Read Sumi Naga MATHI 22 Bible Online

MATHI 22 - Sumi Naga bible

MATHI 22

¹Jisu no itaghi kimighipiyekeu pesu timiqo putsa.Pano ishipi,

²“Kungugha yehkipeye kukami lakhino pa nu ghenguno kulakupu ghulhu kutope qhikeu toike.

³Kulakupu ghulhulo kusupuakeqo kuwupenike pano aqemi hapuwue, ikemu panonguno ighinishimoe.

⁴Itaghi pano aqemi kutami puwuno ishipi, ‘Kusupuakeqo vilo ishi pilo, Niye ighulhu kutope qhivae, amshitsu ngo amshiti athakupu heqhino thwokha kutope ani. Kulakupu ghulhulo ighilo!’

⁵Ikemu ku-supuakeqono ti jukunathaveno pututa shelo wuve, lakhino pa lulo huve, lakhino pa lhikishialo wuve

⁶eno kutamiqono pa qemi tsuquluveno kuoqhi pithivetsu.

⁷Akukauno axuideveno pawu ghushimi puwu puzu hekiqhimiqo pithive eno panoqo phughi pitivetsu.

⁸Tishino pano pa qemi vilo ishipi, ‘Kulakupughulhuye kishekulu kutope ani, ikemu ku-supuakeqono tipaulo sukuzupu qhemi kumoveke.

⁹Itehiye alaghilalo wupuzu timi khijehi nonguno sholu nikeno tipaqo kulakupu ghulhulo kusulo.’

¹⁰Ike aqemiqono alaghilalo wuno akivimi na alhoksami namu panonguno sholukemi kumtsu kusaghi eno kulakupu kutope akeu-a huye inamino chhive.

¹¹“Akukauno inamiqo juniye iloghi, eno tilehi timi lakhiye kulakupulo ukeu phimini pepumono aghikeu ithulu.

¹²Akukauno ishi pa iniju, ‘Ashou, noye kulakupulo ukeu phimini pepumono hilehi kishi iloghilu kya?’ Timi huye kiu-tsamu pimlave.

¹³Tileno akukauno aqemiqo vilo ishipi, ‘Pa phi a-u pheno khalau akuzulo vephevelo. Tilaye ahu-tsughububu shi qah nani.’ ”

¹⁴Jisu no kishekha ghi pi “Kutomo ku-suke, ikemu aghulo likhi kishelue.”

¹⁵Tileno Farisimiqoye wuveno panonguye pa sasu atsa kutsala keu lono pa kitimeluveniye kuchughupe qhive.

¹⁶Ikehu panonguno panokhopemi khami pelo Herod laumi sasu kumtsa Jisu lau puwu. Tipaqono ishipi, “Kutsuchekeu ninguno ithi anike noye amikuchomi eno timi ghenguno Alhou pulou akeu vehu kuchou nono kutsu cheni, eno kutamiye kishi kumsu aghi nani kela ipi pi chemoe, kughengu noye timino ashouno kiu kiu thotsu shi aghinamu tipau jupesu kutuqukeu shichemoe.

¹⁷Tishiaye noye hipau kishi kumsu anikela nivilo pitsulo. Rommi kukau lau asuqha tsukeu ningu yezah loye achipi keo mokya?”

¹⁸Ikemu Jisu no panoqono muqumgha shi akeu vetha luveno ishipi, “Nongu kuhakughaqo! Nonguye kushiye ikitimeveniye pukaputsa ani kya?”

¹⁹“Asuqha tsuchekeu tsandiyi ipiyejulo!” Panonguno tsandiyi lakhi pa lau sughi,

²⁰eno pano panoqo vilo ishi iniju, “Hiye khuu julho eno khuu je kya?” “Rommi kukauke” ipi panoqono khochile.

²¹Tileno Jisu no panoqo vilo ishipi, “Tishiaye, Rommi kukau wu kiu keno Rommi kukau tsulo eno Alhou wu kiu keno Alhou tsulo.”

