Read Sumi Naga LUK 9 Bible Online

LUK 9 - Sumi Naga bible

LUK 9

¹Kughou Jisu no akhopemi chighikini ku kutsulu keno, tughakusa kumtsu haphe kulupu, kusukini shipivi kulupu kuka tsue.

²Panongu pelo Alhou yehkipe pesu asheshu eno akusu shipivi penike pano puwu.

³Pano panongu vilo pi, “Nonguye aghuzulo ghenguno kiumu pekevilo, akusu mu, jolabomu, achuqupumu, pisamu, aphikuzu azuli mu pekevilo.

⁴Khile nongu sasu keno, tipano kilo aphughi tipau qhive moke kuto tile ngolo;

⁵khile nongu sasumoni keno, tipa phughi qhivelo eno nongu pukhu lono ayeghi kukhuqhi velo, tino panongu kutughukeu lakhi shighi.”

⁶Panonguno cheve eno aphu kumtsulo izuwuno Asutsa kiviu pesu asheshu eno wukeqha kumtsu timi shipivie.

⁷Hipaqo kumtsu shilu ani pikeu sutsa Galil lo ayehkipeu Herod no chilu puzu paye ighono avehu izuve, kughengu timino pi, “Johan Baptist akithi lono xu ithughivae!”

⁸Kutamino Elija ipeghi auvea ipi, eno khamino khaghi tungkupmi gholo lakhi xuchile ighivea ipi.

⁹Herod no pi, “Ino Johan kutsu ghithave tsua: ikemu timi hipauye khuu keno niye hipaqo sutsa chilu ani kya?” Eno paye Jisu junishi kutua.

¹⁰Apostolmino izuuno ideghi kethiu Jisu vilo panonguno kiu kiu mlalu keno pi. Pano panongu likhi sasu Bethsaida ipikeu phulo wuve.

¹¹Kughou aqokitikhi no ti chilukeno panonguno pa papewu. Pano panongu sasu alokivishi kusholu eno Alhou yehkipe ghili pesu panongu putsa eno khunoqono shikipivi avehupu shi akeno tipaqo shipivitsu.

¹²Kughou tsuzuve keno akhopemi chighikinino pa lau ighieno pi, “Timiqo puwo veno panongu pelo aphu eno aluzalo wuno achuqupu ngo akungoa phujuwupelo kughengu hilehiye asutsuni itsu mokeu-a lakhie.”

¹³Ikemu Jisu no panongu vilo pi: “Nonguno kiuala chukepu pe panongu tsulo.” Panonguno khochile, “Ninguye asho pungu eno akha kini nguno alauye kuhae, timi hijejehi ghenguno nino wuno achuqupu qhusughi lopi kesha?”

¹⁴(Tile kiptimi 5000 kutolo ake). Jisu no pa khopemi vilo pi, “Timi lhopungu nguno aqo aqo shi iqawo pelo.”

¹⁵Akhopemino ti shiwo eno kumtsu pelo iqavepe.

¹⁶Jisu no asho pungu akha kini ikhiluno kunguu atsutsulo jupukughi tipaqo ghenguno Alhou vilo kumghakeu khuini eno tipaqo suphono tipaqo kijetsupe nike akhopemiqo tsu.

¹⁷Kumtsuno chuno aghaqilu kha. Timiqono chukhakumo akhopemino kichekutsu kelo ashoghi chighi kini aghie.

¹⁸Ghuthu lakhi Jisu no luthu shighi inikhu akelo akhopemino pa lau ighie, pano panongu vilo iniju, “Aqokitikhiye nipesu khuu ipi chenia?”

¹⁹Panonguno khochile pi, “Khamino noye Johan Baptist kutamino noye Elija, itaghi khamino khaghi tungkupmi gholono lakhi xuchile ighi ani ipi picheni.”

²⁰Pano panongu vilo pi, “Imaye, Nonguye ni pesu khuu ipi chenia?” Pitor no khochile pi, “Alhou wu Mesiya ke!”

²¹Ikemu pano panongu vilo khuu vilomu hipau pikevilo pi tsatsai lakhaveno

²²pi, “Timi Nu ye shishe ime masae; muchomiqo, achinetomi eno Ayezah kukutsumiqo pelo pa levepe, pithivepe masae ikemu akuthunino xuputhuve nani.”

²³Pano kumtsu vilo pi: “Khukhumu ipapenishi aye, paye pa likhi pa miliveno tsalakipetsu pawu kros ikhiluno ipape masae.

²⁴Kughengu khunono pa kuxu xalu nishi keno paye ti puhave nani; ikemu khunono ighenguno pa kuxu tsuveni keno paye xalu nani.

²⁵Kughengu timi lakhino ayeghiqha kuchopu pawu shive aghinamu pa ngulho puhave momu pa kuxu pesu lovekepu shive aye kiu ala kya?

²⁶Kughengu khunono ni eno itsape shinikeulo kujoveni keno, Timi Nu ghi pa jukuvu, Apu jukuvu eno akimthe kungumiqo jukuvu lono ighikelo pano tipano je piphetsumove nani.

²⁷Ikemu ino kuchouno nongu vilo pini, hile puthugho akemi gholo khamiye Alhou yehkipe ithulu mphilo panonguye akithi michemo nani.”

²⁸Pano hipaqo vehu piwo atsala tache thiu Jisu no Pitor, Johan eno Jems sasu inikhu nike naghutolo iqhoe.

²⁹Pano inikhu akelauye pa ju kilive eno pa phiminino mlapuyi metsughoive.

³⁰Paikhavi lono timi kini, Muse ngo Elija pamano pa sasu kuptsa aghive.

