Read Sumi Naga MARK 10 Bible Online

MARK 10 - Sumi Naga bible

MARK 10

¹Jisu no tipa-a qhiveno Judea ghakhuqhalo Jordan kathasu wuve. Itaghi timi aqokitikhino pa lau kumqo ighino thosulo toi pano panoqo kutsu.

²Farisimi khami pa lau ighi eno pa miqeju ghi iniju, “Timi lakhiye pa nipu jumu venikeu ningu yezahlo achipikema?”

³Jisu no ti khochilekeu shi-ghi panongu vilo avehu lakhi iniju: “Muse ye nongu lau kiu ahza tsu puani kya?”

⁴Panonguno khochilekeu no, “Muse no shilu naniepi pipuakeuno timi lakhiye pa nipu pheve nikeu kaku yepe qhiveno pa nipu puwuve lepi puani.”

⁵Ikemu Jisu no panoqo vilo pi, “Nongu mlo kumka ghenguno Muse no hipau zahkutsu yepe qhitsuke.

⁶Ikemu inahuu lhoke lono ishi pi puani, ‘Alhou no panoqoye kiptimi eno totimi shi-ghi lhope qhie.’

⁷Eno highenguno timi lakhiye papuaza qhiveno pa nipu sasu kumtsa ngove cheni

⁸eno pamaye ashi lakhi shiwuve cheni. Ikehu pamaye kini kumoe ikemu ashi lakhi shivae.

⁹Tighenguno Alhou no khikhi lakhi shi kimevetsu akeno kuixape kevilo.”

¹⁰Panongu akilo ilo ngo akelo, akhopemino Jisu vilo itaghi hipau vehu iniju.

¹¹Ike panoqo vilo ishi pi, “Timi khuno pa nipu pheve puzu totimi kutami sasu kughuna wuveni keno, paye pa nipu shou akumou shighi salhavae;

¹²eno tihutoi totimi khuno pa kimi pheveno timi kutami sasu kughunawuve aye, liye salhavae.”

¹³Timi khamino Jisu lau itimiqo sasu ighikeuye pa pelo panoqo shou a-u beno kumghatsu peniyeke, ikemu akhopemino timi tipaqo lomipi.

¹⁴Jisu no kughou ti ithulu keno axuideveno pa khopemi vilo ishi pi, “Itimiqo pelo ilau ighi pelo, panongu lakha kevilo, kughengu Alhou yehkipeye itimi hitoikeqo wuke.

¹⁵Kuchouno ino nongu vilo pi ani, khunono itimi lakhi toi shieno Alhou pelo pa shou akukau shipemoni keno paye Alhou yehkipelo ilomla nani.

¹⁶Jisu no pa-u panoqo lakhi khi shou be puzu panoqo kumghatsu.”

¹⁷Jisu no itaghi izuwuniye che kelauye, timi lakhi poiqhoghi puzu pa zulo qhoqhunhepeno pa vilo ishi iniju, “Kutsuchekeu akiviu, niye lhokta kuxu ithulu nike ghenguno kiu shimasa kya?”

¹⁸Jisu no pa vilo iniju, “Noye kushiye ivilo akiviu ipi kya? Alhou likhi no akivi kethono timi khumu akivi kumoe.

¹⁹Alhou no ahza tsupuakeu hu nono ithi aghi nanike: ‘Timi ghiqhi kevilo, kutami nipu sasu salha kevilo, puka kevilo, akimki lono timi shepe shitsu kevilo, pishiqhi kevilo, opu aza gihulo.’ ”

²⁰Timi huno pi, “Kutsuchekeu, ino lhothemi shi aphi lono ahzakutsu hipaqo kumtsu pelu ighivae.”

²¹Jisu no anhe sukuqumono paju puzu amloighiqhiyive eno pa vilo ishi pi, “Noye avehu lakhi shikepushi aphie, wolo, nono akeu kumtsu jevelo eno jelukeu pesu kumlhomi tsuvelo eno noye kungughalo kinikulu shi nani, tishieno ighi puzu ipapelo.”

²²Tipau pikeulo timi huye pagi khummuyive eno pa mlo ghimeshi wove, kughengu paye ighono kinimike.

²³Jisu no ighowo pa khopemiqo jupuzu panoqo vilo ishi pi, “Kinimi ghenguno Alhou yehkipelo iloluni keuye kiu toi kushokutsupu kela!”

²⁴Akhopemi qoye pano hipatsa pikeulo akumzave, ikemu Jisu no panoqo vilo itaghi ishi pi, “Tiqhelimiqo! Alhou yehkipelo ilolu nikeu kiu toi kushokutsupu kela!

²⁵Kinimi lakhino Alhou yehkipelo ilolu nikeuye kemel no ayipuki lono ipupili wuve keuno mlaleyike.”

²⁶Ikelo akhopemiqoye akumzaqhiyi kitheve, eno lakhino lakhi vilo ishi iniju, “Tishiaye khuu xakulupu kya?”

²⁷Jisu no panoqo jupuzu ishi khochile: “Timi ghenguye alikhi axakuluputsa kuhae, ikemu Alhou ye panoqo xakulupu ani, kughengu Alhou ye thwokha shiluve nani.”

