Read Sumi Naga MARK 6 Bible Online

MARK 6 - Sumi Naga bible

MARK 6

¹Jisu no tipa-a qhive puzu pano ghakhulo ighi eno pa khopemino pa gholo che.

²Sabat pineni paye Sinagog lo ilono kutsu ae.Timi kutomo tile ae eno kutomono pano kutsukeu chilu puzu akichiqhiveno ishi pi, “Timi hipauye khileno hipaqo kumtsu ithilu kya? Kishino kungu lokutsu hikithipu pa lau tsupuani kya? Paye kishi puzu akumzapu hikithipu shilu ani kya?

³Paye Maria no nu asu kiyiqimi shichekeuke kumo sha? Eno Jems, Jese,Juda eno Simon noqo pamu kekumo sha? Pa chelimiqoye ningu gholo anike kumo kesha?” Ikehu panonguno pa thaighae.

⁴Tile Jisu no panoqo vilo pi, “Tungkupumi lakhiye pa punughalo, pa laghaqo eno pa bolomi gholo thono aqha kumtsulo pa gihukeu acheni.”

⁵Paye kusukinimi kini-kuthua shou pa-u bepuzu shipivitsukeu kumoaye tipaulo akumzapu kumla kiumu shitsumlave.

⁶Pano ghami kupulukumo jupesu Jisu ye akumzaqhiyive. Jisu no tipa che-axulo akeqo phulo kutsusu wuve.

⁷Jisu no pa khopemi chighikini kukutsu puzu kini-ni kumtsa puwu. Panongu pelo tughakusa haphelukepu kuka tsu.

⁸Pano panoqo vilo ishi ahza tsu: “Aghuzulalo ghenguno akusu lakhi likhi kumoaye, achuqupu pukevi, jolabo pukevi momu apokhalo pisa supukevilo.

⁹Apukhu kuqho pulo, ikemu aphikuzu kini ukevilo.”

¹⁰Panoqo vilo highi pi, “Kughou nonguno aphu lakhilo iloni keno womoke kutolo nongu sakusuu kilo ngolo.

¹¹Nonguno aphu lakhilo ighi kelo timino nongu sasumo aye momu nongu tsa initsumo aye tileno wuvelo eno panongu shou thopiu shipe nike nongu pukhulo ayeghimukhu dalukeu kukhuqhivelo.”

¹²Ike akhopemino wuno timiqo vilo axine lono xakideluvelo pi asheshu.

¹³Panonguno tughami kutomo haphevetsu, kusukinimi kutomo shou teli pesu nutsu puzu panoqo kusu shipivi vetsu.

¹⁴Herod akukauno hi kumtsu chiluve, kughengu aqha kumtsulo Jisu je ithiwove. Timi khamino ishi pi, “Johan Baptist hu akithi lono xuithughivae tishikehu tipaqo kuka lono pano ishi shilu anie!”

¹⁵Kutami khamino pikeuno, “Hiye Elija ke.” Itaghi khamino, “Hipauye tungkupmi lakhi kha-ghi tungkupumiqo gholo milakhi kimihi ke!”

¹⁶Kughou Herod no hipau chilu keno pano pi. “Johan Baptist hu ino pa kutsu luvetsu pekemu paye xuthughivae!”

¹⁷Herod no ahza tsu puzu Johan kughaluveke, eno akughukilo tshupe qhike. Herod no hi shikeuye Herodia ghenguno, liye Herod pamu Filip nipu kemu Herod no sasu kughunawuveke.

¹⁸Johan no Herod vilo ishi piche, “Omu nipu sasu kughunakeu hiye achipi kumoe.”

¹⁹Ikehu Herodia ye Johan shou ighono aghapu ache eno pa pithive nishi ache, ikemu Herod ghenguno tishimlano acheke.

²⁰Kughengu Johan ye amikucho eno akimthemi lakhi kepi Herod no ithiake paye Johan msaqhiyi ache, ike pano Johan susho ghi qhipuache. Kughou Johan no pikeu tsa chiluni keno pa mlo shishe a-a shimlave che eno tishikeghi paye amlokiqi shi pa tsa initsuche.

²¹Ashekhalo, kughou Herod no pa punu ghuzu tsalalo yehpeka kijemi, ghushimi kudau atomi eno Galil lo aqo-aho sakiphemiqo ishi aghulhu kije lakhi tsuake lono adokivi ithulu.

²²Herodia ngano alou iloghieno ilhe eno lino Herod ngo pano ku- sukemiqo lopivi tsu. Ike akukauno ayiliu vilo pi, “Opulou kiukiu shiaghinamu otsunike ivilo pilo.”

²³Pano li vilo tushoqhi-ghi pi, “Nono kiu-kiumu ivilo inijukeu ikukaqha tuxa kutolomu otsuni.”

²⁴Ike ayiliuno ipeveno liza vilo ishi iniju, “Niye kiu khuni kya?” Li pazano ishi khochile, “Johan Baptist kutsu khulo.”

²⁵Ayiliuno mutazu akukau lau iloghino ishikhu, “Niye opelo itehino Johan Baptist kutsu akhu lakhilo suno itsupe nishi ani.”

²⁶Akukau ye shishe amlokusa shive ikemu paye li milivemlave, kughengu pano kusukemi kumtsu zulono pano ashoqhi shiveke.

