Read Sumi Naga MATHI 2 Bible Online

MATHI 2 - Sumi Naga bible

MATHI 2

¹Herod no akukau shiake ghulokilo Judia ghakhulo Bethlehem phu lono Jisu punu, ikelo kipelauno ayepukighithimino Jerusalem lo ighino ishipi,

²“Judami kukau shipeniye anu punukeu hu khile ani kya? Ninguno kipelauno pa yepu ipeghikeu ithuluvae, eno ninguye pa mlla niye ighi ani.”

³Herod akukauno hipau chilu kelo, pa mlo ighono shipusavetsu, tihutoi Jerusalem lo kuami kumtsuno pa gholo amlo shimove.

⁴Herod no achinetomi ngo Ayezah kutsuchekemi ku kutsu puzu panoqo vilo ishi iniju, “Mesiya ye khileno pununi cheni kya?”

⁵Panonguno ishi khochile, “Judia ghakhulo Bethlehem phu lonoe, kughengu tungkupmino hitoi yepuani:

⁶‘Judia ghakhulo O Bethlehem, Judia lo ayehkipe phughi gholo noye aghulou ye kumoe; kughengu olau no ayekipemi lakhi ipeghi nani, pano iwu Israilmi saphe nani.’ ”

⁷Ike Herod no tuqhouno alokutsumi kusawo panongu launo ayepu ipeghikeu ado khitohi shiveakela iniju kutoluve.

⁸Pano ishi pipuzu panoqo Bethlehem lo puwu: “Wu puzu kishekulushi anu hu phujulo, eno kughou nonguno pa phulu nikeno ipithilo, tishianguno nighi wuno pa mlla nike.”

⁹Panonguno akukau tsa chiluve kethiu panonguye chesu wuve, panonguno kipelauno ithulu puakeu yepu hu itaghi alalo chekelo panongu zulo ipeghi eno tino panongu zuu wuveno anu khile akeno tipa-a mishilo kunguu ngove.

¹⁰Panonguno ayepu ithulu kelo, panonguye alokiqi launo shishe alokivi shive.

¹¹Panonguno aki alou iloghi kelo anu ngo aza Maria pama ithulu, tile panonguno qhoqhunhepe pa mllae. Panonguno agho puchekeu lhaphe puzu shuna, tsungquyikeu mukhu eno tsungquyikeu teli ishi pesu agho pa tsue.

¹²Herod lau idewo pemo nike Alhou no asamouno panoqo kutughuve, ikehu panonguye ala kutauno panoqo ghakhulo idewove.

¹³Ayepu kighithimino idewove kethiu, Ampeuw kungumi lakhino asamouno Josef lau ipeghi puzu ishipi, “Ithulo, eno anu ngo paza pama sasu Ijip lo povelo, ino ovilo pimoke kutolo tilau ngo aghilo; kughengu Herod ye anu pithive nike pa phuju ighini chenie.”

¹⁴Ike Josef no ithughino anu ngo paza pama sasu putho lono Ijip lo wuve.

¹⁵Herod thimoke kutolo tilau ache, Hiye Ampeu no tungkupmi vechewo no “Ijip lono ino inu kulu.” ipi puakeu shikupu niyeke.

¹⁶Ayepu kighithimi no Herod muquqhive keu ithivekelo paye mqhumuza axu ideve. Pano ahza tsu puzu Bethlehem lo ngo tipau cheaxulo kiptimi itimi ampe kini shi aghikeqo eno tinguno ayitiuqo kumtsu ghiqhi pithivepe, tiye ayepu kighithimi launo ayepuye kiu ghuloki lono ipeghi keno tipau Herod no ithilukeu kiqiju puzu shike.

¹⁷Tiye Jeremiya tungkupuno pipuakeu shikupuveke:

¹⁸“Rama phulo asutsa lakhi chilue, kukuno-tshutshushi qakeu eno mlo-qakeu sutsae. Rachel no li tianuliqo ghenguno mlo-qae, lino mlo-qaakeulo alokughunotsu keu milive, kughengu panongu thikhavae.”

¹⁹Herod thive kethiu Josef no Ijip lo akelo Ampeu wu kungumi lakhino asamouno pa lau ipeghino pi,

²⁰“Ithulo, anu ngo aza pama sasu Israilmi yeghilo idewovelo, kughengu anu kuxu phu achekemi ye thiveake.”

²¹Ike Josef no ithu puzu pama sasu Israilmi yeghilo idewove.

²²Arkhelas no papuh Herod thelilo Judia lo akukau shi ani ipikeu Josef no chilu kelo paye tilehi wo ngo nikeu msave. Asmouno itaghi pa kutughu kehutoi paye Galil bocholo wuve

²³eno Nazaret taun ipi chekeulo wupuzu tila acheuve. Tiye tungkupmino, “Paye Nazorio lakhi ipi kunanie.” ipi puakeu shikupu niyeke.