Read Sumi Naga MATHI 23 Bible Online

MATHI 23 - Sumi Naga bible

MATHI 23

¹Tile Jisu no timi aqokitikhi ngo pa khopemi vilo ishipi,

²“Ayezah kukutsumi ngo Farisimino Muse lakhulo iqa anie.

³Tighenguno panonguno kiu nongu vilo pini keno tipau aghokulushi pepimhelo, ikemu panonguno shichekeu shikevilo, kughengu panonguye pikeuye picheni ikemu tipau pepimhe chemoe.

⁴Panonguno akho kimishi khakumqo pesu timi xapipe cheni, ikemu panonguye a-u loti lakhimu chhopuwo tipaqo peqhe kuphunishi chemoe.

⁵Panonguno mlakeu kumtsu timi pelo ithulupeniye mla cheni. Panonguno akishelo ngo aumlolo kuchoyesu-tsa lothi pukeu bohu kije shikithe cheni eno panoqo phishe chijeboboyi shikithe cheni.

⁶Aghulhu shikelo panonguno a-a kiviu mine cheni eno Sinagog lo alakhu akiviu pukha cheni,

⁷alhikishialo kutamino panongu qhoqhukeuno panongu lokutu eno timi pelo ‘Kutsuchekeu’ ipi panongu kupenishike.

⁸Ikemu kutami pelo ‘Kutsuchekeu’ ipi nongu kupe kepu kumoe, kughengu nonguye kutsuchekeu lakhi likhi ani eno nonguye lakhino lakhi sasu athikuzumike.

⁹Nonguye ayeghilo khuu vilomu ‘Apu’ ipi kukepu kumoe, kughengu nonguye kungughalo akeu Apuh lakhi anike.

¹⁰Momu kutami pelo ‘Sakipheu’ ipi nongu kupe kepu kumoe, kughengu nongu sakipheu lakhi akeuye Khristo likhike.

¹¹Nongu gholo khuuno akijeu keno nongu qeu shimasae.

¹²Khunono alikhi akughape suqheni keno tipanoye kuchunive nani eno khunono alikhi ampi pe kuchunini keno tipano suqheve nani.”

¹³“Nongu Ayezah kukutsumi ngo Farisimi ghenguno ahakusapue! Nongu kuhakughaqo! Nonguno timiqo launo Kungugha yehkipe hukikha khavetsu; nonguno iloke kumo puzu tipaulo iloniye pukaputsa akeqo pelo ilopemoe.”

¹⁴“Nongu Ayezah kukutsumi ngo Farisimi ghenguno ahakusapue! Kuhakughaqo! Nonguno topuchimemi kilo pukapuwuve cheni, tishino akighini kushuwa shipesu piyeve cheni. Highenguno nongu ghimeno kumtsu nguno alhoksau shi nanike!

¹⁵“Nongu Ayezah kukutsumi ngo Farisimi ghenguno ahakusapue! Nonguno timi lakhi sawo nochineyeh kupululo suniye akutho ato vechesu wucheni, kughou tishiluve nikeno nonguno pa kughapesu ghuthu kini qhemi nongu toi alhomi yizulo qhive cheni!

¹⁶“Nongu anhethi iche puzu timi saphechekemi ghenguno ahakusapue! Nonguno ishi kutsu cheni, ‘Timi lakhino achineki jeku ashoqhi shi namu kumu kumoe; ikemu pano achinekilo shuna akeu jeku ashoqhi shiaye pa shoqhino pa meluvae.’

¹⁷Nongu anhethi kighichemi, kughuzumiqo! Khikhiuno akhotou kya? Shunano keo shuna pesu akimthe shitsukeu achinekino akhotou kya?

¹⁸Itaghi nonguno ishi kutsu cheni, ‘Timi lakhino akumllagho kibepu jeku ashoqhi shi namu kumu kumoe; ikemu pano akumllagho kibepulo akumllagho akeu jeku ashoqhi shiaye pa shoqhino pa meluvae.’

¹⁹Nongu anhethi kighichemiqo! Khikhiuno akhotou kya? Akumllagho no keo, tipau pesu akimthe shitsu chekeu akumllagho kibepu huno akhotou kya?

