Read Sumi Naga MATHI 4 Bible Online

MATHI 4 - Sumi Naga bible

MATHI 4

¹Tile Aghungu Kimithe no timi kughunamo keu alo Jisu sasu wuve, tiye tughami pelo ghuju peni yeke.

²Paye putho-pucho tsala lhobidi achuqupu chumono ae, ikehu Jisu ye shishe mzuthive.

³Ghukujuu no pa lau ighino pi, “Noye Alhou Nu ke aye atu hipaqo vilo asho ilhove lopi ahza tsulo.”

⁴Ikemu Jisu no khochile pi, “Kuchoyesulo ishi pipuani, ‘Timiye achuqupu likhino xulu chemoe, ikemu Alhou no pikeu tsa shou bepe xulu nanie.’ ”

⁵Tithiu Ghukujuu no Akimthe phughilo Jisu sawuno achineki kutsuqalo ngope,

⁶eno pa vilo ishipi, “Noye Alhou Nu kena piaye, ilhe iqivelo; kughengu kuchoyesulo ishi pipuani: ‘Alhou no pawu kungumi pelo otucho luvepe nani, Panonguno panongu-u lono okhapeluve nani, Tishianguno opukhu pelo atu shou pusupukulu pemo nani.’ ”

⁷Jisu no pa vilo pi, “Itaghi kuchoyesulo ishi pi puanie, ‘Noye Ampeu oLhou ghuju kepu kumoe.’ ”

⁸Tileno Ghukujuu no ighono chuqumughai keu naghuto lakhilo Jisu sawu eno ayeghilo akukaqha jeli kumtsu eno tipauye kiutoi kijekeno pesu pa piye.

⁹Ghukujuuno Jisu vilo pi, “Nono itsaiqi puzu imlla aye, ino hipaqo kumtsu pesu otsuni,”

¹⁰Tile Jisu no pa vilo pi, “Chevelo, Satan! Kuchoyesulo ishi pipuani,’Noye Ampeu oLhou mllalo eno pa qeu likhi shialo!’ ”

¹¹Tileno Ghukujuuno pa qhive, eno kungumi ighino pa huthu auve.

¹²Johan kughape akughushivae pikeu Jisu no chilu kelo pa ye Galil lo ide wove.

¹³Paye Nazaret taunlo ngomove puzu wuve eno Galil zughi phivilo Kapernaum taunlo acheuve. Hiye Zebulun ngo Naftali kuma kokutha bocholoke .

¹⁴Tiye Isaya tungkupuno pipuakeu shikupuni ye ke:

¹⁵“Zebulun yeghi ngo Naftali yeghi, Azughi kudau Jordan katha iku kelo, kutami shiayeqo wu Galil!

¹⁶Akuzulo achekemino akuvu kije lakhi ithulue, Akithi zumoyike yeghilo ngo achekemi shou akuvuno yepuvuvae!”

¹⁷Tithiuye Jisu no ishi asheshu, “Axine lono Alhou lau xaide ghivelo; kughengu Kungugha yehkipeye kupunu khoivae!”

¹⁸Jisu no Galil zughi phivilo wuchekelo, pano athiazu mikini ithulu, Pitor ipi kuvetsukeu Simon ngo pa thikuzu-u Andrew pama akhame pesu azughilo akha vecheghi, kughengu pamaye akha kukhamike,

¹⁹Jisu no pama vilopi, “Igholo ighilo, ino nokujo pelo akha khalukeshi timi kulukemi shipeni.”

²⁰Pamano mtazu pama khame qhiveno pa gholo wuve.

²¹Tileno chesu wuchekelo Jisu no kutami athiazu mikini ithulu, Zebede nu Jems ngo pa thikuzu-u Johan pamano ashukalo pama papuh sasu akhame kishekulu kuto aghi. Jisu no pama ku kemtsa,

²²pamaye ashuka ngo pama papuh ishi qhive puzu pa papesu wuve.

²³Jisu no Galil qha kumtsulo wupuzu Sinagog lo timiqo kutsu eno akukayeh wu lokivipu sutsa pesu asheshu, eno timiqo gholo akusu puaghikeu jeli eno kusukini shi aghi keu jeli kumtsu pano shipivitsu.

²⁴Pa jekipiye Siriya yeghi bocho kumtsulo vekuphawove, ikehu akusupu jeli thwokha lono ichhe-ime aghikeqo kumtsu, eno suaghikeu, tughakusano sa-aghikemi, kilighakipemi, eno aghi-anhu thivekemi pa lau saghike Jisu no panoqo shipivitsue.

²⁵Aqokitikhi kumzapuno pa papesu che eno timi tipaqoye Galil, Aphu Chighilo, Jerusalem lo, Judia lo eno Jordan nguno tuxau akeu yeghi lono ighikemiqoke,