa khopemi vilo pi, “Timi khunono ipape nikeno, pa likhi paye khuu keno kumsumave puzu pawu kros xapuno ipapelo:

²⁵Kughengu khunono pano kuxu pukha nikeno ti puhave nani, ikemu khunono ighenguno pa kuxu puhave nikeno ti phulu nani.

²⁶Timi lakhino ayeghi kuchopu pawu shiluve pinamu pa kuxu puwovekepu shive aye timi tipau ghenguno kiu ala shilu akya? momu timiye pa kuxu theli kiu tsulu kepu kya?

²⁷Kughengu Timi Nu ye paPuh wu akimthe jukuvu lono pawu kungumi sasu ighini cheni, eno tileno timi lakhi khino kiu mlapuaghi nikeno tipau lochile nani.

²⁸Kuchouno ino nongu vilo pini, hile puthugho akemi khamiye Timi Nu no payehkipeqha lono ighikeu ithulumoke kutolo akithi michemo nani”