Read Sumi Naga MARK 2 Bible Online

MARK 2 - Sumi Naga bible

MARK 2

¹Atsala hami thiu Jisu ye Kapernaum lo ideghiveno aki lakhilo aniepikeu chiluve.

²Ike timi kutomo ighieno kumqoluve kehu tile a-a kuhave eno ahukikha phivilomu a-a kuhave. Jisu ye timiqo vilo Alhou tsa pi ae.

³Ikelo timi bidino anhu kithimi lakhi pesu pa lau ighi.

⁴Ikemu timi kumqo kuho akeqo ghenguno panonguye akusuu sawo Jisu kupunu ighi mlano ae. Ike Jisu mishilo aki kutsuqa xupheveno akikighipe lakhi lono akusuu zuakeu yephu lono kighiti piqi.

⁵Kughou Jisu no timi hipaqo kupulu ithulu keno, pano anhukithiu vilo ishi pi, “Apumi, oxineqo pevetsuae.”

⁶Ayezah kukutsumi khami tile ngoakeqono pano mlolo ishi kumsuju ae.

⁷“Timi hipauye kushiye ishi Alhou thaighakeu tsa piani kya? Alhou likhi no kumoaye timi khunomu axine pevetsumlae!”

⁸Jisu no paikhavi lono panonguno tuqhouno kumsuju akeu jupililuve kehu panoqo vilo ishi pi, “Nonguye kushiye tikithipu amlolo kumsuju ani kya?

⁹Anhukithiu vilo khikhiu pikepua: ‘Oxineqo pevetsuae’ ipikeuno mlaleyi keo? ‘Ithulo, oyephu ikhi pesu chevelo’ ipikeuno akumlau kya?

¹⁰Ikemu nongu pelo kuchouno ithi penikehu ni Timi Nu ye ayeghilo axineqo pevetsu kulupu kuka anie.” Ikehu anhukithiu vilo pano ishi pi.

¹¹“Ino ovilo pi ani, ithulo, oyephu ikhiqhelulo eno okilo wovelo!”

¹²Ike panoqo kumtsu nhekithe lono timi huno ithuve, pa yephu ikhipesu khalau ipeve. Ikelauye timi kumtsu akichiqhive eno Alhou jekipipushi sheqhe eno ishi pi, “Ninguye khilemu hikithipu ithumla aphie!”

¹³Jisu no itaghi Galil zughi kudau idesu wu. Timi aqo kitikhino pa lau ighi, eno pa no panoqo shika. Pa no wuveche kelo asuqha kuqhami lakhi ithulu. Pa je ye Alfius nu Levi, paye asuqha hiyam lo iqa aghie. Jisu no pa vilo pi, “Ipapelo.” Tile pano ithu puzu Jisu papesu wuve.

¹⁵Jisu no Levi kilo alibe chuniye iqa akelo, asuqha kuqhami ngo ayehkumthami kutomo Jisu ngo pa khopemiqo gholo iqa ae; kughengu kutomono pa pape cheke.

¹⁶Kughou Farisimi gholo Ayezah kukutsumi khamino Jisu ye ayeh kumthami ngo asuqha kuqhami gholo chu akeu ithuluve keno, panonguno Jisu khopemi vilo ishi iniju, “Pa ye kushiye asuqha kuqhami ngo ayehkumthami gholo chu ani kya?”

¹⁷Jisu no ti chiluve eno panoqo khochile. “Timi khunoqono akivishi ani keno shikipiviu avehupu shiamoe, ikemu suakeqo no shikipiviu avehupu shichenie. Niye achipiushichekemi kuniye ighike kumoe. Ikemu axinemi kuniye ighike.”

¹⁸Ghuthu lakhi Johan khopemi ngo Farisimi ishino kumvu ae. Timi khami ighino Jisu vilo pi “Johan khopemiye kumvu acheni puzu okhopemi ye kushiye kumvu chemo kya?”

¹⁹Jisu no panoqo khochile, “Kulakupu lo kusupuakeqo pelo kulapuuno panongu gholo aphilo ghi kumvu apeni kesha? Kulapuuno panongu gholo aphi loye panonguye kumvu pechemoe.

²⁰Ikemu kulapuu hu panongu launo ikhi suwuve nikeu tsala ighi nani, eno tipa tsala ighike lono panonguye kumvu nani.

²¹“Khunomu aphi kithe tachu pesu aphimini aqalo tsughuda chemoe. Tishi aye akithe tsughuda pukukeu huno aqa-u phimini suxukithe suwuve nani eno akighipe kije ixukitheve nani.

²²Momu khunomu ajiakithe pesu ashiyiko hughi aqalo suchemoe. Tishi aye ajino ashiyiko hughi kumpaphove nanie, eno aji ngo ashiyiko hughi kinikujo kutsaveniae, ikemu aji kithe pesu ashiyiko hughi kithelo lesukepue.”

²³Sabat tsala lakhilo Jisu ye aghilu lakhi vechesu wuche. Pa khopemino pa sasu chechekelo, panonguno aghipe suthalu ghi cheche.

²⁴Farisimino Jisu vilo pi, “Julepi, ayezahlo kuhakeu panonguye kushiye Sabat tsala lono shiani kya?”

²⁵Jisu no khochile, “Kughou David no avesa puzu muzuthive keno kiu shivekeno nonguye khilemu philu chemo kesha? Pa eno pawu timiqoye muzuthive,

²⁶ikehu paye Alhou kilo ilono Alhou zulo qhipuache keu sho chuke. Hiye Abiathar no Achinetou shiacheke lono shipuani. Ni yezah kiqi loye achinemi likhino asho hipau chulu nani kethono kutamiye chumlae, ikemu David no ti chuno pa gholo chekeqo ghi tsu.”

²⁷Tishino Jisu no panoqo vilo pi, “Sabat ye timi kivipu ghenguno shipuani, timiye Sabat ghenguno shi puamoe.

²⁸Ikehu ni Timi Nu ye Sabat shou ghi Ampeu ke.”