Read Sumi Naga LUK 3 Bible Online

LUK 3 - Sumi Naga bible

LUK 3

¹Hiye Tiberia Kaisar no kakeu ampe chighi apungu-u shia, Pontio Pilat no Judia lo Ahng shia, Herod no Galil lo ayekipeu shia, eno pa thikuzuu Filip no Ithuria ngo Trakontis yeghi sukumxalo ayehkipeu shia; Lusania no Abileni lo ayehkipeu shia,

²eno Anna ngo Kaifa pama no achinetomi shiae. Tipa ghulokilo Zakharia nu Johan no yenguyeleikeu-a lono Alhou tsa pa lau ighie.

³Pano Jordan sukumxa qha kumtsulo wuno asheshu ghi pi: “Xukitheno baptiz shilulo, eno Alhou no nongu xine pevetsu nani.”

⁴Isaya tungkupu tsa kakulo yepuakeu toi: “Asayeqha lono milakhino ighamuku ani: ‘Nonguno alaghi lakhi Ampeu ghenguno kutolo, Pano wukepu laghi muzuchoi shitsulo!

⁵Akuthoku kumtsu jokulaqalo, Naghuto eno ato kumtsu kulaqalo, Ihoghulaikeu la kumtsu muzuchoi shilo. Kukokilekeu laghi muduniyi shilo,

⁶Tishianguno timi kumtsuno Alhou wu xakulu ithulu nani!’ ”

⁷Tighenguno aqokitikhi khijehi pa pelo baptiz shitsu peniye ighi keno tipaqo vilo pano pi: “Nongu apighitiqo! Alhou loghu ighiniye akeu lono polupe nike khuuno nongu kutughu kya?

⁸Nonguye xukithe luvae pikeu kumla pephepiyelo. Eno nongu likhi nongu dolono, Abraham ye nisu ke ipi piakevilo. Kughengu ino nongu vilo pini, Alhou ye atu hipaqo pesu Abraham lagha shivetsu kulupu anie!

⁹Itehighi asubo phivilo amughu bepuani, asubo khikhi no axathi kivi pithimo nikeno yeqhive nani eno amilo vesuve nani.”

¹⁰Timiqono pa iniju, “Tishiaye, ninguye kiu shikepua?”

¹¹Pano khochile, “Khuuno aphikuzu kini anikeno lakhi pesu kuhakeu tsulo, khuuno achuqupu anikeno pa ghi titoi kusaje chulo.”

¹²Asuqha kuqhami ghi baptiz shitsupe niye ighi eno panonguno pa iniju, “Kutsuchekeu, ningu ye kiu shikepua?”

¹³Pano panongu vilo pi, “Nongu pelo qhapeniye betha tsukeu nguno alau qhakevilo.”

¹⁴Ghushimi ghi pa vilo iniju, “Tishiaye ninguye kiu shilo pikya?” Pano panongu vilo pi, “Anguka lono khuu pisa mu suxalu kevilo momu akimki lono kutami ngukukeu shikevilo, ojume kiu ithulu cheni keno tipaulo aghakiqi shi alo!”

¹⁵Timi kumtsuno khekulhoshi pututa mulo lono Johan pesu Alhou wu Mesiya keni akepi kumsukimgheyi ae.

¹⁶Tighenguno Johan no panongu vilo pi: “Ino azu lono nongu baptiz shitsu cheni,ikemu inguno akijeu milakhi cheni, eno niye pa pukhukuqho kutsugha kighi ghi kuqho mzae, paye Aghungu Kimthe eno ami pesu nongu baptiz shitsu nani.

¹⁷Pawu fulekepu thigha pa ulo ani, pa niqa shikimthe eno athi pesu pa lelo pekutsuni, ikemu amuuye pano inhemokeu mi lono pitiveni.”

¹⁸Johan no hakuthokeu tsa jeli kutau kutomo pesu timiqo lau Asutsa kiviu asheshue.

¹⁹Ikemu Ahng Herod no pa likhi pa thikuzuu nipu Herodia luke eno alhoksa kutomo shikeu ghenguno Johan no pa lomi piqhi cheke,

²⁰ike tipaqo shou kukupowo akughukilo khathave.

²¹Kughou timi kumtsuno baptiz shiluve keno Jisu ghi baptiz shilue. Pano inikhu akelo kungugha khaqhie,

²²eno Aghungu Kimthe no miqhedu lakhi toi shino pa shou iqighi, eno kungugha lono asutsa lakhi ighi, “Noye ino qhuivu chekeu Nu; imlo kiqi olau acheni.”

²³Kughou Jisu no pa kumla huthu keno, paye ampe shighia shia eno timino ishi kumsukeuno paye Josef nu, Heli nu,

²⁴Mathat nu, Levi nu, Melkhi nu, Jannai nu, Josef nu,

²⁵Matathi nu, Amus nu, Nahum nu, Esli nu, Nagai nu,

²⁶Ma-ath nu, Matathia nu, Semein nu, Josek nu, Joda nu,

²⁷Joanan nu, Rhesa nu, Zerubabel nu, Shaltiel nu, Neri nu,

²⁸Melkhi nu, Addi nu, Kosam nu, Elmadam nu, Er nu,

²⁹Joshua nu, Elizer nu, Jorim nu, Mathat nu, Levi nu,

³⁰Simon nu, Juda nu, Josef nu, Jonam nu, Eliakim nu,

³¹Melea nu, Menna nu, Matatha nu, Nathan nu, David nu,

³²Jesse nu, Obed nu, Boaz nu, Salmon nu, Nahashon nu,

³³Aminadab nu, Admin nu, Arni nu, Hezron nu, Perez nu, Juda nu.

³⁴Jakob nu, Isak nu, Abraham nu, Tira nu, Nahor nu,

³⁵Serug nu, Reu nu, Pelek nu, Eber nu, Shela nu,

³⁶Kainan nu, Arpaksad nu, Shem nu, Noha nu, Lamek nu,

³⁷Methusela nu, Enok nu, Jared nu, Mahalalel nu, Kenan nu,

³⁸Enos nu, Seth nu, Adam nu ti Alhou nu.