Read Sumi Naga MATHI 9 Bible Online

MATHI 9 - Sumi Naga bible

MATHI 9

¹Jisu no ashuka lakhilo ilo puzu azughi kathasu taunlo ighi.

²Tilehi timi khamino anhu kusumi lakhi azualo puzu pesu pa lau ighi. Kughou Jisu no timi tipaqo kupulu ithulu keno anhu ithamlakeu timi vilo pi, “Anu, omlo mutotoi lulo, oxine pevetsuae.”

³Tileno Ayezah kutsuchekemi khamino pano likhi pano putsa ghi ishi pia, “Timi hipauye Alhou thaighake tsa piani!”

⁴Panonguno kiu kumsupu akeno Jisu no ithiveno ishipi, “Kushiye nonguye amlolo alhoksa tikithipu kumsu cheni kya?

⁵‘Oxine pevetsuae’ ipikeuno mlaleyi keo, ‘Ithu puzu alachelo’ ipi keuno akumlau kya?

⁶Ikemu ni Timi Nu ye ayeghilo akelo axine pevetsukulupu kuka akeu nongu pelo ithi peni.” Tishi pipuzu pano anhu ithamlakeu vilo pi, “Ithulo, ozua kuqha ikhiqhelulo eno akilo wolo!”

⁷Timi huno ithu puzu akilo wove.

⁸Timiqono ti ithulu kelo panonguye msave eno Alhou no hitoi keu kuka timi tsukeu ghenguno Alhou sheqhetsue.

⁹Jisu no tipa-a qhiveno chesu wuche kelo, pano asuqha kuqhami lakhi ithulu, pa jeye Mathi eno paye pawu hiyam lo iqa aghi. Jisu no pa vilo ishipi, “Igholo ighilo.” Tile Mathi no ithu puzu pa gholo wuve.

¹⁰Kughou Jisu no akilo alibe chu akeno, asuqha kuqhami kutomo eno Judami yehlono levekemiqo ighi puzu Jisu ngo pa khopemi gholo kumtsa chuae.

¹¹Kughou Farisimino ti ithulu keno, panonguno pa khopemi vilo pi, “Nongu kukutsuuye kushiye asuqha kuqhami ngo Judami yehlono levekemi gholo kumtsa chu cheni kya?”

¹²Ikemu Jisu no ti chiluve puzu ishi khochile, “Timi khunoqono vi ani keno panoqoye shikipivimi avehupu kuhae, ikemu khunoqono su ani keno shikipivimi avehupue.

¹³Wu puzu kuchoyesulo hipatsa akeu kiqiye kiu kela phijulo, ‘Niye kimiyekini lunishike thono lhoxu heqhipe mlla keu khuamoe.’ Niye achipiu shichekemi kuniye ighi kekumoe ikemu axinemi kuniye ighike.”

¹⁴Tileno Johan Baptist khopemino Jisu lau ighi puzu ishi iniju, “Kushiye niqomi ngo Farisimi ye kumvu acheni puzu okhopemiye khilemu kumvu chemo kya?”

¹⁵Jisu no ishi panoqo khochile, “Kulakupulo kusu puakeqoye kulapuuno panoqo gholo aphiloghi amlokusa shi achenipe kesha? Khilemu tishi chemoe! Ikemu panoqo gholono kulapuu ikhisuwuve kepu tsala ighi nani, tithiuno panonguno kumvu nani.”

¹⁶“Khunomu aphi akithe suwo aphiminiqalo tsughuda puku chemo, kughengu tsughuda puku keuno ichheveno aphimini suxu kitheve cheni, eno akikighipe kije shikithevetsu cheni.

¹⁷Momu timi khumu atsayiji kithe suwo ashiyiko hughi aqalo suchemo. Tishiaye ashiyikono shikeu hughi hu mpaveno atsayiji peleve nani eno ahughi hu adou shive nani. Ikemu atsayiji kithe hu suwo ashiyiko hughi akithelo su cheni eno tikuma kinikujo akivishi pualu nani.”

¹⁸Jisu no hipatsa panoqo vilo pi akelo, Judami gholo ayehkipemi lakhi ighi eno pa zulo qhoqhunhepe puzu ishipi, “Ingaye itehino thivae, ikemu ighi puzu o-u pesu li shou betsulo tishiaye liye xuluve nani.”

¹⁹Ike Jisu no ithu puzu pa papesu wuche eno pa khopemi ghi pa gholo wue.

²⁰Tile totimi lakhi ampe chighikini aji-po chekemino Jisu thiu ighi puzu pano uchekeu phishelo bu.

²¹Lino lilikhi livilo ishi piae: “Ino pa phimini likhimu buluaye niye viluve nani.”

²²Jisu no igho ighi puzu li ithulu kelo ishi pi, “Angao, amlo muto lulo, okupuluno oshipiviluvae.” Tipa mtsa totimi huye viluve.

²³Jisu no akijeu kilo ighikelo, timi thivekelo fulili ighakemi tile aghi eno timiqono mubumghuyi aghike ithulu.

²⁴Jisu no ishipi, “Timi kumtsu ipevelo! kughengu angailimi huye thimphie, liye zuanie!” Timiqono pa junu.

²⁵Kughou timiqo khalau ipeve keno, pano akilo ilo eno li ulono sunheputhu eno lino ithughive.

²⁶Tipa yeghiqha kumtsulo hipau sutsa kulhawove.

²⁷Jisu no tipa-a qhivenochesu wuchekelo, anhethi kighichekemi kinino pa pape ighino ighamuku puzu ishipi, “David Nu, ni kimiyekutu tsulo!”

²⁸Jisu no akilo ilove kelo, anhethi kighichemi pamano pa lau ighi, ikelo pano pama vilo ishi iniju, “Niye hipau shilu nani kepi nokujoye pulu anima?” Pamano khochile, “Tishilu nanie, Akijeu!”

²⁹Tileno Jisu no pama nhethi bupuzu pi, “Nokujo kupulu toi shilupeni!”

³⁰Tile pama nhethi viluve. Jisu no tsuikhomo pama lakha ghi ishipi, “Khuu vilomu hipau pi kevilo!”

³¹Ikemu pamano wuve puzu Jisu ghilipesu tipa yeghiqha kumtsulo pikulhavetsu.

³²Panonguno wuchekelo, atsapi kumlami lakhi Jisu lau sasu ighi. Pano atsa pimlakeuye pa lolo tughami akehue.

³³Tughami hu haphevetsu kemtsa, atsapimlano akeu huno atsa piluve. Timiqono akichiqhiveno ishipi, “Israil lo hikithipu ninguye khilemu ithumla aphie!”

³⁴Ikemu Farisimino ishipi, “Paye tughami shou atouno akuka tsukeu pesu tughamiqo haphe cheni!”

³⁵Jisu no aphughilo ngo aphulo wupuzu Sinagog qo lono kutsu eno Alhou yehkipe wu lokivipu sutsa pesu asheshu, kusukinimi eno tomochhimokeu kusumi ajeli kutomo pano shipivitsu.

³⁶Pano aqokitikhi ithulu kelo panoqo ghenguno pa mlo shishe ighiqhiyive, kughengu panonguye akheu kuhakeu bheriqo toi shiluksa shi ae eno kuphukemi kuha.

³⁷Ikehu pa khopemi vilo pano ishipi, “Ghile hukepuye kupukunoshi ani, ikemu ajumi aghulo likhie.

³⁸Tighenguno ghile mipeu pelo ajumi puhutsu penike inikhulo.”