²⁷Ike akukauno mtazu ghushimi akhemi gholono lakhi hapuwu puzu Johan kutsu sughilopi ahza tsuve. Ghushimi no wuno akughuki lono Johan kutsu luvetsuno

²⁸akhu lakhi lono pa kutsu pesu ighi, ayiliuno tipau aza tsuve.

²⁹Johan khopemino ti chilu puzu,panonguno ighieno pa sukumo pewuve eno akumoki lakhilo qhove.

³⁰Puwupuakeqo no Jisu lau ighi kumqoluveno panonguno kiu shilu eno kiu pesu kutsulu keno kumtsu pa vilo pi.

³¹Timi kutomono ighiju eno woveju akehu Jisu ngo pa khopemiqoye kuchukusho do ghi shetsumoe. Ike pano panoqo vilo ishi pi “Ningu likhi a-a hamilo wuno ado kitila akulho qhikepu shini.”

³²Ike ashuka lono panongu likhi kutamino kuhakeu-alo wuve.

³³Panoqono wuchekeu timi kutomono ithuluveno panonguye khunoqo keno ithive, ikehu taun kumtsu lono timiqoye apukhu lono tilau posuwuve eno Jisu ngo pa khopemi zuuno a-a hu toveaghi.

³⁴Jisu no ashuka lono wo tokelo pano timi aqokitikhi hu ithulu eno panoqo jupesu pa mlo ighiqhiyive, kughengu panonguye bheriqono akheu kuhano aketoi ithulu. Ike pano thwokha jeli pesu panoqo kutsu.

³⁵Kughou ave munuveni cheghi keno, pa khopemino ighi puzu pi,”Hiye khumu kuhakeu-a lakhi eno itehiye ave munu ayae,

³⁶ike timiqo puwovelo, panoqo pelo akupunulo aluchemi lau ngo aphulo wuno panoqo pelo kiuala qhuchu lupelo.”

³⁷Ikemu pano khochile, “Nonguno kiuala chukepu pesu tsulo.” Ikelo panonguno ishi pa iniju, “Noye ningu vilo wupuzu ghuka 1000 me asho qhusughino panoqo pelo chupe nike tsulopi kesha?”

³⁸Jisu no panoqo vilo iniju, “Nonguye asho khije ani kya? Wu puzu julo!” Panonguno phuju puzu pi “Ashopa pungu eno akha kini anie.”

³⁹Jisu no pa khopemi vilo timiqo amqo-amqo shi atsuni shou iqawo pelopi.

⁴⁰Ike timiqono timi aqheqhe ngo lhopungunguno ajo-shi iqape.

⁴¹Tishieno Jisu no ashopa pungu akha kini ikhilu puzu atsutsulo jupukuno Alhou shikimthi tsu. Pano asho supho puzu tipaqo pesu timiqo lau kijetsu peniye pa khopemiqo tsu. Pano akha kini hu panoqo kumtsu kijetsuwope.

⁴²Panongu kumtsuno chupuzu aghaqilu.

⁴³Asho eno akha chukhakumo munomugho akhopemiqono ashoghi chighikini kichekutsulu.

⁴⁴Tilehi achuqukemi kumtsu kuqha kelo timi 5000 ae.

⁴⁵Mtazu Jisu no pa khopemi pelo ashukalo ilo puzu pa zuuno azughi tuxa kudau Bethsaida lo wuvepe, eno paye timi aqokitikhi kughuxa puwo ae.

⁴⁶Pano timiqo vilo akivishi wolo pive puzu paye akighini shi nike naghuto lakhilo wuve.

⁴⁷Tsuzuve kethiu, ashukaye azughi shou che, eno Jisu ye pa likhi ayeghi shou ae.

⁴⁸Pa khopemiqoye ashuka sasu azuu wumlano chekeu pano ithulu, kughengu amlhuno panoqono wucheke kudauno fuda ake. Ike inaqhe ayi kuthu ngo tsugho kuma dolono panoqo lau ighi. Paye azu shouno ala cheche, eno panoqo hecheveniye ake.

⁴⁹Ikemu pano azu shou ala chechekeu panonguno ithuluve eno panonguye tiye aghahwu kughashive puzu ighamuku-ukhave.

⁵⁰Kughengu panongu kumtsuno pa ithulu eno msave. Ikemu Jisu no paikhavino panongu putsano pi, “Amlo kumto shilo! Musakevilo!”

⁵¹Tishieno pano panoqo gholo ashukalo ilo eno amlhu mulhutave. Akhopemiqoye ighono akichiqhi eno akumzave.

⁵²Panonguye 5000 loji keu kiqi hu ithikuthu mlave,panongu kukumsuye mukamghaive.

⁵³Panonguno azughi kathasu Genesaret yeghilo ighi, eno panonguno tile ashuka hu tshupe qhive.

⁵⁴Panonguno ashuka qhiveno wuchekelo timiqono Jisu ju paikhavino michiluve.

⁵⁵Ike panonguno tipaqha kumtsulo posu wuno kusukinimiqo zuakeu ayephulo puzuno Jisu ye khilehi aniepi chilu nikeno tipa-a lo saghi.

⁵⁶Pano khile ighi nikeno aphulo na aphughilo na, alu chemi gholo namu timiqono kusukinimi aphu mtalo puzupe qhieno pano uchekeu phishe likhimu kusukinimiqo pelo dilupelo pi pa qhuiniju, eno ti dilukemi kumtsu viluveche.