²⁰Tishiaye, khuuno akumllagho kibepu jekughiashoqhi shi nikeno, tipau eno tipau shou bepuakeu kumtsu jeku ashoqhi shi anike;

²¹eno khuuno achineki jekughi ashoqhi shini keno, tipau jeku eno Alhou tile achekeu jekuno ashoqhi shi anike.

²²Khuuno kungugha jekughi ashoqhi shi nikeno, Alhou lakhu jeku eno tipau shou iqa akeu jeku ashoqhi shi anike.”

²³“Nongu Ayezah kukutsumi ngo Farisimi ghenguno ahakusapue! kuhakughaqo! Nonguno pulakhu, napa eno thuvu yetsuni kutolo chighi sajelo lakhi Alhou tsucheni, ikemu nonguno Ayezah akhoto qo: achipiu kukutsu, kikimiye eno amikucho kumla shinike kughuchove cheni. Kutauqo ghi kughuchove kepu kumo kemu nonguye hipaqo pepimhe kepuke.

²⁴Nongu anhethi iche puzu timi saphe chekemiqo! Amiyiye kupuha puzu akuha[7] ye munove cheni!

²⁵“Nongu Ayezah kukutsumi ngo Farisimi ghenguno ahakusapue! Kuhakughaqo! Nonguno ajukhu ngo akhu ashou likhi kusu cheni, ikemu tipaqo alouye aghukha shikeu ngo ghasumlakeu no suxasughi keuno chhitoi ani.

²⁶Nongu Farisimi anhethi kighichemiqo! Atughushi akhu ngo ajukhu alou paghi kusuvelo, tishianguno ashou ghi mitheluve nani!

²⁷“Nongu Ayezah kukutsumi ngo Farisimi ghenguno ahakusapue! Kuhakughaqo! Nonguye akumona metsughoyikeu pesu nupe puakeu toike, ashouye aloqhiyi ithulu cheni; ikemu alouye kithimi saghi ngo akutsu kumnano chhitoi anie;

²⁸Tihutoi nongu ghi ashou ye timi kumtsu lau akivimi hutoike, ikemu nongu lo alouye akimki ngo kuhakughano chhitoi anie.”

²⁹“Nongu Ayezah kukutsumi ngo Farisimi ghenguno ahakusapue! Kuhakughaqo! Nonguno tungkupumi kumona shitsu cheni, eno kivimi ghenguno athigho jukivipu shitsu acheni,

³⁰eno nonguno ishi picheni, ‘Nipuasuqo tsala ghulokilo ninguno xuake aye, panoqono tungkupumi pithichekeulo ninguye su-moni cheke.’

³¹Ike tishiaye, nonguye tungkupumi ghiqhikemi nulike pi nongu ampino ashepe shi ani.

³²No puasunoqono kiu huthu puatsuakela shi tavelo!

³³Nongu apighiqo, eno apighitiqo! Amino aghime tsukeu lono nonguye khileno pokulupu kya?

³⁴Ike ino nongu vilo pini; ino nongu lau tungkupumi, akighithimi eno kutsuchekemi puwu nani, tipaqo khami nonguno pithivetsu nani, khamiye kros lo yedave nani, eno khamiye nongu Sinagog lono ghiqhi nani, eno taun atsu-tsulo tipaqo hakuqoqhi nani.

³⁵Ikehu akipimi kuhakemi kumtsu pithiveke ghenguno akipimi kuha keu Abel pithivekeu lono Barakhiya nu Zakharia, khuu achineki bocho ngo akumllagho kipti-a kuma dolono nonguno ghiqhive keno tipa kithi kutolo aghime nongu shou ikughi nani.

³⁶Kuchouno ino nongu vilo pini, itodolo akemiqo shou hipaqo kumtsu lame aghime ikughi nani!”

³⁷“O Jerusalem, Jerusalem! nono tungkupumi pithivetsu eno aghinimi olau puwukeqo atupesu veqhivetsuke! Awuquno achishibo qholo litiqo vakutsulu keshi ghuthu khijejehi niye owu timiqo ilau hekutsulu nishi acheni kya?

³⁸Julo, nongu ki phevae eno timi kughunamae.

³⁹Kughengu ino nongu vilo pini, nonguno, ‘Ampeu jelono ighi akeu Alhou no pa kumghatsu peniu!’ ipi pimoke kutolo nonguye khilemu ni ithulu kithemo nani!”