Read Sumi Naga LUK 8 Bible Online

LUK 8 - Sumi Naga bible

LUK 8

¹Tipa thiu Jisu no Alhou yehkipe sutsakiviu vekupha ghi aphughiqolo eno aphuqolo wue. Akhopemi chighikini ghi pa sasu che,

²tughakusa eno kusukini shipivive tsukemi totimi khami ghi che: Maria Magdoloni ipi kukicheu, li launo tughami tsuni haphevetsukeu ngo

³Herod ti anuli jukutsuu Chuza nipu Joana, Susana eno kutami kutomo ishi che. Totimi hipaqono panongu kua kini pesu Jisu ngo pa khopemi kuphu che.

⁴Aphughiqo lono timino tamono wo kumqolu kelo Jisu no hipau hole tsa pi:

⁵“Timi lakhino apiti veniye wue. Pano vechekelo, apiti hami alalo vesu veno tiye nedaqodave eno aghauno ti mighive.

⁶Hamino atu kua yeghi shou vepukulu, ti lhoipeghi kemu ighuyive, kughengu tile thonitsanhi keu kuha kehu.

⁷Apiti hamino asahu gholo vesuve, eno asahuno tipa gholo lho ipeghino ti ghusuve.

⁸Apiti hamiye ayeghi kivilo vesulu eno lho ipeghino alothi aqhe kutolo pithilu.” Jisu no hipaqo piveno ighamuku pi, “Nonguno chikulupu kini aghi aye, inilo!”

⁹Kughou pa khopemino hipau hole kiqi iniju kelo,

¹⁰pano pi “Alhou yehkipe tuqhouqo ithipe nike nongu tsupe puani; ikemu kutami ghenguye ahole lonoke, tishikehu panonguno jupulaghi ithumla nani, eno ini pulaghi vetha mula nani.”

¹¹“Ahole kiqiye hike: apiti huye Alhou tsake.

¹²Apiti alalo vepukulu keu huye chiluvekemiqo; ikemu tughamino ighino panongu mlo lono atsa hu ikhi suwuve, panongu pelo puluno xalu nosakehu.

¹³Atu akeu yeghi shou vepuku keu piti huye khunoqono atsa chilu kelo alokivi shi ghi ikhilu; ikemu panonguye akuhu kuha: ado kitila ghenguye panonguno pulu ano ghukuju ighikeloye ikiqive cheni.

¹⁴Asahu gholo khipaqo vesulu keno panonguye chiluvekemiqo, ikemu pano likhi pano puloulo cheche kelauye panonguye kumsukimghe keu, kinikulu ayeghi hipaulo ghakiqipuqono pa qhasuve eno panongu lothi akite shilupemoe.

¹⁵Ayeghi kivilo apiti vesu lukeuye khunoqono atsa chilu eno aghokulu ngo amlo kivi xapusu kutuuno ikhilu keu lono athi pithi peghilu cheni.

¹⁶“Khunomu akulu kuqu pesu alino qhove chemoe momu alipa qholo qhive chemoe, ikemu akulu kibepu shou qhi cheni, tishianguno iloghikemino akuvu ithulu nani.

¹⁷Kiu kiumu kusupua keuye ashou ipeghive nani eno nhapepua keuye phuluve nani eno ithive nani.

¹⁸Tishiaye, noye kishi ini ani kela kutokupuilo; kughengu khuno ani keno alau pesu tsu nani, eno kuhakeu launo pano kiu aniepi kumsu ani keno tighi ikhisuwuve nani.”

¹⁹Jisu paza eno pa thikuzumi pa lau ighi, ikemu aqokitikhi ghenguno panonguye pa phivilo ighi mlano ake.

²⁰Khamino pa vilo hipau pi, “Oza ngo othikuzumiye khalau puthugho ani, eno oputsa nishi ani.”

²¹Ikemu pano panongu khochile pi, “Iza eno ithikuzumiye khunono Alhou tsa chilukemi eno ti shichekeqono ke.”

²²Ghulo lakhi Jisu no pa khopemi sasu ashuka lakhilo ilo eno panongu vilo pi, “Aizukucho hukukuu hechewuni nolo.” ikehu panonguno heche wuche,

²³kelo paye zuauve. Pasapagha mulhuno aizukucho shou ikughi, eno ashukaye azuno chhitoive eno panonguye akuighupulo auve.

²⁴Akhopemino ighino pa kudaghi pi, “Ampeu! Ampeu! ningu puhaveni cheae” Pano ithughi puzu amulhu ngo azu kighide lomi pi; eno tipaqono tavekethiu iquneive.

²⁵Pano panongu vilo pi, “Nongu kupulu khile ani kya?” Ikemu panonguye akichiqhi msave, eno lakhino lakhi vilo pi: “Paye khuu keno amulhu ngo azu ahza tsukelo tipaqo ghi pa gholu kya?”

²⁶Panonguno Galil ghungulo Gergesan yeghilo ighilu.

²⁷Jisu no amuku tokelo aphughi lono tughakusa alolo akemi lakhi ighino pa sasu kusholu. Paye aphi umokeu ado kushuwa shive eno akilo ngomo ikemu akumo qhokeu kilo acheghi.

