Read Sumi Naga LUK 6 Bible Online

LUK 6 - Sumi Naga bible

LUK 6

¹Sabat tsala lakhilo Jisu ye aghilu vechesu wuchekelo pa khopemiqono aghipe lothi muxupe aulono mununo chughi cheke.

²Farisimi khamino pi, “Apinyenilo shikevilo pi Ayezah lo akeu nonguye kushiye shi ani kya?”

³Jisu no khochile, “Nonguye kughou David ngo pawu timiqono mzuthive kelo kiu shive keno phiju moke sha?

⁴Pano Alhou kilo ilo puzu Alhou mllakeu sho ikhiluno chu eno pa gholo chekemi ghi tsue. Tiye achinemi likhino thono kutamiye chunikeu Ayezahlo kuhae.”

⁵Pano panongu vilo highi pi, “Timi Nuye Apinyeni shou Ampeu.”

⁶Sabat tsala kutau lakhilo Jisu no Sinagog lo ilono kutsu. Tile timi lakhi a-u ajeu thivekemi ae.

⁷Ayezah kukutsumi eno Farisimino Jisu no apinyenilo shipivi nani keo mokeno pa jukuto-ae, tishianguno panonguno pa nguku kepu akiqi phuluniyeke.

⁸Ikemu Jisu no panongu kukumsu ithia eno a-u kithiu vilo pi, “Ithulo, eno hilau puthugholo.” Pano ithu eno tile puthughove.

⁹Tile Jisu no panongu vilo pi: “Ino nongu iniju ani, Ayezah lo Apinyeni ninguye kiu shilu nani pikya? Akivi shilopi keo kutsavelo pi kya?”

¹⁰Pano ighowo panongu kumtsu jukuto eno timi vilo pi, “O-u chholo.” Pano ti shie, eno pa-u alokitheve.

¹¹Ikemu Ayezah kukutsumi eno Farisimiye amlo khukhu shi ideuve eno Jisu kughape kiu shivemasa kela panongu dolono lhekile auve.

¹²Hipa ghulokilo Jisu no ghulo lakhi inikhuniye ato lo iqho, eno pano puthopuzu Alhou vilo inikhua.

¹³Atsala ipeghi kethiu pa papekichemiqo kulu eno panongu gholono chighi kini kishelu, pano tipaqo pesu Apostolmi ipi kuvetsu.

¹⁴Simon pesu Pitor kuvetsu eno pa thikuzuu Andrew, Jems, Johan, Filip, Bartholomew

¹⁵Mathi, Thoma, Alfia nu Jems, Simon azukiniu ipi kuchekeu,

¹⁶Jems nu Judas ngo Judas Iskariot thechu shi wuvekeu ishi kishelue.

¹⁷Jisu no panongu sasu ato lono iqighi eno aqalo pa khopemi aqo kutomo gholo puthugho. Judia qha Jerusalem, Tur eno Sidon yeghilo azu mukulo aphughiqo lono timi aqokitikhi ighieno ngoa;

¹⁸Panonguye pa tsa ini eno akusu shipivi luniye ighike. Tughakusano punaqhi akeqo ghi ighieno shipivi.

¹⁹Timi kumtsuno pa bulunike pukaputsa kughengu akuka pa launo ipeghino panongu kumtsu shipivi ae.

²⁰Jisu no pa khopemiqo juno pi: “Nongu kumlhomiqo kumghae; Alhou yehkipe qhaye nongu wue!

²¹‘Nongu itehi muzuthi akeqo kumghae; nongu ghapiqi tsulu nani: Nongu itehi qa akeqo kumghae; nonguno nulu nani.

²²“Kughou timino Timi Nu ghenguno nongu mithi, nongu leve, nongu thaighani eno kusakughami kepi nongu jeku nikeno, nongu kumghae.

²³Kughou tishini keno alokivi shilo eno alovi kelauno ilhelo, kughengu jualo, kungughalo nongu jumeye kije ke. Panongu puasuqo ghi tipaphi shi tungkupmi peitha cheke.

²⁴‘Ikemu nongu kinimiqo ghenguno ahasapue, kughengu nonguye nongu lokughuno ithuluvea ke.

²⁵“Nongu itehi chhikhoi akeqo ghengu ahasapue, kughengu nonguye muzuthi nani! ‘Nongu itehi nu akeqo ghenguno ahasapu, kughengu nonguye mulo eno qa nani!

²⁶“Kughou timiqono nonguye aloe ipini keno nongu ghenguno ahasapue. Panongu puasuqo ghi tipaphi shi kichile tungkupmiqo vilo picheke.”