²⁸Tile Pitor no Jisu vilo ishi pithu, “Julo, ninguye thwokha qhiveno ogholo cheni.”

²⁹Jisu no pi, “Kuchouno ino nongu vilo pini timi khuuno ighenguno eno alokivipu sutsa ghenguno chepu-cheli, apu-aza,ati-anuli momu aki-alu pheveni keno,

³⁰paye hipa ghulokilo nguno alau kutomo ithulu nani. Paye hipa ghuloki lonomu chepu-cheli apu-aza, ati-anuli, aki-alu aqhe kutolo eno shikighimekeu ithulu nikeno ighi nikeu ghulokilo lhokta kuxu ithulu nani.

³¹Ikemu atughushikemi kutomono ashekhami shive nani, eno itehi ashekha shiakemino atughumi shive nani.”

³²Panonguno Jerusalem lo iqhoniye alalo Jisu no atughu shieno chechekelo, akhopemiqoye kuhokihe eno pa thiu chechekeqono msaqhiyiche. Itaghi Jisu no akhopemi chighikini kutashi sawuve puzu pa shou kiu kishiveni cheni keno tipau pesu ishi pithu.

³³“Julo, ninguye Jerusalem lo iqho cheni, eno tilano ni Timi Nu ye achinetomi ngo Ayezah kukutsumi lau kughapesu sawuve nani. Panonguno pa pithivepe nikeu shi pa koleqhive nani eno Judakumomi ulo suvetsu nani.

³⁴Tipaqono pa pithive nani, eno atsala kuthu thiuye pa xuputhuve nani.”

³⁵Zebidi nu Jems ngo Johan pamano pa zuu ighi puzu pa vilo ishi pi, “Kutsuchekeu, nikujono kiu ovilo khunikeno opelo nighenguno shitsu penishi ani.”

³⁶Jisu no pama vilo ishi iniju, “Ipelo nokujo ghenguno kiu shitsupe nishi ani kya?”

³⁷Pamano ishi khochile, “Kughou ojekipi kukaqhalo akuka lakhulo nono iqani keno, nikujo pelo lakhino o-u ajeu eno lakhino o-u piyiu iqalu pelo.”

³⁸Ikemu Jisu no pama vilo pi. “Nokujoye nokujono kiu khuani kela mthae. Nokujoye ino shoniaye akeu jukhu lono sholu nani ma? Momu ikughape baptiz shikeu paphi shi nokujo ghi baptiz shipelu nani ma?”

³⁹Pamano ishi khochile, “Nikujoye tishipelu nani.” Jisu no pama vilo ishi pi, “Ino shoniye akeu jukhu lono nokujo ghi kuchouno sho nani eno ikughape baptiz shikeu paphi shi nokujo ghi baptiz shipe nani.

⁴⁰Ikemu i-u ajeu eno i-u piyiu iqape nikeu, ‘Tishipeni’ ipi niye pivetsu mlae, ikemu khunoqo ghenguno kutope qhipuani keno tipaqo tsukepu shi nani.”

⁴¹Kughou akhopemi pano chighi huno hipau chilukeno panonguye Jems ngo Johan pama shou axuideve.

⁴²Ikehu Jisu no panongu kumtsu pa lau ku-kutsu no pi, “Nonguno ithianike, timi khunoqono Ashiayehqo shou ayehkipemi shikepushi keno tipaqo no ampeu shiauve cheni, eno panongu wu sakiphemino panoqo shou ayehpe auve cheni.

⁴³Ikemu nongu gholo tihutoi shimoni; nongu gholoye khuno kije shi nishi keno paye kutami qeu shimasae,

⁴⁴nongu gholo khuno atughiu shi nishi keno paye kumtsu qeu shimasae.

⁴⁵Kughengu ni Timi Nu ghi timi pelo pa qepeniye ighike kumoe ikemu kutami qeniye eno pa kuxu pesu timi kutomo xachilelu nike ighi.”

⁴⁶Panonguno Jerikho tolu; eno Jisu no pa khopemi ngo timi aqo kitikhi ishi sasu wuchekelo, anhethi ichevekemi lakhi pa je Timeu nu Bartimeu, ala phivilo iqano khuchu ae.

⁴⁷Pano chilukeuno hiye Nazaret no ghami Jisu cheniepi chilu eno pano ighamuku thuve eno pi, “David nu Jisu, ikimiyeqhiyi tsulo!”

⁴⁸Timi kutomono pa sakiyi eno pa vilo inaqhoivelo pi;ikemu pano alau shi vekipighi igha, “David nu, ikimiyeqhiyi lo!”

⁴⁹Jisu no ngove eno pi, “Pa kulo.” Ikehu panonguno anhethi kighicheu hu ku eno pi, “Olokivipue, ithulo paye oku ani.”

⁵⁰Anhethi kighicheu huno pa phi xave puzu, ilheithughino Jisu lau ighi.

⁵¹Jisu no pa vilo iniju, “Noye ipelo oghenguno kiu shitsu penishi ani kya?” Anhethi kighicheuno Jisu vilo pi, “Akijeu, niye ithulu kithevenishi ani.”

⁵²Jisu no pi, “Noye wolu nani, okupulu no oshipivivae.” Paikhavino paye ithuluve eno alalo Jisu papesu wuve.