²⁸Kughou pano Jisu ithulu keno, ighaghi Jisu zulo ikiqiveno asutsa ighamuku ghi pi. “Alhou Ighono Akiqheu Nu Jisu, noye ni lau kiu shikepu ani kya? Ino oqhuiniju ani, ighime kevilo!”

²⁹Kughengu Jisu no tughakusa vilo timi launo ipevelo pi ahza tsue. Ghuthu kutomo hino pa tsuquluveche eno ayikichhe kighino tshuno aghukhe shi anamu, paye ayikichhe kighi ghi suthaveno tughakusano hasasu aghasalo wuveche.

³⁰Jisu no pa iniju, “Oje khuu kya?” Pano pi, “Legon,” kughengu tughakusa kutomo pa lou iloke.

³¹Tughakusano Aqoh [2] lo panongu halesu kevilopi pa qhuiniju.

³²Awo aqo lakhi tipa holo atolo nguchua; eno tughakusano panongu pelo tipaqo philo ilolu pelo pi Jisu qhuiniju. Pano ilolu nani pive.

³³Ikehu tughakusano timi phi lono ipeghino awo philo ilove; eno awoqo kuchopu atuxu kudau kohakive susu aizukucholo ilo putsuqhive.

³⁴Kughou awo khemino ti ithulu keno panonguye pove eno hipau vehu pesu aphughilo eno aphu aphulo vekupha wove.

³⁵Timiqono kiu shivekeno juniye wukha, eno timiqono Jisu lau ighino timi khuu phi lono tughakusa ipeve keno aphi mini uno pa kukumsu achipi shighi Jisu pukhu philo iqa aghike ithulu; ike panonguye msave.

³⁶Khunoqono ti ithuluve keno timiqo vilo timi huye kishi shipivive keno piwo.

³⁷Tilehi Gergesan yeghi sukumxalo kuami kumtsuno Jisu vilo wuvelopi pithu, kughengu panongu kumtsu shishe msave; ikehu paye ashukalo ilono idewove.

³⁸Timi khuu phi lono tughakusa haphevetsu keno pano Jisu vilo pa gholo chepe lopi qhuiniju; ikemu Jisu no pa puwove ghi pi,

³⁹“Okilo idewolo, eno Alhou no oghenguno kiutoi mla keno piphe alo.” Timi huno wono aphughi kumtsu Jisu no pa ghenguno kiu mlatsu keno asheshu ae.

⁴⁰Kughou Jisu no aizukucho tuxa kudau ideghi keno aqokitikhino alokivishi pa sasu kushoe, kughengu panongu kumtsuno pa khe ake.

⁴¹Tishi akelo Jairus ighi, paye Sinagog lo sakiphemi lakhi. Pano Jisu pukhu phivilo itsaqi puzu pa kilo ighitsu penike qhuiniju,

⁴²kughengu pa nga lakhi likhi akeu khuu ampe chighi kini shiakeno, thiveniye ake. Ike Jisu no wuchekelo timiqono aqha kumtsu lono pa tsakibi khoyipe ake.

⁴³Totimi lakhi ampe chighi kini ahji chijikeu lono suchekemi lakhi tile aghi. Liye kiu akeno shikipivimi launo akuchopu puwokhave, ikemu lakhi nomu li shipivi mlave.

⁴⁴Lino aqokitikhi gholono Jisu thiu ighi eno pano uchekeu phishelo bue eno paikhavino lino ahji pochekeu tave.

⁴⁵Jisu no iniju, “Khuno ibu kya?” Kumtsuno moe piwu khave, tile Pitor no pi, “Kutsuchekeu, timi aqokitikhino osuhupe ani eno otsakibi khoiyi pe anie!”

⁴⁶Ikemu Jisu no pi, “Milakhino ibuvae, kughengu akuka ilauno ipekeu ino ithivae.”

⁴⁷Ike atotiuno itshu mlakeu ithiveno lino khokhoshi ighi eno Jisu gizulo ikiqi puzu tile akemi kumtsu zulono lino pa vilo kushiye pa bu eno kishi paikhavi lono lino viluve keno pie.

⁴⁸Jisu no li vilo pi, “Angao, okupuluno oshipivi luvae, aloino wolo.”

⁴⁹Pano atsapiake mtsa Jairus ki lono timi lakhi asutsa pesu ighi. Pano Jairus vilo “Ongaye thivae, tighenguno kutsuchekeu shipuna kevelo.”

⁵⁰Ikemu Jisu no chiluveno ighowo pi, “Msakevilo, pulubekeu likhi alo eno liye itaghi viluve nani.”

⁵¹Kughou pano aki tolukeno Pitor, Jems, Johan eno anga papu aza pama ishi thono kutami lakhimu pa gholo alou sailo moe.

⁵²Anga ghenguno tile lakhi khino qanimulo ae. Jisu no pi, “Igha qa kevilo, liye zu ani kethono thimphie!”

⁵³Panonguno pa junuqhi kughengu liye thive keu panonguno ithi ake.

⁵⁴Ikemu Jisu no li u tsuquno kughi pi, “Ithulo, Anga!”

⁵⁵Li kuxu ideghive eno tipa mtsa liye ithughive, eno kiuala chukepu pe li tsulopi Jisu no panongu hakite.

⁵⁶Li puaza pamaye akichiqhive, ikemu kiu shiveakela khu vilomu pipemo nike Jisu no panongu piputove.