²⁷“Ikemu nongu iniakeqo vilo ino pi ani: Oghumi kimiyelo, nongu mithi chekeqo lau akivi shilo,

²⁸nongu ghushokemiqo kumghatsulo, nongu peithapusakeqo ghenguno inikhulo.

²⁹Khualano ogimuchu lakhilo ghatsu aye, tuxau ghi papelo gha pelo. Khualano oku-uphi ikhisuwuve aye, pa pelo ophikuzu ghi luve pelo.

³⁰Khualano ovilo kiuala khu ighi kelo tsulo, khualano owu kiuala suwukeu khuchilelu kevilo.

³¹Nono kishi kutami pelo olau shipenishi keno titoi kutami lau shilo.

³²Nongu kimiyekemi likhi nonguno kimiye napi aye, kushiniye kukumgha laju anikya? Axinemi thotsu pano kimiyekemi lau kimiye cheni!

³³Nongu lau akivi shikemi lau likhi akivi shi aye, nonguye kushiniye kukumgha laju anikya? Axinemi ghi tishi chenie.

³⁴Nono ithuluchile kepu likhi timi puna aye, kushiniye kukumgha laju anikya? Atho ithuluchile nikeu ye axinemi ghi axinemi lau puna chenie!

³⁵Ikemu oghumiu kimiyelo eno pano lau akivi shilo, punalo eno tsuchile penikeu laju kevilo. Tishianguno noye ajume kije anani eno shishe Akiqheu Lhou nuli shilu nani; kughengu paye shikimthimokemi eno kusakughami lau akivi shie.

³⁶Nongu paPuh ye kupukini kehu nongu ghi kupukini shilo.”

³⁷Kutami shou kughathabe kevilo, eno Alhou no oshou kughatha bemo nani; kutami thave kevilo eno Alhou no othavemo nani; kutami xine pevetsulo eno Alhou no oxine pevetsu nani.

³⁸Kutami tsulo eno Alhou no ti otsu nani; chhitoi shi inadasu ghi kunosu eno qoleqolei shi nongu tsu nani; kughengu nonguno kutami lau peithakeu kimighi qhemi lono nongu lau ghi Alhou no peitha nani.

³⁹Tile Jisu no panongu vilo hipau hole pi: “Anhechemi lakhino anhechemi kutami lakhi saphelu nani kesha? Pamaye aqohlo ikiqi ilomoni kesha?

⁴⁰Akhopemi lakhiye pa kukutsuu qhemi kumoe, ikemu akhopemi lakhi khino kupukulai qophe piyeve aye pa kukutsuu toive nani.”

⁴¹“Kushiye othikuzuu nhethilo amihi ju ania ikemu olikhi onhethilo asulu akeu jukutomo kya?

⁴²Kishi puzu othikuzuu vilo, ‘athikuzuu, onhethilo amihi akeu ino ikhipheve tsuni,’ ipi chenia, le olikhi onhethilo asulu nono ithumla kenoku? No kuhakughau! Atughushi olikhi onhethilo asulu ikhivelo, eno tishianguno othikuzuu nhethilo amihi ikhiphe nike nono tsughukhuyi ithulu nani.”

⁴³“Kughengu asubo kiviye alhoksa lothi pithi chemoe, momu asubo lhoksano athi kivi pithi chemoe.

⁴⁴Asubo lakhi khino alikhi axathi lono michilu cheni; kughengu timiye asahubo lono khughuthi xolu chemoe, momu koghesahubo lono atsaithi xolu chemoe.

⁴⁵Akivimiye pa mlolo akivi pekutsu puakeu lono akivi ikhiphe cheni; eno timi lhoksami ye pa mlolo alhoksa pekutsu puakeu lono alhoksa ikhiphe cheni. Kughengu timino amlolo nibonilei akeu akichi lono piphe acheni.

⁴⁶“Kushiye ‘Ampeu, Ampeu’ ipi ikucheni eno ino pikeuye shichemo kya?

⁴⁷Ilau ighikemi eno itsa inino tipaqo shichekemiye kiutoi kela ino nongu piyeni.

⁴⁸Paye timi lakhi no aki lakhi shiake toi: pano thonhei chhusu eno atuqu shou aboqha qhae; kughou atshunazu ighi keno zuqo zuno aki tipau chhele ighie ikemu tiye aki kughutha mlae, kughengu aki tiye akivishi shipua kehu.

⁴⁹Ikemu timi khunono itsa ini eno tipaqo shi chemo keno paye timi lakhino aboqha sumono asaye yeghi shou aki shiketoi, atshuna zuno chhele ighi eno paikhavino aki tiye ilaiqive eno aki tipau shikupsaye ighono kije ke.”