Read Sumi Naga LUK 17 Bible Online

LUK 17 - Sumi Naga bible

LUK 17

¹Jisu no pa khopemi vilo pi: “Timi pelo axinelo ikiqi ilovepe chekeu ighini putsa; ikemu khuno vechesuno tipaqo ighi chenipe keno panoye ahakusapue!

²Timi khuno hi kitilaqo gholo milakhi pelomu axine shive penikeno athi kutsughu tu pa kuolo tsughada pipe puzu pa kughape ayizulo vesuvekeu pavie.

³Olikhi ojukutolo! Othikuzuuno axine shive aye pa lomi pilo, pano xakideluve aye pa kipimi pevetsulo.

⁴Pano atsala lakhilo ghuthu tsuni oshou axine shive namu tishike kumtsulo olau ideghino, ‘Niye xaideghi ani’ ipi aye, noye pa kipimi pevetsu masae.”

⁵Akhopemino Ampeu vilo pi, “Ni kupulu kughuko tsulo.”

⁶Ampeu no ishi khochileve: “Nonguno aghanethi pahimu akupulu aghi aye, militasubo hipau vilo, ‘Okuhu lono olikhi osujo pesu ayizulo shosuluvelo’ ipi kelo tino nongu gholu nani.”

⁷Nongu gholo milakhino aqeu lakhi akelo alu hokide momu bheri kheche nipe. Ikelo kughou pano alulo huno ighi nikeno pa vilo, “Mtazu ighi puzu okhuna chulo” ipi cheni ma?

⁸Tishi chemoe! Tipa zuqhulo pa vilo nono ishi pi cheni, “Ighenguno alibe shilo, aphimini pepu puzu ino chu sholu moke kuto ilojilo, eno tithiuno noghi chu-sholuvi.”

⁹Kiu ahza tsukeno aqeuno shikupulu ke ghenguno ampiuye pa shikimithi cheni kesha? Moe!

¹⁰Titoi, nongu vilo ahza tsukeu kumtsu shivekethiu nongu ghi ishi pikepue, “Ninguye amekukuha qemiqo ke, ni kumlapu saje likhi shi aphi.”

¹¹Jisu no Jerusalem lo izuwuche kelo paye Samaria ngo Galil kuma dolono wu.

¹²Pano aphu lakhi toni chekelo apugha kupumi chighi pa sasu kushoniye cheghi. Panonguno putou puthugho

¹³eno ishi ighamuku, “O Jisu, Ampeu! Ni kimiye tsulo!”

¹⁴Jisu no panongu ithulu eno panongu vilo pi, “Wulo eno achinemi pelo nongu jukutoju pelo.” Alalo cheke lono panonguye mitheluve aghi.

¹⁵Panongu gholo milakhiye paye vive aghikeu ithulu kelauye ideghino asutsa kuloghi lono Alhou sheqhe.

¹⁶Pano Jisu pukhu philo ihozu puzu pa shikimthi. Timi huye Samariami lakhi.

¹⁷Tile Jisu no pi, “Michighi shikimtheke kumo kesha? Timi tokuye khile ania?

¹⁸Kutamiye kishive puzu timi hipau kutami shiayeh ke pa likhino Alhou shikimthi nike ideghilu kela.”

¹⁹Jisu no pa vilo pi, “Ithuno wolo, okupuluno opelo viluve apeke.”

²⁰Farisimi khamino Jisu vilo Alhou yehkipe kughono ighinikela pi iniju kelo, pano khochile keuno: “Alhou yehkipe ye amchipu ithulu peni kepushi ghi ighini chemoe.

²¹Khunomu, ‘Julo, hilehi ani’ momu ‘Tilehi ani’ ipi pimla nani; kughengu Alhou yehkipe ye nongu bocho lo anie.”

²²Tileno pano pa khopemi vilo pi: “Nonguno Timi Nu hu tsala lakhi likhimu ithulunishi qhiyikeu tsala ighi nani, ikemu nonguno ti ithumla nani.

²³Panonguno nongu vilo, ‘Hule julo’ momu ‘Hila julo’ ipi nani, ikemu ti juniaye wukevilo.

²⁴Tsutsu phaphano atsutsu tuxauno tuxa kudau kutolo kulowuno yepuvuke toi Timi Nu ghi pa tsalalo titoi shi nani.

²⁵Ikemu atughushi paye shishe ime masa eno hipau tiqhelimi pelo pa leve pe nani.

²⁶Noha tsalalo toi, Timi Nu tsalalo ghi tishi nani.

²⁷Noha no ashuka lo ilomoke kuto eno Zuqo ighino panongu kumtsu kutsavemoke kuto, panonguye chu-sho, kulakupu shi, eno kulakupu tsu ae.

²⁸Hiye, Lot ghulokilo toi nani. Panonguye chu-shoa, kuqhukili shiae, athi yisu kemino yisu, aki kishimino aki shi ishi ake.

²⁹Ikemu Lot no Sodom vecheke tsalalo, atsutsu lono ami eno amituqu ghuqhi puzu panongu kumtsu kutsave.

³⁰Timi Nu pephepiyeke tsalalo ghi hitoi nani.

³¹“Tipau tsalalo timi khuno pa ki tsuqalo ani keno pa ki alou anhemgha akeu lunike iqighi kepu kumoe; eno ti toi, khuno alulo ani keno akilo idewo kepu kumoe.

³²Lot nipu kumsululo!

³³Khunono pa likhi pa kuxu pukha nike pukaputsa nikeno puhave nani; khunono pano kuxu puhave nikeno ti pukhalu nani.

³⁴Ino nongu vilo pini, tipa jilo azua lakhilo timi kini zu akelo, lakhi sawuveno lakhiye qhive nani.

³⁵Totimi kini a-o shesu akelo, lakhi sawuveno lakhiye qhive nani.

³⁶Mikini alulo akelo, lakhi sawuveno lakhiye qhive nani.”

³⁷Akhopemino pa iniju, “Ampeu, khileno ti shini cheni kya?” Jisu no khochile pi, “Khileno akithi kumo ani keno, aluquno kumqo nani.”