Read Sumi Naga LUK 12 Bible Online

LUK 12 - Sumi Naga bible

LUK 12

¹Tishiakelo timi kihikumla kumqolu kehu khamino khami nedaqoda wuve. Tile Jisu no atughushi pa khopemi vilo pi, “Farisimi kholaqhi jukutolo—tiye panongu kuhakugha pi anike.

²Nhape puakeu kumtsu lhapheve nani eno kusu puakeu kumtsu ithive nani.

³Akuzulo nono kiu pi puani keno akuvu lono chiluve nani, eno nono kusuwuno pi puakeu hu aki kutsuqa lono asheshu tsu nani.”

⁴“Ishou noqo, ino nongu vilo pini, aphimpi puhave tsunikemi msakevilo, tinguno akusau shitsumla kepushi aye talo.

⁵Ikemu khuu musakepu kela ino nongu pithipe puani. Alhou no pithive kethiu ghi aghakumhami toi kelo vesuvekepu kuka anike pa musalo. Kuchouno ino nongu vilo piani, pa musalo!

⁶Tughashoqhi punguye pisa kini lono jechemo kesha? Ikemu Alhou ye panongu lakhimu kumsumave chemoe.

⁷Okutsu sa kumtsu kihipe ani. Nonguye tughashoqhi kutomo nguno amekushoue, ike musakevilo!”

⁸“Ino nongu vilo pini, khunono paye iw kepi kutami zulo pipheni keno, Timi Nu ghi Alhou kungumi zulo pa je pesu piphetsu nani.

⁹Ikemu khunono kutami zulo paye ije pesu piphetsumo nikeno Timi Nu ghi Alhou kungumi zulo pa milive nani.

¹⁰Khualano Timi Nu shou milikeu tsa pipuku puaghi namu akipimi pevetsu nani. Ikemu khuno Aghungu kimthe shou thaigha nikeno akipimi qhivetsumo nani.”

¹¹“Kughou panonguno nongu pejuniye sasu Sinagog lo, Ayehkipemi momu kughakuthami zulo wuni keno kishi khochileni momu kiu pini kela pi amlo susu shikevilo.

¹²Kughengu nonguno kiu pikepu keno Aghungu Kimthe no tipau tuqhu lono nongu mijetsu nani.”

¹³Aqokitikhi gholo timi lakhino Jisu vilo pi, “Kutsuchekeu, ithikuzuu pelo amheghi isasu kusaje penike pitsulo.”

¹⁴Jisu no pa vilo pi, “Timio, khuno ipelo okujo dolo amheghi kikijeu eno kughakuthau shipe kya?”

¹⁵Panongu vilo pano pi: “Jukuto lo, alakimine jeli kumtsu lono nonguno kutokupui lulo, kughengu timi lakhi kuxuye pano kiu papushi kinimi shi aghinamu pawu kuakinino nibonilei aghikeu pesu kupukulai luve ake kumoe.”

¹⁶Tishieno Jisu no hipau holetsa panongu vilo pi: “Kinimi lakhi lulo athi akivishi ipeghi.

¹⁷Pano pa likhi pa putsaghi pi, ‘Niye kishini kela, athi kiulo pekutsu mova!’

¹⁸Pano ishi pi, ‘Niye hi shinia kena: Ino ile xaqhino hinguno akijeu shiniau, eno tilehi ithi ngo inhemgha kumtsu pekutsuni;

¹⁹ino ilikhi ivilo ishi pini: Ingulho, angukivi kutsasae! Noye anhemgha kivi kutomo pekutsuvae, ililai alo, chu-sho eno alovi alo.’

²⁰Ikemu Alhou no pa vilo pi, ‘No aghuzuu! Hipa jino okuxu kuhaveni cheni, ike nono olikhi oghenguno hi kumtsu pekutsu puakeu khuwu shivepe nani kya?’ ”

²¹Kishekhaghi Jisu no pi, “Timi lakhino alikhi asala akini pekutsu lupaghi namu Alhou kudauye kumu kuha aye titoive nani.”

²²Jisu no pa khopemi vilo pi; “Ino nongu vilo pini, kiu chu puzu xuani kela, kiu phimini uni kela pi kumsu kimgheyi kevilo.

²³Kughengu akuxuye achuqupu eno aphi mini nguno akhotoue.

²⁴Aghaqo julo, panonguye apiti mu yisu chemo momu ghile mu huchemoe; panonguye pekutsu kepu abi ale mu kuha, tishimu Alhou no panongu loji acheni. Nonguye aghau nguno amekushoue.

²⁵Nongu gholo khuuno kumsu kimgheikeu lono pa kuxulo axukushu sukuphalu akya?

²⁶Tishiaye nonguno hikithipu ghi peitha mla aye kushiye kutau ghenguno kumsu kimghei ani kya?

²⁷Lapu kupuno kishi thuwu, pu-acheni keno julo, tipaqoye mla chemo momu pano sala aphi mini gho chemoe. Ikemu ino nongu vilo pini, Solomon thotsu pa phimini qhivutsuniyi keu kumtsu pepu namu hipaqo xamunu toi moe.

²⁸Ishiye apuzu thoghiuye nhupe pitive nikeghi hitoi Alhou no asutsuni tuchohiju acheni. Kiutoi tinguno alau nongu tucho-hiju nani kya?

²⁹Tishiaye kiu chu-shonia pi phukeulo nonguye kumsu kimghei kevilo.

³⁰Kughengu ayeghi hipaulo ashiayehqo kumtsuno thime hipaqo phu acheni; ikemu nonguno kiu avehupu shi ani keno Apu no ithi ani.

