Read Sumi Naga MATHI 3 Bible Online

MATHI 3 - Sumi Naga bible

MATHI 3

¹Tipa ghulokilo Johan Baptist no Judia lo timi kughunamokeu qhalo ighi eno asheshu ae.

²“Axine lono Alhou lau xaideighivelo, kughengu Kungugha yehkipeye kupunuvae!” ipi pano pie.

³Isaya tungkupuno puzuuno ishi pipuakeu huye Johan vehu pipuanike: “Khukelano timi kughunamo keu-a lono ishi asheshu anie, ‘Ampeu laghi kutope qhilo, pano wuniye akeu laghi mzuchoyi shitsulo.’ ”

⁴Johan ye kemel mhino shikeu phimini pue, ashiyikono apokha shikeu pesu papo khapu eno leusu ngo aghalo khingozuno pa chuqupu shiche.

⁵Jerusalem lo ngo Judia bocholo eno Jordan ghakhu qha kumtsulo timi akeqono Johan lau wue.

⁶Timiqono panoqo xine pipheve eno pano panongu Jordan lono baptiz shitsue.

⁷Kughou Farisimi ngo Sadukimi kutomono baptiz shitsupe niye cheghi keu Johan no ithulu keno, pano panoqo vilo pi, “Nongu apighi tiqo! Khuno nongu kutughu puzu Alhou loghu chekeu lono polule pi kya?

⁸Nonguno axine lono Alhou lau xaideghi keu qhemi mlape piyelo

⁹eno nongu likhi nongu kijivilo ghi, ‘Ningu papuh ye Abraham ke,’ ipi kumsu akevilo. Ino nongu vilo pini, Alhou ye atu hipaqo ikhi pesu Abraham ghenguno atianuli kughulhove tsulu nanie!

¹⁰Amughuye itehimu asubo akuhu lono yeqhive nike kutope anie, tighenguno asubo khipaqono alothi kivi pithimo nikeno yeqhipe amilo vesuve nani.

¹¹Niye azu pesu nongu baptiz shitsu cheni, tiye nonguye axine lono Alhou lau xaide ghiveapi piyekeu ke, ikemu ithiu milakhi ighini akeuye Aghungu Kimthe eno ami pesu nongu baptiz shitsu nani. Paye inguno shishe akijeue; niye pa pukhu kuqho mu petsu kuzupu kumoe.

¹²Pa ulo athi fuleve kepu phigha peani, eno pano pa niqa shikimthe puzu pa thi pekutsusawo alelo su nani, ikemu amu-uye ghapinhemla keu mi lono piti nani!”

¹³Tile Jisu ye Galil lono Jordan lo wuno Johan pelo pa baptiz shivetsupe nike ighi,

¹⁴Ikemu Johan no pa lakha ghi ishipi, “Nono ikughape baptiz shitsu kepu thono, khilauno nouno ilau ighi ani kya?”

¹⁵Ikemu Jisu no pa khochile. “Itehiye hitoi shive aghi pelo, kughengu ishi shikeu lono Alhou no amikucho kiu avehupu shiani keno kumtsu ninguno shikupuluni chenie.” Tileno Johan no pulovetsu.

¹⁶Jisu no baptiz shilukelo pano azu lono ithughi kemtsa kungugha khaqhitsu eno Alhou Ghungu no miqhedu lakhi toi iqighino pa shou ngove keu pano ithulu,

¹⁷Tile kungugha launo asutsa lakhino ishipi. “Hiye iNu ino qhuyivulayi chekeuke, pa shou imlokiqi acheni.”