Read Sumi Naga LUK 13 Bible Online

LUK 13 - Sumi Naga bible

LUK 13

¹Tipa mtsa timi khami ighieno Jisu vilo, “Galilmi khami no Alhou mllakeu aghashi ake lono Pilat no ghiqhive keu hu” ipi.

²Jisu no panongu khochile pi: “Galilmi tipaqoye titoi ghiqhiveke ghenguno panonguye Galilmi kutami kumtsu nguno axine kuthouke pi nonguye kumsu ani kesha?

³Moe! Ino nongu vilo pini, nonguno nongu xine lono xaideghivemo napi aye, panongu toi nongu kumtsu thi nani.

⁴Imaye Silom lo pano chighi tache aliwono panongu shou ilaiqiku kelono thivekeqo huye? Nonguno kumsukeuye panonguye Jerusalem lo kutami xuakeqo nguno alhoksau kepi hino amchie ipi ani kesha?

⁵Moe! Ino nongu vilo pini, nonguno nongu xine lono xadeghivemo aye panongu toi nongu kumtsu thi nani.”

⁶Tishieno, panongu vilo Jisu no hipau holetsa pi: “Timi lakhino axathililo khughuthibo lakhi pighia. Pano khughuthi pithi aghini malaye juwu kemu lakhimu ithumla.

⁷Ikehu pano pawu axathili kumlau vilo pi, ‘Julepi, ampe kuthu kutolo niye hile ighi acheni, khughuthibo hipaulo alothi pithi ani mala ju acheni eno niye lakhimu ithumlavae. Hi yeqhivelo! Kushiye hipau pelo ayeghi vekha apeni kya?’

⁸Ikemu axathili kumlauno pi, ‘Hipau mipe likhimu qhipuaghilo, akijeu, ino hipau homxa chhuleno aghuma sujuni.

⁹Eno hino toku athi pithi aye ti alova, ti kumo aye tileno nono hi yeqhive penie!’ ”

¹⁰Apine tsala lakhilo Jisu ye Sinagog lo kutsua.

¹¹Tile totimi lakhi khuu lolo tughakusa lakhi akehuno ampe chighi tache li pelo su achepe. Liye ikokoi puzu khilemu mzuchoi puthugho mlae.

¹²Kughou Jisu no li ithulu keno pano li vilo pa lau ighilo pi, “Totimio, akusu lono okuqhophevae!”

¹³Pano pa-u pesu li shou be kemtsa li ghutsuye muzuchoive eno lino Alhou akishe tsu.

¹⁴Sinagog lo sakipheuye Jisu no apinenino shipivi kehu axu ideve; ikehu paye timiqo vilo pithu: “Atsala tsugho lono akumla mla itha kepue, ike tipaqo tsala lono ighino shipivi lukhalo, ikemu apineni tsala loye tishi kevilo!”

¹⁵Ampeu no pa khochile ghi pi: “Nongu kuhakughaqo! Nongu gholo khuno apineni lonomu pa mishi momu gadaha aki lono kuqho sasu wo azu piye chemo kya?

¹⁶Itehi hile Abraham tikughukomi lakhi khuu Satan no ampe chighi tache tshupe puaghike apineni tsala lo li tshupe puakeu lono kuqhophevemo nani kesha?”

¹⁷Pano hi khochilekeu huno pa ghumi kumtsu pano likhi pano zukujo auvepe, eno timi kumtsu pano akumzapu khije shi keno tipaulo alokivi shie.

¹⁸Jisu no pi: “Alhou yehkipe pesu kiu kimighi tsuni kya? Niye kiu pesu hi kimighi tsunia?

¹⁹Hiye aghanethi lakhi mihie, khikhi timino ikhipe pa lulo vesu. Abo ipeghi eno asubo shive eno aghauqono hipau lokaqolo apusu pesue.”

²⁰Itaghi Jisu no iniju: “Niye Alhou yehkipe pesu kiu sasu kimghini kya?

²¹Hiye kholaqhi kimihie, totimino epe ashoghi lakhilo asho kukubolo xukutshu cheni, ti kumtsu mlaghubeive moke kutolo.”

²²Jisu no apinelo taun veche kelo kutsughi Jerusalem kudau izuwuche.

²³Khamino pa vilo iniju, “Ampeu, timi aghulo likhi xalu nani kesha?” Jisu no panongu khochile pi:

²⁴“Nono toluke thaqhu mughughuyikeu hukikha vechesu ilonikeu shilo, kughengu ino nongu vilo pini, timi kutomono ilonike pukaputsa nani ikemu tishimla nani.”

²⁵“Aki mpiu huno ithu puzu ahukikha khave nani, tile nonguno khalau puthughono ahukikha khukhu puzu, ‘Akijeu, ighenguno ahukikha khaqhilo’ pini keno pano nongu khochile nani, ‘Nonguye khilano cheni keno niye mthae!’

²⁶Tile nonguno khochile nani, ‘Ninguye osasu kuchu kusho shiche kehu, noye niphughilo kutsu che kehu!’

²⁷Pano itaghi pi nani, ‘Nonguye khilano cheni keno niye mthae. Ilauno chevelo, nongu alhoksa kumlami kumtsu!’

²⁸Kughou nonguno Abraham, Isak, Jakob eno tungkupmi kumtsu Alhou yehkipe lo aghikeu ithulu puzu nonguye khalau aghive aye, nonguye kiutoi akuqa eno ahu tsughububuikeu anani kelae!

²⁹Kipelau ngo kulolau eno ahu-u ngo apeuno timi ighino Alhou yehkipe kuchu kusholo ngo nani.

³⁰Tithiuye itehi khunoqo athiu ani keno atughu shive nani eno itehi khunoqono atughu shiani keno athiu shive nani.”

³¹Tipau suchelo Farisimi khami Jisu lau ighieno pi, “Noye hileno wuvelo eno khilela wuvelo, kughengu Herod no opithive nishi anie.”

³²Jisu no panongu khochile pi: “Wuno sher vilo pilo, ‘Ino ishi thoghiu tughakusa haphe ani, shikipivi kumla shi ani eno akuthuniye ikumla to nani.’

³³Tishimu ishi thoghiu eno aghiniuye ishelo cheche mayesa. Kughengu tungkupu lakhiye Jerusalem lo nguno a-a kutau lono thive penikeu achipi kumoe.”

³⁴“O Jerusalem, Jerusalem! Alhou no olau tungkupmi puwukeu pithive, aghinikishimi olau puwu kemi atu pe veqhive! Awuquno achisibo qholo ati vakutsuke toi niye ghuthu kutomo i-u pe owu timiqo vapeni shi cheke ikemu nonguno ipelo tishi pemoe!

³⁵Julo, nongu kibo kumtsu phevae. Ino nongu vilo pini, nonguno, ‘Ampeu je lono ighikeu Alhou no pa kumghatsu peni,’ ipi pimoke kutolo nonguye ni ithulumo nani.”