Read Sumi Naga MARK 11 Bible Online

MARK 11 - Sumi Naga bible

MARK 11

¹Panonguno Jerusalem kupunulo Bethpage ngo Bethani lo ighi kelo, Oliv to lono pano pa khopemi kini azuuno puwu-ghi pi,

²“Nokujo zulo aphu akeulo wulo, eno nokujono ti tokemtsa gadahati lakhi, timi khuu nomu iku-iqa mphikeu tshupe puaghikeu nokujo no ithulu nanike, ti kuqhope saighilo.

³Timi khualano nokujo vilo, ‘Nokujoye kushiye tishi ani kya?’ ipi iniju aye pa vilo ishi pilo, ‘Ampeu no hipau avehupu shiani eno keyi hilau tsu chile puwovetsu nanike.’ ”

⁴Ike pama no wuno alaghilalo ahukikha lakhilo gadahati lakhi tshupuaghike ithulu, pamano ti kuqho akelo,

⁵tile puthugho aghi kemino pama vilo iniju, “Nokujoye kushiniye gadahati tipau kuqho ani kya?”

⁶Jisu no pama vilo pikeu tsa pesu panoqo vilo pive, ikehu panonguno pama pelo sawuvepe.

⁷Pamano Jisu lau gadahati hu saghi, eno panongu ku-uphi tipau shou xape be eno Jisu no tipau shou iqa.

⁸Timi kutomono panongu ku-uphi alalo qhatsu, eno kutami khamino aluzalo asutsuni loka miche suwo qhatsue.[3]

⁹Timi azuu ngo athiu chekeqono ishi ighamuku, “Alhou shelo![4] Ampeu je lono chekeu Alhou no kumghatsu pelo!

¹⁰Nipu David kukaqha ighini kuau hu Alhou no kumghatsulo! Kungughalo kuau Alhou shelo!”

¹¹Jisu no Jerusalem lo ighino achineki lo ilono thwokha kumtsu hemxa jukutoe. Ikemu tipani munuve kehu pa khopemi chighikini sasu Bethani lo wuve.

¹²Tishiwo thoghiu, panonguno Bethani qhiveno wuche kelo Jisu ye muzuthive.

¹³Pano putouno khughuthibo lakhi anipano mini boboshi akeu ithulu, ike pano tipaulo alothi pithi aghinimalaye juniye tila wue. Kughou pano tile ighi keno anipaqo likhi thono kiumu ithumlae, kughengu khughuthi pithikeu tusho kumo kehu.

¹⁴Jisu no khughuthibo vilo pi, “Timi khuu pelomu hinguno hilauye oxathi chupemoni!” Pano pikeu tsa akhopemino chiluve.

¹⁵Kughou panonguno Jerusalem tolu keno, Jisu no achineki lono je aghi kemi ngo qhuaghikemi kumtsu haphe thu. Pano pisa kilitsu aghikemiqo kibepu-a ngo kubutur je aghi kemiqo lakhu ngo ishi tukuluvetsu,

¹⁶eno khu-u pelomu kiumu pesu achineki bokutha kathaghi wupemove.

¹⁷Tishieno pano timiqo vilo ishi kutsu, “Kuchoyesulo ishi yepuani, ‘Ikiye timi kumtsu ghenguno akighini ki lakhi ipi ku nani.’ Ikemu nonguno hipau pesu kupukami kughutshu-a kughulho vetsuae!”

¹⁸Achinetomi eno Ayezah kukutsumino hi chiluve, ike panonguye Jisu pithive nike alaghi phuthuve. Ikemu timi aqokitikhi kumtsuno pano kutsukeulo thughuyi akehu panonguye pa msae.

¹⁹Kughou avela shive keno Jisu ngo pa khopemi ishi taun lono wuve.

²⁰Thanau inaqhe panonguno alalo wuchekelo, khughuthibo hu akuhu kutolo thizummyive aghikeu ithulu.

²¹Pitor no ti kumsuchileluno Jisu vilo pi, “Kutsuchekeu, julo, khughuthibo nono musu-inivekeu hu thizummuyivae.”

²²Jisu no panongu vilo pi, “Alhou lau akupulu alo.

²³Kuchouno ino nongu vilo pini, nongu khuno naghuto hipau vilo, ‘Iqesu azughilo ilu lovelo’ ipinikeno, omlolo lipi mono tiye shikupu nani putsakepi pulu aye oghenguno ti shivetsu nani.

²⁴Tighenguno akighini lono kiukiumu khunikeno, nonguye ti ithulu nani kepi pululo, eno tiye nongu wu shiluve nani.

²⁵Kughou nonguno puthughono Alhou lau inikhuni keno, timi kutami shou mopikepu kiuala aghiaye ti qhivetsulo, tishianguno kungughalo nongu paPuh no nongu kipimi qhivetsu nani.

²⁶[Ikemu nonguno kutami kipimi qhivetsukeu kuha aye, nongu paPuh kungughalo akeu ghi nongu kipimi qhivetsumo nani.] “

²⁷Panonguno itaghi Jerusalem lo ighi. Ike Jisu no achinekilo chechekelo, achinetomi ngo Ayezah kukutsumi eno kichimiqo pa lau ighi,

²⁸eno panonguno pa vilo iniju, “Kiu kuka pesu noye hipaqo shi cheni kya? Khuno hipaqo shikepu kuka otsu kya?”

²⁹Jisu no panongu khochile, “Ino nongu vilo kiukela lakhi inijunike ikhochilelo, tishianguno niye kiu kuka pesu hipaqo shi cheni kela ino nongu vilo pini.

³⁰Johan no baptiz shitsuchekeu huye Alhou launo akuka tsukeo timi launo kya? Ikhochilelo.”

³¹Panongu dolo ishi kutsalakile ae, “Ninguno ‘Alhou launoke’ ipi aye, pano, ‘Tishiaye nonguye kushiye pa pulumo kya?’ ipini cheni.

³²Ikemu ninguno, ‘Timi launo’ ipinike kishimoe.” Panonguye timiqo msave, kughengu timi kumtsuno Johan ye tungkupmi kuchou lakhike pi kumsupusu ache.

³³Ikehu panonguno ishi Jisu khochileve, “Ninguye mthae.” Jisu no panoqo vilo pi “Tishiaye ino kiu kuka pesu hipaqo shi cheni kela, nighi nongu vilo pimoe.”