²²Kughou panonguno ti chilukeno, panonguye apuchopungoveno panonguno pa qhiveno wuve.

²³Tipani Sadukimino Jisu lau ighi, panonguye xuchilethughikeu kuhakepi pichekeqoke. Panonguno Jisu vilo avehu lakhi iniju ghi

²⁴ishipi, “Kutsuchekeu, Muse no pikeuno, ‘Timi lakhino atianuli kuhano thive aye, pa thikuzuuno pamu nipu achimeu hu sasu kughuna masae, tiye akithiu ghenguno atianuli lhophetsulu kepushi.

²⁵Ningu gholo athikuzumi tsuni acheke, akichiuno akibo shi puzu atianuli shimono thive eno pa nipu achimeu huye pa thikuzuuno valuve.

²⁶Athikuzuu akiniu shou ghi tipaphi shive, athikuzuu akuthuu lono akutsuniu kutolo tipaphi shive.

²⁷Ashekhalo atopuu ghi thive.

²⁸Ike kithimi xuputhuke tsalalo liye khuu nipu shi nani kya? Kughengu liye panongu kumtsu sasu kughuna puani kehu!’ ”

²⁹Ikemu Jisu no ishi panongu khochile, “Nonguye ighono pimi achenie! Nonguye kuchoyesu ghi mtha eno Alhou kuka ghi mthae.

³⁰Kughono kithimi xuputhu nikeno panonguye kungughalo kungumi toive nani eno kulakupu shimove nani.

³¹Kithimi xuputhukeu vehu ghenguye Alhou no nongu vilo kiu pipuani keno nonguye phijumo kesha? Pano ishi pipuani,

³²‘Niye Abraham Lhou, Isak Lhou eno Jakob Lhou ke.’ Paye kuxumi lhou kethono kithimi Lhou kumoe.”

³³Timi aqokitikhiye Jisu no hipau pesu kutsukeu chilu pesu apuchopungove.

³⁴Jisu no Sadukimi ghehasuvae pikeu Farisimino chilu puzu panongu kumtsa ighi.

³⁵Tipaqo gholo lakhiye Ayezah kukutsumike, pano Jisu kitimeniye ishi iniju,

³⁶“Kutsuchekeu, Ayezah lo khipauno ahza tsupuakeu akhotou kya?”

³⁷Jisu no pa vilo pi, “Noye omlo kuchopu okuxu kumtsu, okukumsu kumtsu eno okumto kumtsu pesu Ampeu oLhou qhuivumasae.”

³⁸Hipauno ayezah tsupuakeu gholo kumtsu nguno akhotou eno atughiuke.

³⁹Eno ayezah tsupuakeu akiniu akhotouno hitoi ani. “Noye olikhi okusami okimiyeke toi kimiyelo.”

⁴⁰Muse no sughikeu yezah kuchopu eno tungkupmino kutsuchekeuye ahza tsupuakeu hikuma shou bepe ani.

⁴¹Farisimino kuhokumqo aghikelo Jisu no panoqo vilo ishi iniju,

⁴²“Mesiya vehu nonguye kiu ithi ani kya? Paye khuno polo kughuko kya?” “Paye David polo kughukomike” ipi panonguno khochile.

⁴³Tileno Jisu no ishi iniju, “Tishiaye, kushiye Alhou Ghungu no David kipekulhu puzu pa pelo ‘Ampeu’ ipipe kya? Kughengu David no ishipi.

⁴⁴‘Ampeu no iMpeu vilo ishipi: Ino oghumi pesu opukhu qholo qhitsumoke kutolo, i-u ajeu iqalo.’

⁴⁵Tishiaye, David no pa vilo ‘Ampeu’ ipiaye, Mesiya ye kishi puzu David polo kughukomi shini kya?”

⁴⁶Timi khunomu atsa lakhimu pa khochile mlave, tinguno tilauye khunomu pa vilo kiuala inijunikeu ghi ighuve.