Read Sumi Naga MARK 13 Bible Online

MARK 13 - Sumi Naga bible

MARK 13

¹Jisu no achineki lono ipe chekelo pa khopemi gholo lakhino pa vilo pi, “Kutsuchekeu, julo atu jukivi eno aki shipuakeqo jukivino aghileke!”

²Jisu no khochile, “Noye aki kuloghi hipaqo juani kesha? Hile atu lakhimu lakhi shou bepekile move nani hipaqo kumtsu tuleqhive nani.”

³Jisu ye oliv tolo iqa puzu aghungulo achineki kudau juakelo, Pitor ngo Jems eno Johan eno Andrew ishi likhi akelono pa vilo iniju.

⁴“Hiye kughono tishiveni cheni keno nivilo pitsulo, hipaqo thwokha shikupuni kelo kiuno amchipu shi nani kya?”

⁵Jisu no panoqo vilo “Jukuto alo; eno khuu pelomu nongu shikughuzuve pekevilo.

⁶Timi kutomono ije lono ighi puzu, ‘Niye Mesiya ke’ ipi nani eno panonguno timi kutomo shikughuzuve nani.

⁷Kughou nonguno aghushi aniepikeu sutsa chiluni keno amlo susushi kevilo, Hipaqo shini putsake, tishimu aghuloki shekha ye tomphie.

⁸Ashiayeh lakhino ashiayeh lakhi sasu aghu shi nani, akukaqha lakhino akukaqha lakhi hale ighi nani. Aqha atsu-tsulo ayeghi itha nani, eno puqumiye keu anani. Hiye apunukusu huthu akeu paphike.

⁹“Ikemu nonguye nongu likhi nongu shelo jukutoluve masae. Kughengu timino nongu kughaluve nani eno kughakilo nongu sawu nani. Sinagog lo nongu ghaqhi nani eno nonguye ayehkipemi ngo kukami zulo ije pichekeu ghenguno sawo qhi nani, tiye panongu zulo alokiviputsa pilupeniye ke.

¹⁰Lokivipu sutsa paghi timi kumtsu vilo asheshu paghi masa nani.

¹¹Kughou timino nongu kughasawo atsakughani keno, nonguye kiu pini kela pi azuu no amlo thoghu-thoghuyi kevilo; ikemu tipa tuqhudo lono kiu pesu nongu tsuni keno ti pilo, kughengu nonguno kiu tsa pini keno tipaqoye Aghungu Kimthe launo ighi nani.

¹²Athikuzuuno athikuzu kughape pithive penike tsuve nani, apuh no pa nu titoi shivepe nani, eno anuliqono apu aza mujochile nani eno apu azaqo pithive nani.

¹³Nonguno ije pechekeu ghenguno timi kumtsuno nongu mithi nani. Ikemu timi khunono ashekha kutolo kutu-ukulu shinikeno Alhou no tipaqo xalu nani.

¹⁴“Ikemu kughou akuighupu kutsakungokeu huno pano ngomokepu alo puthugho aghikeu nonguno ithuluni keno (phiakeuno vethaluvelo), tile khunoqono Judia lo anikeno naghutolo pokalulo. “

¹⁵Timi khuuno aki kutsuqalo ani keno ado puwoghi aki aqhou iqi ke vilo momu kiuala ikhisuwu nikehu pa ki sholokuu ilokepu kumoe.

¹⁶Timi khuu no alulo huani keno pa ku-uphi luniaye pa kilo idewo kepu kumoe.

¹⁷Tipa tsalaqolo totimi anga mishi cheghi keqo eno totimi anga sacheghikeqo ghenguno ahakusapue!

¹⁸Susutsala lono hipaqo shipemoni keghenguno Alhou vilo inikhu alo.

¹⁹Kughengu tipaqo tsalalo akijikusapu chekeu huye Alhou no inahuu ayeghi lhoke lono ishi kutolo tikithipu shimphi, momu hikithipu itaghi shimo nani.

²⁰Ampeu no tipaqo tsala kihi kughukhovetsuae, pano tishimoke aye, timi khuumu puxumlave nani. Ikemu pano pukhavekeqo, pano kisheluvekemi ghenguno atsalaqo kihi kughukhovetsuae.

²¹“Tile khunoala nongu vilo, ‘Julo, Mesiya hile ani,’ momu ‘Julo, paye tile anie!’ ipi aye, tipau pulu kevilo.

²²Kughengu kichileu Mesiya ngo kichileu tungkupmi ipeghi nani. Eno tokulupu shiaye Alhou no pukhavekemi ghi sakughuzu sawuni kehu panonguno amchipu ngo akumzapu shipiye nani.

²³Ike kutokupuyi khealo! Hi thwokha kumtsu shimphi lono ino nongu vilo pive ani.”

²⁴Tipaqo tsalalo, ti akijuksa thiu, tsukinheno zumoyive nani, aqhino akuvu yemove nani,

²⁵ayepuqono atsutsu lono ikiqive nani, eno atsutsulo thwokha tshukumughupe akeu kumto sukini nani.

²⁶Tileno Timi Nuno khungkusu lono akuka kije eno ajukuvu lono chekeu timiqono ithulu nani.

²⁷Pano tileno kungumi ayeghiqha cheku ahu-u, apeu, kipelau eno kulolau kutolo puwuno Alhou no pukhaluvekemi ayeghi shekha lono ashekha kutolo hekutsu saghi nani.

²⁸“Ithikepushi akeu lakhi khughuthibo pelo nongu shika pelo. Kughou tipau lokaqono akumu ishe ipeghi puzu tipau nikaqo mini nikeno, mutsutsala kupunuva kepi nonguno ithi cheni.

²⁹Titoi, kughou hipaqo thwokha shikeu nonguno ithuluni keno adoye kupunuva, tiye kupunu kuchou shiveakepi nonguno ithivelo.

³⁰Kuchouno ino nongu vilo pini, hipau tiqhelimi thimphi lono hipaqo thwokha shikupu nani.

³¹Atsutsu eno ayeghiye hauve nani, ikemu itsaye hauvemoe.

³²“Ikemu tipa tsala momu tipa tuqhudoye kughono ighini keno khunomu mthae, kungugha lo kungumi mu mtha, Anu ghi mthae, ikemu Apu likhino ithi ani.

³³Kutokupuyi khealo, kughengu kiu ghuloki lono ighi nani keno nonguye mthae.

³⁴Hiye timi lakhino aki qhiveno izuwuveniye akelo toike. Pa qemi pelo pututa shelo pututa kumla jukutsupe eno ahukikha kheu vilo jukutokhealo pi ahza tsukeu paphi.

³⁵Tishiaye jukuto khealo kughengu aki mipeu kughono ighi nani keno nonguye mthae, avelauno shi aghiluvi momu zubumta lono shi aghiluvi momu tsukutho launo shi aghiluvi momu inaqheno shi aghiluvike,

³⁶Pano zuleno ighikelo noye zuaghi mokepu shimasa!

³⁷Ino nongu vilo kiu piani keno kutami kumtsu vilo ghi pi ani, jukuto khe alo!”