³¹Pamano ajukuvu lono ipeghi eno Jisu sasu kuptsa keuno paye tileno idewo puzu Jerusalem lono thiniye akeu eno tipau vechewo Alhou pulou shikupu niye akeu tsa kuptsae.

³²Pitor eno pa kusamiqoye qeyi zuhuve, panonguno idaithughino pa jukuvu gholo timi kini puthugho aghikeu ithulue.

³³Timi pamano pa launo cheve niye akelo Pitor no Jisu vilo pi, “Ampeu ninguye hile akeu pavie; ningu pelo apusho kuthu shipelo, lakhino osala, lakhino Muse sala eno lakhino Elija sala.” (Paye kiu pi ani kela mtha pulaghi).

³⁴Pano pi-aphi lono khungkusu ighino panongu kuzupholuve; panonguno khungkusulo ilo kelo panonguye msave.

³⁵Khungkusu lono asutsa lakhi ighi, “Hiye iNu ino Kishelukeu; pa tsa inilo!”

³⁶Asutsa ini tave kethiu Jisu likhi aghive. Panonguno inaqhoive eno kiu ithuluvea keno tipa ghulokiloye khuu vilomu pimoe.

³⁷Tishiwo thoghiu panongu naghuto lono iqighi kelo timi aqokitikhino pa sasu kushoe.

³⁸Aqokitikhi gholo timi lakhino ighamuku pi, “Kutsuchekeu, ino oqhuiniju ani, inu jutsunima, kughengu inu hilikhi ke;

³⁹julo, aghahwu lakhino pa tsuquluve cheni; tino pa sukughuthaqhi keu lono pa kichilo mlaghubeyive cheni, pa hethapiniyive cheni eno pa phemono acheni!

⁴⁰Ino okhopemi vilo ti haphevetsu lopi qhuiniju ikemu panonguye shimla vae.”

⁴¹Jisu no khochile pi, “O akupulu kukuha eno kixikila tiqheli, niye khitohi nongu sasu anani kya? Eno khitohi nongu xapuqhe anani kya? Onu hilau saighilo.”

⁴²Pano wuche-phi lono tughakusano panu tukuluqhiveno pa sukughuthaqhi. Ikemu Jisu no tughakusa lomi pive, anuye shipiviveno papuh lau puwuve.

⁴³Panongu kumtsuno Alhou kuka kumto jupe akumzave. Jisu no kiu mlakeno tipaulo timiqono akumzaqhiyi aphi lono, pano pa khopemi vilo pi.

⁴⁴“Atsa hipaqo pheqhi kevilo, hipaqoye nongu ghenguno ke: Timi Nu ye ikhi phepe timi ulo suvetsuni cheni.”

⁴⁵Panongu ye hipau kiqi kiu kela mthano auve, tiye kusupe puave kehu mthakepu shive; eno panonguye pa vilo hipau vehu inijunikeu msave.

⁴⁶Akhopemi gholo khuuno akijeu kela ipikeu lono panongu dolono mutomushu keu lakhi ipeghive.

⁴⁷Ike Jisu no panongu kukumsu jupililuve kehu itimi lakhi khapewo pa phivilo qhi,

⁴⁸eno panongu vilo pi: “Khunono ije lono itimi hipau ikhilu keno ni ikhilu anie, eno khunono ni ikhiluni keno ipuwu akeu ghi ikhilu ani. Kughengu nongu gholo khuuno akitilau keno pano akijeue.”

⁴⁹Johan no khochile pi, “Ampeu timi lakhino oje lono tughakusa haphe aghike ninguno ithulue eno ninguno pa lakhaveake, kughengu paye nilaumi kumoke.”

⁵⁰Ikemu Jisu no Johan ngo akhopemi vilo pi, “Pa lakha kevilo; kughengu khuno nongu sasu kichekiyi shimono aghini keno tiye nolaumike.”

⁵¹Jisu kunguu sakuve kepu do kupunuwo chekelo, pano pa kukumsu ighomono Jerusalem lo wunikeu shi.

⁵²Pano azuuno aghinikishimi puwue. Panonguno wuno Samariami phu lakhilo ilono pa ghenguno thwokha kutonikeu shi;

⁵³ikemu timiqoye pa sasumo nikeu shive, kughengu Jerusalem kudau pa kukumsu auveke.

⁵⁴Kughou akhopeu Jems ngo Johan pamano ti ithulu keno pamano pi, “Ampeu noye ningu pelo atsutsu lono ami kupiqino panongu pitiqhi penishi anima?”

⁵⁵Jisu no igho ighieno panongu lomi pive;

⁵⁶eno panongu aphu kutau wuve.

⁵⁷Panongu alalo wuchekelo timi lakhino Jisu vilo pi, “Khila khilamu nono wukelo niye opape wunie.”

⁵⁸Jisu no pa vilo pi, “Sher qoye atuki ani eno kungu ghauqono apusu ani, ikemu Timi Nu ye pa kutsu kibepu-a ghi kuhae.”

⁵⁹Jisu no kutami lakhiu vilo pi, “Ipapelo.” Ikemu tipauno pi, “Atughushi ipelo wuno ipu kumo shiqho paghi pelo.”

⁶⁰Jisu no pa vilo pi, “Kithimi pelo kithimi kumo shiqho apelo, ikemu noye wuno Alhou yehkipe ghili asheshulo.”

⁶¹Kutami lakhino pi, “AMPEU, niye opapeni; ikemu atughushi ipelo akilo akeqo nibolomi vilo akikini tsa pive paghi pelo.”

⁶²Jisu no pa vilo pi, “Khuu no akuphu tsuqupe apulaghi athiu juni keno Alhou yehkipelo iloni keu akuzupu kumoe.”