³¹Tishinike zuqhu, pa yehkipe paghi phulo eno pano thime hipaqo pesu otsu kupha nani.”

³²“Nongu amsa loji! Musakevilo Ayehkipeqha pesu nongu tsu nikeu nongu paPuh mlo kiqie.

³³Okuakini jelo eno kumlhomi tsulo, eno pepuha mlakeu pisabolo kikelo eno kungughalo khilemu pekhave mlakepu nongu kini kikelo, kughengu tileye kupkamino mu pukaluve mla eno apulano mu tsapili mla.

³⁴Kughengu okuakini khile ani keno omlo ghi tile anani.”

³⁵“Nongu chighiche khapu eno akulu kuqu-pelulo,

³⁶eno aqemi khuu no pa mpiuno kulakupu ghulhulo wu puzu munu ighikelo kheaghino pano ighino kukhu kemtsa qhaqhisukeu toi shilo.

³⁷Aqemi khunoqono ampiuno ighikelo zuida ithu tsukhuyi aghikemiqo kumghae. Ino nongu vilo pini, ampiuno chighiche khapu puzu pano panongu kughuqano panongu loji nani.

³⁸Pano zubumta lono pina moaye tinguno athiuno ighie pinamu panonguno kutope khe aghikeu pano ithulu aye, panoqoye akumghae!

³⁹Eno hi kumsulu lone! Aki mpiuno kupukami kughono ighini keno ithi ake aye akupukau pelo pa ki hepho ilo pemo nani.

⁴⁰Nongu ghi kutokupui khe alo, kughengu Timi Nu ghi nonguno pa huqhe khemono akeu tuqhudo lono ighi nani.”

⁴¹Pitor no pi, “Ampeu, noye hipau holetsa ni vilo likhi pi anikeo kumtsu vilo ghi pi ani kya?”

⁴²Ampeu no khochile pi: “Tishiaye khuuno pichebekulu eno alokutsu qeu atou kya? Paye pa mpiuno pa kilo akukughuu shipeniye qhikeu, ti akilo kumla kughutsu eno aqemi kutamiqo ado achipi lono achuqupu kijetsu peniye qhike.

⁴³Kughou pa mpiuno akilo ideghi kelo hitoi mla aghike ithulu aye aqeu tipauye kiu toi akumghapu kela.

⁴⁴Kuchouno ino nongu vilo pini, ampiu huno aqeu tipau pelo pawu kuakini kumtsu shou kughukutsuu shipe nani.

⁴⁵Ikemu aqeu tipauno, ‘Impiuye ighinikeu munu auvea’ ipi puzu aqepumi eno aqelimi kutamiqo heqhi buqhi eno chu shono chumzu shomzu wuve napi aye

⁴⁶pa mpiuye aqeu tipauno huqhe khemokeu tsala eno mthano akeu do lakhi lono ighive nani eno aqeu hu akijipusave nani eno aghekulu kumomi gholo qhive nani.

⁴⁷“Aqemi khuuno pa mpiu pulou ithi akemu tipa kiqi lono kutope mla aghimo nikeno shisheno kumo ghaqhi nani.

⁴⁸Ikemu aqemi khuuno pa mpiu pulou mtha puzu kiuala mlave aghikeulo ghakepu shive aghi aye ighono ghaqhi kutukeu shimo nani. Timi khuu lau kutomo tsu puani keno kutomo pa launo khu nani; eno timi khuu lau alau tsu puani keno tinguno alau khu nani.”

⁴⁹“Niye ayeghilo ami suniye ighike, eno hi iquve penishi anie!

⁵⁰Niye baptiz shikeu lakhi lukepu shi ani, eno hi hecheve moke kutolo niye kiutoi kutakihi ania!

⁵¹Niye ayeghilo alakishi sughinike ighiepi nonguye kumsu ani kesha? Alakishi kumoe, ino nongu vilo pini, ikemu kothakilekeu.

⁵²Hinguno hilauye hitoi kothakile wove nani: akibo lakhilo mipungu akelo, mikuthuno mikini shou eno mikinino mikuthu shou kothakile nani.

⁵³Apunoqo no anuliqo sasu eno anuliqono papunoqo sasu; azaqono pano ngaqo sasu eno angaqono pa zanoqo sasu; ani noqono pano mukishiunoqo sasu eno amukishiu noqono pa ninoqo sasu kothakile wonani.”

⁵⁴Jisu no timiqo vilo highi pi: “Kughou kulolauno khungkusu iku chekeu nonguno ithuluni keno nonguno ishi pi cheni, ‘Hiye ghuni cheni,’ eno ti shi cheni.

⁵⁵Eno kughou apeu mulhuno mlhu ighikeu ithini keno, nonguno picheni, ‘Hiye shukuthuni cheni,’ eno ti shi cheni.

⁵⁶Kuhakughaqo! Nonguye atsutsu eno ayeghi ju puzu tile kiu shi ani keno pilu cheni, kushiye hipau tuqhu ghulokiye kiu kela nonguye mtha kya?”

⁵⁷“Kushiye achipiu shinikeu nongu likhi nonguno xathaluvemo kya?

⁵⁸Milakhino atsakughapu lakhi oshou pe ighino osasu xakuthalo wu aye, alalo chephi lono nono toluke thaqhu pa sasu avehu hu xathavelo, tishianguno pano kughakuthau zulo osunhe sawu pemo nike. Kughakuthauno okughape yekhemi tsuve nani, eno kijemino khakuthabolo okughape suve nani.

⁵⁹Ino nongu vilo pini oshou asu chukeu pisa kuhuu kuto tsukhamphilo noye tileno ipe mla nani.”